Гэта ўжо другі этап рэспубліканскай кампаніі «Дом без гвалту», якая ўзяла пачатак у 2012 годзе дзеля абароны жанчын і дзяцей. Першы этап — «Кухня без гвалту» з удзелам Юліі Высоцкай — падтрымаў работу «гарачай лініі» 8 801 100 8 801 для тых, хто пацярпеў ад хатняга гвалту. За два гады работы паступіла звыш 5 тысяч званкоў. Новы этап кампаніі скіраваны на папярэджанне жорсткага абыходжання з дзецьмі. «Давайце жыць мірна!» — заклікае тэнісіст Максім Мірны, які стаў новым тварам інфакампаніі.
— Дзеці і падлеткі нярэдка становяцца ахвярамі і сведкамі гвалту ў сям'і, — кажа каардынатар праекта «Павышэнне нацыянальнага патэнцыялу Рэспублікі Беларусь па супрацьдзеянні хатняму гвалту», начальнік упраўлення прафілактыкі галоўнага ўпраўлення аховы правапарадку і прафілактыкі міліцыі грамадскай бяспекі Міністэрства ўнутраных спраў Беларусі Алег КАРАЗЕЙ. — Дзіця можа пакутаваць як ад непасрэднага прымянення сілы, так і ад пастаяннага назірання за тым, як бацька здзекуецца з маці. Больш за тое, падобны стыль паводзін пераносіцца пазней і на ўласнае сямейнае жыццё. Хлопчыкі капіруюць дзеянні бацькаў, а дзяўчаткі, як і іх мамы, — церпяць...
А вось апошнія звесткі з глабальнага даклада ЮНІСЕФ «Скрытае на вачах ва ўсіх». Кожная другая дзяўчына-падлетак згодна з пазіцыяй сілы мужа ў пэўных абставінах. Трое з дзесяці дарослых людзей лічаць фізічнае пакаранне неабходным для выхавання падрастаючага пакалення. Амаль кожнае пятае дзіця ў 58 краінах свету падвяргаецца жорсткаму фізічнаму пакаранню.
У Беларусі, паводле даследаванняў, кожнае трэцяе дзіця ад 2 да 14 гадоў знаёмае з фізічным уздзеяннем. А калі гаварыць пра 2-4-гадовых, то доля пацярпелых вырастае да 50 працэнтаў. Фактычна толькі трэць дзяцей выхоўваецца без фізічнага пакарання і псіхалагічнага ціску, толькі просьбамі ды тлумачэннем. Многія бацькі прызнаюцца, што не хацелі б уздзейнічаць падобным чынам, аднак не ўмеюць абыходзіцца без «узнятай рукі».
Падрабязней чытайце ў буклетах «ад 0 да 3 гадоў» і «ад 0 да 18 гадоў». Спецыяльныя рэкамендацыі размяшчаюцца на старонцы
www.detskaya.unіcef.by.
P.S. Заключны этап інфармацыйнай кампаніі «Дом без гвалту» пачнецца ў 2015 годзе і разлічаны ён будзе на мужчын, якія праяўляюць агрэсію ў сям'і.
Святлана БАРЫСЕНКА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.