Дзяржава абавязкова дапаможа, толькі трэба дакладна ведаць свае правы
Людзі тэлефанавалі, сумняваючыся ў сур'ёзнасці выплат, якія адбываюцца пры нараджэнні дзяцей. З аднаго боку, добра, што нараджаюць у нас не дзеля грошай, а з іншага боку, шкада, што народ слаба ведае свае правы. Падчас прамой тэлефоннай лініі ў рэдакцыі «Звязды» першы намеснік начальніка Мінскага гарадскога ўпраўлення Фонду сацыяльнай абароны насельніцтва Уладзімір Жамчужнікаў і начальнік аддзела сацыяльнага страхавання Аксана Шушкет дапамаглі нашым чытачам запоўніць асноўныя «прабелы».
Двайняты каля хаты
Алег Кудрыцкі, г. Жодзіна: Аксана Юр'еўна, мяне цікавяць памеры матэрыяльнай дапамогі пры нараджэнні двойні. Гэта сур'ёзныя грошы?
Аксана Шушкет: Калі гэта першыя дзеці ў сям'і, то на аднаго выплачваецца 10 бюджэтаў пражытковага мінімуму, а на другога — 14 БПМ. І калі маці ўстала на спецыялізаваны ўлік у паліклініку да 12 тыдняў ды назіралася там на працягу ўсёй цяжарнасці, то яна дадаткова атрымае яшчэ 1 БПМ.
А. К.: А калі двойня нарадзілася пасля першага дзіцяці?
А. Ш.: У гэтым выпадку будзе выплачана па 14 «бюджэтаў» на кожнага з нованароджаных. Акрамя таго, напрыклад, у Мінску пры нараджэнні двойні мясцовыя ўлады выплачваюць сям'і дадатковую матэрыяльную дапамогу. Раю вам пацікавіцца ва ўпраўленні сацыяльнай абароны Жодзінскага гарвыканкама на гэты конт. Магчыма, у іх на такі выпадак ёсць свая спецыяльная праграма.
З дзіцем-інвалідам — выплаты на ўсіх
Святлана Аляксеева, г. Мінск: Я знаходжуся ў адпачынку па доглядзе дзіцяці. Працуе толькі муж — у бюджэтнай арганізацыі. З пачатку верасня я звольнілася з папярэдняга месца працы. А малому яшчэ няма трох гадоў. Дзе цяпер мне атрымліваць дапамогу і ці павінны мне нешта выплаціць на апошнім месцы працы?
А. Ш.: А якога чысла вы звольніліся з працы?
С. А.: 3 верасня.
А. Ш.: Значыць, дапамогу вам павінны выплаціць за ўвесь верасень па месцы вашай працы. Там жа вам дадуць даведку аб выплаце дапамогі. І ў далейшым ваш муж, калі ў яго арганізацыі працуе больш за 15 чалавек, будзе атрымліваць вашы грошы па сваім месцы працы. Для гэтага ён павінен сабраць усе патрэбныя дакументы і напісаць адпаведную заяву ў камісію па назначэнні дапамог па месцы працы. Разам з тым, адзначу, што калі галава сямейства працуе ў невялікай камерцыйнай арганізацыі (да 15 чалавек), то функцыі па атрыманні такіх дапамог бяруць на сябе тэрытарыяльныя ўпраўленні сацыяльнай абароны па месцы жыхарства.
С. А.: Яшчэ ў мяне пытанне ад сяброўкі, якая жыве ў вёсцы. У яе сям'і трое дзетак старэйшых за тры гады, але ўсе яны непаўналетнія. Адно дзіцё прызнана інвалідам. Дапамога пры гэтым будзе выдавацца на ўсіх дзетак ці толькі на хворую малую?
А. Ш.: Безумоўна, на ўсіх. Калі ў сям'і выхоўваецца дзіця-інвалід да 18 гадоў, то яна адносіцца да асобнай катэгорыі. Тут дапамога даецца на ўсіх дзяцей незалежна ад агульнага даходу сям'і. Адзіная ўмова — муж абавязаны афіцыйна працаваць. Прычым калі, скажам, інваліднасць устанавілі сёлета, то бацька летась павінен быў адпрацаваць не менш за 6 месяцаў у каляндарным годзе і працягваць працу цяпер.
