Адно што абед не гатуюць
Як рабочыя-ўніверсалы абслугоўваюць сталічны жылфонд
Ёсць такі закон: калі нешта выходзіць са строю, то звычайна — усё і адразу. Толькі пацёк кран у ванным пакоі — глядзіш, і разетка ў спальні заіскрыла, і дзверы ў гасцёўню прасядаць сталі... Раней для таго, каб адрамантаваць усё гэта, трэба было падаць як мінімум тры заяўкі ў ЖЭС, і чакаць, пакуль да вас прыйдзе сантэхнік, электрык, цясляр... Цяпер усё стала прасцей: спецыяльна навучаны хаус-майстар за адзін, так бы мовіць, прысест падрамантуе і кран, і разетку, і дзверы. Зручна, хутка і якасна.
"Мужык — ён і ёсць мужык"
Эксперымент па падрыхтоўцы рабочых па комплексным абслугоўванні будынкаў і збудаванняў (у народзе — хаус-майстроў) пачаўся са сталічнага ЖЭСа № 32, што ў Чыжоўцы.
— Хаус-майстар — гэта не зусім правільная назва, — удакладняе дырэктар ЖЭСа № 32 Мікалай ПІНЧУК, — бо, напрыклад, у Германіі хаус-майстар — гэта чалавек, які ажыццяўляе агляд кватэр і адрасуе заяўкі на рамонт падрадным арганізацыям.
Цяпер у ЖЭСе працуюць 10 рабочых па комплексным абслугоўванні, дагэтуль жылфонд абслугоўвалі 14 чалавек. Дарэчы, колькасць заявак ад грамадзян паменшылася ўтрая, і не толькі таму, што цяпер усе работы выконвае адзін чалавек, але і таму, што якасць абслугоўвання павысілася.
— Няўжо адзін чалавек, скажам, сантэхнік, можа аднолькава добра выконваць работы па электрыцы і іншыя? — не верыцца мне.
— Маё меркаванне такое: мужык — ён і ёсць мужык, — перасякае мае сумненні Мікалай Пінчук. — Хіба ён дома разетку не памяняе ці пракладку на змяшальніку?
Адметна, што пакуль дакладнага пераліку таго, што павінен рабіць хаус-майстар, няма. Паводле тарыфна-кваліфікацыйнай характарыстыкі, рабочы па комплексным абслугоўванні павінен валодаць базавымі навыкамі тынкоўных, малярных, аконных, бетонных, цяслярных і іншых работ. Па словах Мікалая Пінчука, хаус-майстры могуць рабіць амаль усё, нават дапамагчы ў паклейцы шпалер. Хіба што абед не згатуюць.
На папячэнні дзесяці спецыялістаў — 42 дамы. На кожнага майстра прыходзіцца каля 450 кватэр. Нагрузка на спецыялістаў павялічылася, прызнаюць у ЖЭСе. Зарплаты таксама, хаця рабочыя кажуць, што хацелася б зарабляць больш. Калі раней заробак майстра складаў каля 3 мільёнаў рублёў, то цяпер ён трымаецца на ўзроўні 5 — 6 мільёнаў. Але справа ў тым, што грошы пакуль што налічваюцца па старых нормах, як быццам рабочыя, як раней, асобна адпраўляюцца на сантэхнічныя, электрамантажныя і іншыя работы. Але неўзабаве гэтыя нормы павінны перагледзець, і зарплаты, адпаведна, павялічацца. Аднак ёсць і іншы бок медаля: калі раней майстар мог зарабіць нешта ў вольны ад асноўнай працы час, то цяпер такой магчымасці ў "хаусаў" няма.
"Цяпер працую... усім"
Дзень рабочага па комплексным абслугоўванні будынкаў звычайна пачынаецца з атрымання заявак ад жыльцоў у дыспетчарскай. Аднак і бягучы рамонт месцаў грамадскага карыстання таксама застаецца на плячах супрацоўнікаў камунальнай службы. Таму да абеду мы заспелі хаус-майстра Аляксандра Данілевіча за планавым рамонтам электрашчытавой у пад'ездзе. Такія работы праводзяцца фактычна кожны месяц, кажа Аляксандр, спрытна арудуючы адвёрткай у электрашчыце, і хітравата дадае, што "не кожны сантэхнік зможа разабрацца ў гэтым "павуцінні".
— У 32-ім ЖЭСе я працую ўжо больш за 20 гадоў. Раней працаваў электрыкам, а цяпер працую... усім, — усміхаецца хаус-майстар.
— Ці складана гэта — быць "універсальным салдатам"?
