Сусветная выстава была ўпершыню праведзена ў 1851 годзе ў Лондане. Усім вельмі спадабалася, і іншыя краіны сталі арганізоўваць такія мерапрыемствы. Цяпер Сусветныя ўніверсальныя выстаўкі праводзяцца з перыядычнасцю ў 5 гадоў, доўжацца як мінімум 6 месяцаў. Прымае ўдзел у іх і Беларусь. Налета «ЭКСПА» будзе праходзіць у Мілане. Як наша краіна будзе паказваць сябе ўсяму свету, карэспандэнт «Звязды» пацікавіўся ў Міхаіла Русага, намесніка прэм'ер-міністра, Генеральнага камісара ад Рэспублікі Беларусь на Сусветнай выстаўцы «ЭКСПА-2015».
— Рашэнне аб правядзенні Сусветнай выстаўкі «ЭКСПА-2015» у італьянскім горадзе Мілане было прынята яшчэ ў сакавіку 2008 года. З улікам практычнага інтарэсу для нашай краіны тэмы гэтага мерапрыемства — «Харчаванне для планеты, энергія для жыцця», а таксама багатага вопыту канструктыўнага супрацоўніцтва з Італіяй і непасрэдна Міланам дзяржава з самага пачатку падтрымала італьянскую кандыдатуру і актыўна ўдзельнічае ў падрыхтоўцы да выстаўкі, — уводзіць у курс справы Міхаіл Русы. — У ліпені 2011 года кіраўнік беларускай дзяржавы пацвердзіў намер Беларусі прыняць удзел у «ЭКСПА-2015». У верасні таго ж года рашэннем прэм'ер-міністра створаны арганізацыйны камітэт для падрыхтоўкі нацыянальнай экспазіцыі. У студзені 2014 года наша краіна падпісала з кампаніяй-арганізатарам дагавор аб удзеле ў мерапрыемстве.
— Вядома, што ўжо выбраны ўчастак, на якім будзе працаваць наша экспазіцыя. Што ж менавіта з'явіцца на ёй?
— Сапраўды, зусім нядаўна наша краіна прыняла ад арганізатараў Сусветнай выстаўкі ўчастак для будаўніцтва нацыянальнага павільёна. Беларусь плануе стварыць на пляцоўцы «ЭКСПА-2015» павільён, у якім будзе прадстаўлена нацыянальная экспазіцыя, а таксама будуць працаваць рэстаран беларускай кухні і сувенірная крама.
Канцэптуальнае архітэктурна-дызайнерскае рашэнне павільёна было вызначана арганізацыйным камітэтам па выніках праведзенага Мінбудархітэктуры ў 2012-2013 гг. адкрытага конкурсу — праект «Кола жыцця» аўтарскага калектыву ЗАТ «Тэхніка і камунікацыі». Сёлета аргкамітэтам была вызначана падрадная арганізацыя — італьянская кампанія «Штальбаў Піхлер С.р.л.», якая цяпер ажыццяўляе праектаванне і будаўніцтва.
— І як будзе выглядаць гэты павільён?
— Згодна з праектам, ён будзе складацца з двух карпусоў, выкананых у выглядзе пакрытых травой пагоркаў, паміж якімі струменіцца ручай. Над струменем вады будзе размешчана візуальная дамінанта праекта — стылізаванае кола вадзянога млына, сімвал адвечнага руху жыцця (і адначасова, дарэчы, вялізны прэзентацыйны экран).
Распрацоўшчыкі праекта беларускага павільёна імкнуцца гарманічна злучыць у ім элементы, якія будуць дэманстраваць сувязь традыцый і інавацый, накіраванасць нашай краіны на будучае, імкненне зберагчы ўнікальную прыродную і культурную спадчыну.
— Чым Беларусь здзівіць наведвальнікаў выстаўкі?
— Асаблівасцю «ЭКСПА-2015» з'яўляецца тое, што італьянскія арганізатары не імкнуцца да стварэння запамінальнай, але «мёртвай» спадчыны. Міланская «ЭКСПА» не пакіне пасля сябе архітэктурных помнікаў, якія можна будзе параўнаць, напрыклад, з Эйфелевай вежай. Мэта — стварэнне «жывой», нематэрыяльнай спадчыны, якая будзе ўвасоблена ў канцэнтрацыі творчай і інтэлектуальнай энергіі ўдзельнікаў і наведвальнікаў выстаўкі, накіраванай на вырашэнне глабальных праблем сучаснасці ў галінах харчавання і сельскай гаспадаркі. Адпаведна, беларуская экспазіцыя будзе будавацца не столькі на дэманстрацыі архітэктуры павільёна і традыцыйных экспанатаў, колькі на выкарыстанні сучасных тэхналогій для таго, каб абудзіць цікавасць і сімпатыю наведвальнікаў выстаўкі да нашай краіны.
Галоўнай мэтай беларускай экспазіцыі будзе стварэнне цэласнага вобразу Рэспублікі Беларусь як краіны, якая спалучае ў сабе значны эканамічны патэнцыял буйнога вытворцы і экспарцёра прадуктаў харчавання з адказным стаўленнем і гатоўнасцю да канструктыўнага супрацоўніцтва з міжнароднымі партнёрамі па вырашэннні найбольш значных праблем сучаснасці.
— Мінулым разам павільён нашай краіны карыстаўся вельмі вялікім попытам. Ці прагназуецца падобнае на гэтай выстаўцы?
— У «ЭКСПА-2015» удзельнічаюць 144 краіны. Упэўнены, што кожная з іх спадзяецца прыцягнуць да сваёй экспазіцыі інтарэс найбольшай колькасці наведвальнікаў. Будаўніцтва Беларуссю асобнага павільёна з'яўляецца адным з фактараў, які будзе спрыяць дасягненню гэтай мэты.
— Якія фінансавыя рэсурсы выдаткаваны на арганізацыю прадстаўлення Беларусі?
— Удзел Беларусі ў «ЭКСПА-2015» будзе фінансавацца як з бюджэтных, так і з пазабюджэтных крыніц.
— Якую практычную выгаду атрымае краіна ад удзелу ў сусветнай выстаўцы?
— У адрозненне ад спецыялізаваных галіновых выставак і кірмашоў, мэтазгоднасць удзелу ў сусветных выстаўках «ЭКСПА» вымяраецца не толькі і не столькі ў практычнай выгадзе. Выстаўка «ЭКСПА» ўваходзіць у шэраг найбольш масавых і рэзанансных мерапрыемстваў у свеце.
На сёння арганізатары «ЭКСПА-2015» заяўляюць аб продажы больш за 8 мільёнаў квіткоў. Агульная колькасць наведвальнікаў, паводле папярэдніх ацэнак, перавысіць 20 мільёнаў чалавек.
Сапраўды, глабальны маштаб такога мерапрыемства, як Сусветная выстаўка «ЭКСПА», забяспечвае яго ўдзельнікам, у тым ліку Беларусі, унікальныя магчымасці для ўмацавання станоўчага міжнароднага іміджу, прыцягнення ўвагі турыстаў, гандлёвых партнёраў і інвестараў.
Уладзіслаў КУЛЕЦКІ.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.