Паводле слоў намесніка начальніка ўпраўлення прафілактыкі галоўнага ўпраўлення аховы правапарадку і прафілактыкі міліцыі грамадскай бяспекі МУС Беларусі Сяргея КРАСУЦКАГА, практычна кожнае трэцяе забойства і наўмыснае прычыненне цяжкіх цялесных пашкоджанняў беларусы здзяйсняюць у дачыненні да блізкіх людзей. Толькі сёлета зарэгістравана 68 забойстваў і 117 выпадкаў прычынення цяжкіх цялесных пашкоджанняў.
Найбольш праблемныя рэгіёны ў сэнсе бытавой злачыннасці — Брэсцкая і Гомельская вобласці, дзе колькасць бытавых забойстваў павялічылася ў параўнанні з мінулым годам у 2 і 2,4 раза адпаведна, а таксама Міншчына, дзе на 60% вырасла колькасць бытавых забойстваў. Па-ранейшаму асноўная частка пацярпелых — жанчыны, асабліва ў сельскай мясцовасці; хоць прыкладна ў 40% выпадкаў і самі жанчыны, не знаходзячы доўгі час выйсця з тупіка, учыняюць цяжкія злачынствы...
Да бытавых агрэсараў усё больш шырока прымяняюцца меры прававога ўздзеяння, у тым ліку крымінальныя справы прэвентыўнай накіраванасці, што папярэджваюць больш цяжкія злачынствы. Найчасцей заводзяць справы па артыкулах КК № 152 (наўмыснае прычыненне лёгкага цялеснага пашкоджання), 154 (катаванне), 186 (пагроза забойствам, прычыненнем цяжкіх цялесных пашкоджанняў ці знішчэннем маёмасці), 189 (абраза). Яшчэ адна дзейсная мера супраць сямейных скандалістаў — прымяненне так званага абароннага прадпісання (гэта новая норма, што з'явілася ў красавіку бягучага года ў Законе «Аб асновах дзейнасці па прафілактыцы правапарушэнняў»). Прадпісанне можа ўстанаўліваць забарону на кантакты, наведванне, высвятленне месцазнаходжання пацярпелага ад сямейнага гвалту або, па просьбе пацярпелага, абавязвае агрэсара наогул пакінуць агульнае жылое памяшканне на тэрмін ад 3 да 30 дзён. З пачатку дзеяння закона супрацоўнікі міліцыі прымянілі ўжо 26 абаронных прадпісанняў, у тым ліку ў 19 выпадках «тыранам» давялося часова пакінуць агульнае жытло. «Нязначная колькасць абаронных прадпісанняў абумоўлена найперш нежаданнем саміх пацярпелых яго прымяняць, — адзначае Сяргей Красуцкі. — Ды і само выяўленне фактаў гвалту ў сям'і ўскладняецца тым, што ахвяра, баючыся сапсаваць рэпутацыю сям'і, не адважваецца звярнуцца па дапамогу ні ў праваахоўныя органы, ні нават да родных».
Сёння ў Беларусі на базе тэрытарыяльных цэнтраў сацыяльнага абслугоўвання насельніцтва дзейнічаюць 94 крызісныя пакоі, дзе ахвяра сямейнага гвалту можа пажыць, атрымаць дапамогу псіхолагаў і юрыстаў. З 2012 года дапамогу ахвярам сямейнага гвалту аказваюць таксама 19 некамерцыйных арганізацый у розных рэгіёнах: Мінску, Брэсце, Гомелі, Магілёве, Пінску, Смаргоні, Лідзе, Наваполацку. Кансультацыйную дапамогу аказвае і тэматычны інтэрнэт-рэсурс ostanovіnasіlіe.org, паслугамі спецыялістаў якога скарысталіся больш за 150 беларусаў.
Вікторыя ЦЕЛЯШУК.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.