Вы тут

Навагодні зварот Прэзідэнта Рэспублікі Беларусь Аляксандра Лукашэнкі да беларускага народа


Дарагія суайчыннікі!

Чалавечае жыццё нярэдка параўноўваюць з дарогай. І гэта дарога з асаблівымі правіламі. Па ёй можна прайсці толькі адзін раз і нельга павярнуць назад.

Старажытныя мудрацы вучылі: цаніце кожнае светлае імгненне жыцця, кожную радасць. Не дазваляйце дробным непрыемнасцям і засмучэнням захапіць вас. Не растрачвайце сябе на зайздрасць, крыўды і зласлоўе. Толькі тады вы пачняце жыць сапраўдным жыццём і знойдзеце непадробнае шчасце.

Мы часам, наракаючы на скарацечныя цяжкасці, не заўважаем самага важнага, не цэнім тыя дары, якія падносіць нам жыццё.

Сапраўдныя каштоўнасці іншы раз не прыкметныя ў звычайнай мітусні. І часта людзі пачынаюць разумець іх значэнне толькі тады, калі страчваюць іх незваротна.

Галоўная каштоўнасць, за якую мы павінны дзякаваць лёсу, - гэта мір. Мір у нашых сем'ях, у нашай краіне, у адносінах паміж людзьмі.

Адыходзячы год раптоўна і трагічна даказаў нам сапраўдную каштоўнасць міру. Ён паказаў усім нам - любыя жыццёвыя праблемы адыходзяць на задні план, пачынаюць здавацца дробнымі і неістотнымі тады, калі рвуцца снарады, свішчуць кулі і ліецца кроў.

Няма ў чалавека нічога даражэйшага за жыццё. І няма права больш важнага, чым права на жыццё.

Нам трэба разумець і памятаць, на чым грунтуецца сапраўдны мір. І што з'яўляецца галоўнай пагрозай для яго.

Аснова сапраўднага міру - гэта дабрыня, цярпімасць і згода паміж людзьмі. Гэта гатоўнасць дараваць чужыя памылкі, гэта здольнасць у нечым паступацца сваімі інтарэсамі.

Мы на свае вочы пераканаліся, да чаго вядуць унутраны разлад, нянавісць і нецярпімасць. Ад яркіх і рэзкіх лозунгаў, якія сеюць варожасць, адзін крок да расколу грамадства. Ад расколу грамадства адзін крок да ўсеагульнай нянавісці. А ад яе адзін крок да вайны. І калі людзі забываюць аб каштоўнасці міру і згоды, то ўсе гэтыя тры крокі яны робяць у адно імгненне.

Сем дзесяцігоддзяў таму мы заплацілі за мір мільёнамі чалавечых жыццяў. Беларусы добра ведаюць цану міру і па сённяшні дзень захоўваюць асабліва ўсхваляванае стаўленне да яго.

Упэўнены, кожны з нас жадае хутчэйшага аднаўлення міру на зямлі нашых братоў. Гэта шчырае, душэўнае пачуццё нашага народа. Мы, беларусы, жадаем міру ўсім нашым сябрам і суседзям. Мы робім і будзем рабіць усё, што ад нас залежыць, каб зберагчы яго і абараніць.

Мір - гэта аснова жыцця і працвітання. І таму ў надыходзячым 2015 годзе перш за ўсё я жадаю ўсім нам міру - міру ў душы, міру ў сем'ях, міру ў краіне!

Дарагія сябры!

Адыходзячы год падарыў нам нямала прычын для радасці.

Нас стала больш амаль на 7 тысяч чалавек. Дзяржава прыняла разгорнутую праграму па падтрымцы сем'яў з двума, трыма і больш дзецьмі. Гэта наш свядомы курс, які мы прадоўжым і ў далейшым.

Гэты год увойдзе ў нашу гісторыю як час памяці і патрыятызму. Усенароднае святкаванне 70-й гадавіны вызвалення Беларусі ад нямецка-фашысцкіх захопнікаў зноў нагадала нам: не бывае будучыні без мінулага, без сувязі пакаленняў. Наш агульны святы абавязак - клопат аб ветэранах, аб усіх старых, выхаванне на іх прыкладзе сваіх дзяцей і ўнукаў.

Адыходзячы год мы нездарма назвалі Годам гасціннасці.

Рэспубліка Беларусь раскрыла дзверы для ўсіх краін у час чэмпіянату свету па хакеі. Дзясяткі тысяч гасцей з самых розных куткоў планеты адкрылі для сябе Беларусь і беларусаў - утульную, прыгожую, дагледжаную краіну, у якой жыве спагадлівы, ветлівы і добры народ. Упэўнены, што кожны з нашых гасцей павёз з сабой часцінку радасці і цеплыні, падоранай яму беларускай зямлёй.

Усіх нас парадавалі спартсмены на Зімовай Алімпіядзе. Уся краіна як адзін чалавек перажывала за нашых алімпійцаў - і яны не падвялі нас!

Дарагія сябры!

Праз некалькі імгненняў настане 2015-ы год. Год Вялікай Перамогі і Год Моладзі, у якім сімвалічна перасякаюцца наша мінулае і наша будучыня. Год, калі нам з вамі трэба будзе рабіць выбар і вызначаць: як будзем жыць далей, на што спадзявацца, да чаго імкнуцца.

Напэўна, у кожнага народа ёсць той запаветны вобраз, з якім у яго звязана родная зямля.

Для мяне гэта невялікі, але моцны, цёплы і ўтульны дом, дзе ў пашане жывуць старыя, працуюць гаспадары, сталее моладзь і падрастаюць шчаслівыя дзеці.

Беларусь - наш агульны дом, які толькі мы самі можам напоўніць дастаткам і шчасцем.

У гэтыя хвалюючыя мінуты мне хочацца, каб усе беларусы ўсвядомілі, як мы, па сутнасці, цесна звязаны адзін з адным на гэтым невялікім, падораным нам Богам кавалку Зямлі.

У навагоднюю ноч я хачу павіншаваць нашых бацькоў і ўсіх ветэранаў, падзякаваць ім за ўсё, што яны зрабілі для краіны.

Нашых дзіўных жанчын, якія, пароўну падзяляючы з мужчынамі цяжар турбот і клопатаў, застаюцца пяшчотнымі і прыгожымі.

Нашых дзяцей, якія так шчыра вераць нам, дзяцей, якіх мы абавязкова павінны вывесці на правільную дарогу жыцця.

І ўсіх нас, хто сваімі ўмелымі рукамі і майстэрствам, талентам і сілай навуковага азарэння, стойкасцю і мужнасцю ўносіць уклад ва ўмацаванне і працвітанне Беларусі.

Навагодняя ноч - гэта час, калі мы па-асабліваму ўсведамляем, як мы блізкі, як патрэбны адзін аднаму і не можам жыць без любові і падтрымкі родных людзей.

Дык давайце падзякуем адзін аднаму за дапамогу, клопат і ўвагу.

Няхай у кожнай сям'і будзе шмат гэтай радасці і цяпла.

Няхай на нашай зямлі заўсёды пануюць згода, дастатак і мір.

Шчасця вам і здароўя, дарагія землякі.

З Новым годам, Беларусь!

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.