Асветніцкі праект па навучанні пенсіянераў камп'ютарнай граматнасці шукае валанцёраў
Ужо ў кастрычніку ва ўсіх абласных гарадах Беларусі праект «Сеціву ўсе ўзросты пакорныя», арганізаваны мабільным аператарам «МТС», прыме новых вучняў. За тры месяцы адукацыйнай праграмы пажылыя людзі навучацца карыстацца камп'ютарам і інтэрнэтам.
Мэта праграмы, якая ахопіць сёлета Мінск, Брэст, Віцебск, Гродна, Гомель, Магілёў, а таксама Бабруйск, — у простай і даступнай форме пазнаёміць пажылых студэнтаў з сучаснымі тэхналогіямі, навучыць іх карыстацца карыснымі анлайн-сэрвісамі: чытаць і глядзець навіны, шукаць неабходную інфармацыю, кантактаваць з сябрамі і роднымі праз электронную пошту і сацыяльныя сеткі, аплачваць камунальныя паслугі, заказваць білеты да ўрача, квіткі на канцэрты і г.д. Зрэшты, узяць удзел у праекце мусяць не толькі бабулі і дзядулі, але і іх унукі — у якасці выкладчыкаў. Праекту неабходна дапамога маладых валанцёраў. Каб трапіць у іх лік, трэба насамрэч зусім мала: быць гатовым падзяліцца ўласнымі ведамі і вопытам, а таксама асабістым часам (1 гадзіна на тыдзень) з тымі, хто мае ў гэтым патрэбу. Працу выкладчыкаў арганізуюць з улікам іх пажаданняў: кожны з валанцёраў можа выбраць той вучэбны клас, які яму зручнейшы і бліжэйшы ў геаграфічным плане, а таксама ўзгадніць папярэдне месца і час правядзення заняткаў.
«Мы шукаем адказных і спагадлівых людзей, якія гатовы дапамагаць і стаць для пажылых людзей своеасаблівымі праваднікамі ў свет сучасных тэхналогій, — падкрэслівае кіраўнік камерцыйнага дэпартамента «МТС» Яўген БРАНЦАЎ. — Пенсіянерам у тэхналагічным грамадстве новыя веды вельмі патрэбныя, але яны не заўжды гавораць пра гэта ўголас: хтосьці з-за страху, нехта з-за няўпэўненасці ва ўласных сілах. Задача валанцёра — знайсці з пенсіянерамі агульную мову, наладзіць даверлівыя стасункі. Як паказвае вопыт папярэдніх этапаў праекта, іншыя аспекты — пол, узрост, колькасць вышэйшых адукацый выкладчыка — па вялікім рахунку, значэння не маюць». Так, сярод валанцёраў былі і бухгалтары, і праграмісты, і студэнты гуманітарных спецыяльнасцяў, і інжынеры. Адну з груп у мінулым сезоне вёў 67-гадовы пенсіянер, які вучыўся раней у праекце. А самай юнай выкладчыцай стала... 12-гадовая школьніца, якая не проста гутарыла са студэнтамі на адной мове, але і стала адной з найбольш любімых настаўніц у пажылых людзей!
Вы пазналі ў партрэце валанцёра сябе? Тады да 1 кастрычніка бягучага года неабходна даслаць заяўку на ўдзел у праекце на адрас vozrast@mts.by, пазначыўшы сваё імя і прозвішча, кантактны тэлефон, месца працы ці вучобы і найбольш зручны для вас час заняткаў. Да пачатку новага навучальнага сезона ва ўсіх рэгіёнах будуць арганізаваны трэнінгі для валанцёраў: спецыялісты прэзентуюць спецыяльна распрацаваную праграму для навучання пажылых людзей, падзеляцца ўласным вопытам і распавядуць, на якія аспекты і тэмы варта звярнуць асаблівую ўвагу.
Дарэчы, сёлетні этап стане ўжо трэцім у праекце. Наогул праграма «Сеціву ўсе ўзросты пакорныя» стартавала ў кастрычніку мінулага года ў Мінску на базе чатырох тэрытарыяльных цэнтраў сацыяльнага абслугоўвання насельніцтва. За першыя два этапы сіламі валанцёраў досвед працы з камп'ютарам і інтэрнэтам набылі каля 1000 сталічных пенсіянераў. Летась жа праект быў прызнаны найлепшай адукацыйнай ініцыятывай на першай беларускай прэміі ў галіне карпаратыўнай сацыяльнай адказнасці.
Вікторыя ЗАХАРАВА
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.