Беларусь выступае за будаўніцтва завода па перапрацоўцы адпрацаваных элементаў сілкавання
Пра гэта паведаміў міністр прыродных рэсурсаў і аховы навакольнага асяроддзя Беларусі Уладзімір Цалко напярэдадні пасяджэння Міждзяржаўнага экалагічнага савета дзяржаў — удзельніц СНД у Мінску.
«Падчас пасяджэння Беларусь мае намер падняць пытанне перапрацоўкі адпрацаваных элементаў сілкавання (батарэек і акумулятараў), — сказаў Уладзімір Цалко. — Будзем, у прыватнасці, ініцыяваць разгляд прапановы аб будаўніцтве завода па перапрацоўцы старых батарэек на тэрыторыі Беларусі ці, можа быць, Расіі».
Міністр таксама адзначыў, што для Беларусі перапрацоўка батарэек, якія выпрацавалі свой рэсурс, — актуальнае пытанне. У нашай краіне назапасіліся тоны такіх адходаў, а пытанне іх перапрацоўкі, абясшкоджвання і выкарыстання застаецца нявырашаным.
Як расказала «Звяздзе» прэс-сакратар Мінпрыроды Таццяна ЕЎДАСЁВА, Міждзяржаўны экалагічны савет дзяржаў — удзельніц Садружнасці Незалежных Дзяржаў быў утвораны ў маі 2013 года. 6 кастрычніка ў Мінску адбылося яго першае пасяджэнне. Адны з галоўных тэм мерапрыемства — абмеркаванне пытанняў развіцця супрацоўніцтва ў вобласці аховы навакольнага асяроддзя дзяржаў — удзельніц СНД і зацвярджэнне плана работы Міждзяржаўнага экалагічнага савета дзяржаў — удзельніц СНД на 2015–2016 гады. Удзел у пасяджэнні ўзялі прадстаўнікі прыродаахоўных міністэрстваў і ведамстваў Беларусі, Расіі, Арменіі, Казахстана, Таджыкістана, а таксама Выканаўчага камітэта СНД.
Мерапрыемства праводзіцца на добраахвотнай аснове.
Не выявіць ні секунды абыякавасці.