С. А.: А якога памеру будуць выплаты?
А. Ш.: На хворага малога выплачваюць 70% БПМ, а на астатніх — па 50%.
Ведаць, каб паспець
Уладзімір Жамчужнікаў: Трэба, каб усе ведалі пра свае правы на дапамогі. Бо да абсурднага даходзіла, калі нават бухгалтар, якая абавязана налічваць дапамогі сваім работнікам, не ведала, што можа атрымліваць грошы на дзіця-інваліда, старэйшага за тры гады. Калі гэтая жанчына падлічыла, колькі гадоў яна не атрымлівала ўнушальную дапамогу ад дзяржавы, то нават расплакалася.
Кар. «Звязды»: Цікава. Атрымліваецца, што калі сям'я звярнулася па такую дапамогу не адразу, то за мінулы перыяд грошы яна ўжо не атрымае?
У. Ж.: Законам вызначана, што звярнуцца па дапамогу можна на працягу шасці месяцаў пасля ўзнікнення права на яе атрыманне. У гэтым выпадку грошы вам дадуць за ўвесь перыяд. Пасля шасці месяцаў вы будзеце атрымліваць грошы з даты звароту.
Другога доўга не чакалі
Вікторыя Лагун, г. Мінск: Я была ў водпуску па доглядзе дзіцяці. З 1 чэрвеня прыпыніла яго і выйшла на працу на поўную стаўку. А з 20 жніўня ў мяне ўжо новы бальнічны ліст па цяжарнасці. У якім памеры мне павінны плаціць дапамогу на першае дзіця?
А. Ш.: За чэрвень вы павінны атрымаць дапамогу ў памеры 100%. З 1 ліпеня па 19 жніўня вам аплацяць 50% дапамогі. А на перыяд адпачынку па цяжарнасці павінны выплаціць зноў у поўным аб'ёме. Калі ваш бальнічны скончыцца, памер дапамогі будзе залежаць ад таго, якое вы прыміце рашэнне — або выйсці на працу, або заставацца ў дэкрэце. У апошнім выпадку на першае і другое дзіця будзе выплачвацца па 100%.
Кар. «Звязды»: Дарэчы, які памер дапамогі па доглядзе дзіцяці да трох гадоў?
А. Ш.: Памер залежыць ад сярэднямесячнай зарплаты (СЗ) па краіне, якая вызначаецца Нацыянальным статыстычным камітэтам. На першае дзіця — 35% СЗ у месяц. Сёння такі заробак складае 6 млн 33 тысячы рублёў, таму дапамога будзе каля 2 млн 100 тысяч. А на другога і наступных — 40% СЗ. На дзіця-інваліда — 45% СЗ.
Сямейны выхадны
Іван Сяляўка, г. Клецк: У мяне пытанне наконт «бацькоўскага дня» для шматдзетных сем'яў. Ён даецца толькі маці ці бацьку таксама, калі маці ў дэкрэтным водпуску?
А. Ш.: Сярод дзяцей інвалідаў няма?
І. С.: Дачцэ нядаўна далі інваліднасць.
А. Ш.: Тады сям'я мае права на адзін свабодны дзень у месяц за кошт Фонду сацабароны, нягледзячы на тое, знаходзіцца маці ў адпачынку па доглядзе дзіцяці або не. А таксама такая сям'я мае права на адзін свабодны дзень у нядзелю за кошт сродкаў наймальніка. Калі дзіця-інваліда няма, то тады ёсць права на «бацькоўскі дзень» 4 разы на месяц за кошт наймальніка па ўзгадненні з ім. А таксама дзецям павінна быць да 16 гадоў, іначай права страчваецца.
Уладзіслаў КУЛЕЦКІ,
Сяргей КУРКАЧ.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.