Кніга Вячаслава Бандарэнкі «Полководцы и военачальники Первой мировой войны — уроженцы Беларуси» стала дваццаць першым выданнем, якое ў гэтым годзе папоўніла фонды Нацыянальнай бібліятэкі Рэспублікі Беларусь на тэму, звязаную з сусветнай трагедыяй стагадовай даўнасці.
Кніжны праект старшыні праўлення дабрачыннага культурна-гістарычнага фонду памяці Першай сусветнай вайны «Крокі», пісьменніка, журналіста, кінасцэнарыста, лаўрэата прэміі Прэзідэнта Рэспублікі Беларусь «За духоўнае адраджэнне» Вячаслава Бандарэнкі ажыццёўлены пры дапамозе РВУ «Выдавецкі дом «Звязда». Новае выданне стала чарговым унёскам у адраджэнне гістарычнай памяці.
Днямі ў галоўным кніжным храме краіны адбылася прэзентацыя кнігі, якая ўжо атрымала шырокі грамадскі рэзананс.
Выхад кнігі стаў знакавай падзеяй у адкрыцці новых старонак вайны, якая працяглы час заставалася недастаткова даследаванай і асэнсаванай. Як сцвярджаюць сучасныя гісторыкі, калі б страты Першай сусветнай вайны, якія каштавалі гібелі мільёнаў людзей, урокі бессэнсоўнасці ўдзелу ў крывавай бойні 38 дзяржаў свету былі ацэнены своечасова і ў поўнай меры, магчыма, і Другую сусветную вайну можна было б папярэдзіць.
Унікальнасць кнігі Вячаслава Бандарэнкі заключаецца ў тым, што з яе старонак паўстаюць вобразы людзей, якія не проста ўдзельнічалі ў ваенных дзеяннях. Яны былі ў ліку высокіх камандзіраў — узначальвалі франты, арміі, карпусы, прымалі стратэгічна важныя для рускай арміі рашэнні. Усе 25 герояў кнігі развенчваюць створаны міф, што ў царскай арміі беларусам было немагчыма дасягнуць высокіх ступеняў адрознення. Сваімі адметнымі камандзірскімі здольнасцямі, высокім афіцэрскім гонарам палкаводцы і военачальнікі яшчэ раз пацвердзілі дзейсны патэнцыял нашай нацыі. Іх імёны папоўнілі вялікі спіс імён знакамітых беларусаў, якія праславілі нашу Радзіму за яе межамі.
«У Саюзе пісьменнікаў Беларусі, — адзначыў яго старшыня Мікалай Чаргінец, — мы занялі пазіцыю разабрацца з гісторыяй з мэтай знайсці ўраджэнцаў Беларусі, чые імёны шануюць у свеце, незаслужана замоўчваючы іх беларускае паходжанне. Пласты гісторыі патрабуюць вялікай даследчай работы, удумлівага падыходу да супастаўлення падзей, значнасці і ролі ў іх канкрэтных асоб. І гэтая ідэя паступова стала ажыццяўляцца, прымаць форму рэальнай аддачы — рэабілітацыі перад гісторыяй нашай дзяржавы».
Кніга Вячаслава Бандарэнкі — яркі доказ таму. Мікалай Іванавіч выказаў вялікую ўдзячнасць аўтару за тое, што ўзяўся за гэтую вельмі адказную тэму і прадставіў зрэз гісторыі, паказаўшы няпростыя лёсы вялікіх палкаводцаў і военачальнікаў, для большасці з якіх чарговым выпрабаваннем стала Кастрычніцкая рэвалюцыя і яе наступствы.
На прэзентацыі была падкрэслена асаблівая важнасць кнігі для моладзі. Твор міжвольна прымушае задумацца над тым, што сярод людзей, на чые плечы лёг цяжар Першай сусветнай вайны, былі блізкія нашым сучаснікам людзі. А гэта значыць, ёсць нагода глыбей вывучаць гісторыю сваёй сям'і, свайго роду, ведаць свае карані.
Алена Стэльмах.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.