— Цяжкасці, вядома, ёсць, бо даводзіцца паспяваць рабіць шмат таго, чаго раней не рабіў, — мяркуе Аляксандр. — Мы працуем брыгадай, і, калі нешта не атрымліваецца, калегі дапамагаюць.
Аляксандр Данілевіч кажа, што, як правіла, мужчыны звычайна альбо самі ўсё могуць зрабіць у сваім доме, альбо звяртаюцца да прыватных фірм. У ЖЭС на комплексныя работы звычайна прыходзяць заяўкі ад бабулек, якім няма каму дапамагчы.
— А наколькі вялікая канкурэнцыя з прыватнымі арганізацыямі?
— Справа не ў канкурэнцыі, а ў тым, што пасля гэтых фірм прыходзім мы, і даводзіцца ўсё за імі перарабляць, бо яны прыязджаюць, хуценька бяруць грошы і з'язджаюць, — разважае хаус-майстар.
— Надоечы быў выпадак: мужчына выклікаў рабочага па комплексным абслугоўванні, той яму сказаў, што трэба набыць некаторыя матэрыялы. Жыхар не паверыў, пазваніў у прыватную фірму, майстры якой за замену дзвюх пракладак у кране запатрабавалі 380 тысяч, — дадае Мікалай Пінчук. — А з прэтэнзіяй грамадзянін звярнуўся да нас. Маўляў, чаму не памянялі адразу, калі паступіла заяўка — у 8 вечара? Але на той момант у нас проста не аказалася пракладак.
"На вучобу пасылалі лепшых"
Увогуле, прэтэнзій да супрацоўнікаў ЖЭСаў у грамадзян сабралася шмат. Напрыклад, пакуль Аляксандр рамантуе электрашчытавую, дзверы адной з кватэр прыадчыняюцца і з-за іх паказваецца цікаўная бабуля.
— Калі мне трэба нешта памяняць, я вызываю майстроў па аб'явах у газеце, бо ў ЖЭСе шмат аматараў выпіць, а яшчэ прыходзяць і абутак не здымаюць, — дзеліцца яна сваім горкім досведам. — Праўда, гадоў пяць таму прыходзіў сантэхнік — дагэтуль пасля таго рамонту ўсё працуе. Такі цудоўны чалавек, уважлівы.
— Гэты чалавек і цяпер працуе. Анатоль Міхайлавіч Бохан — сапраўдны майстар на ўсе рукі, 35 гадоў у галіне, — пацвярджае Мікалай Пінчук. — А ўвогуле цяпер няма такога, як было раней, што майстры маглі выпіваць ці няякасна выконваць працу. Бо для таго, каб атрымаць кваліфікацыю рабочага па комплексным абслугоўванні, трэба было прайсці адбор. На вучобу пасылалі самых лепшых.
***
Дзве гадзіны патраціўшы на рамонт электрашчытавой, пасля абеду Аляксандр адпраўляецца па заяўках. Далёка ісці не трэба: у кватэры таго ж дома, дзе знаходзіцца ЖЭС, трэба адрамантаваць змяшальнік і прачысціць вентыляцыю. Калі прыходзім на заявачны рамонт, гаспадар кватэры Георгій Уладзіміравіч, крыху саромеючыся (маўляў, што тут здымаць у маёй халасцяцкай кватэры?), усё ж дазваляе журналістам паназіраць за працэсам.
— На ўмывальніку пракручваецца галоўка крана, пастаянна ліецца халодная вада, — тлумачыць майстру праблему гаспадар.
У колішняга электрыка Аляксандра на правядзенне маніпуляцый па замене пракладкі ў кране ідзе 15 хвілін. Вуа-ля — вада больш не ліецца! Пасля хаус-майстар ідзе на кухню, дзе не працуе выцяжка, і прымаецца за раскручванне вентылятара. Праз нейкі час усталёўвае яго на месца, і выцяжка пачынае працаваць.
— Самыя вялікія цяжкасці ў тым, што трэба паспяваць усё рабіць, — падсумоўвае Аляксандр Данілевіч. — Але калі гэта ўсё як след запрацуе, павялічацца зарплаты, то рэформа будзе апраўданай.
Дзіяна СЕРАДЗЮК.
Фота Надзеі БУЖАН.
Для таго, каб атрымаць кваліфікацыю рабочага па комплексным абслугоўванні, трэба было прайсці адбор. На вучобу пасылалі самых лепшых.
***
Пасля прыватных фірм прыходзім мы, і даводзіцца ўсё за імі перарабляць, бо яны прыязджаюць, хуценька бяруць грошы і з'язджаюць.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.