На ўваходзе ў Дзяржаўны літаратурны музей Янкі Купалы гасцей сустракаў калядны кірмаш. Тут можна было набыць самаробнае печыва, мандарыны, кнігі. Прадавалі гэта пераапранутыя ў казачных персанажаў дарослыя і дзеці і супрацоўніцы музея ў народных строях. Кірмаш, апроч усяго, дабрачынны: грошы ад продажу пойдуць на карысць грамадскай арганізацыі «Дзеці. Аўтызм. Бацькі». Прысутных адразу ахоплівае атмасфера цяпла і... казкі. Ідэя гэтай незвычайнай імпрэзы нарадзілася ў вядомай беларускай казачніцы Алены МАСЛА.
«Сёння прэм'ернае мерапрыемства арт-студыі «Казка», — распавяла арганізатарка. — У мяне столькі знаёмых цікавых творчых і дзелавых людзей, якія, апроч таго, што займаюцца сваёй справай, маюць добрыя сэрцы і гатовыя зрабіць крок насустрач іншаму чалавеку! Усе яны аб'ядналіся ў арт-студыю пад дэвізам «Дабро перамагае!».
Першую сваю імпрэзу арт-студыя «Казка» недарэмна прысвяціла дзецям з аўтызмам. Бо яны — не хворыя, а асаблівыя і незвычайныя. А што, як не казка, з'яўляецца правадніком у свет незвычайнага?
«Гэта першае дабрачыннае мерапрыемства ў падтрымку праекта «Давайце вучыцца інклюзіі разам». Слова «інклюзія» датычыцца не толькі адукацыі, гэта паняцце агульнасацыяльнага маштабу, — патлумачыла старшыня міжнароднай дабрачыннай грамадскай арганізацыі «Дзеці. Аўтызм. Бацькі» Таццяна ЯКАЎЛЕВА. — Але для таго, каб уключыць людзей з асаблівасцямі ў звычайнае жыццё, ім неабходна даць адукацыю. За мяжой дзеці з аўтызмам заканчваюць школы, паступаюць у ВНУ, становяцца вядомымі людзьмі. Мы таксама хочам гэтага. Сёння наша арганізацыя прэзентуе свой праект, у межах якога мы навучаем першых беларускіх спецыялістаў. Ужо 19 чалавек атрымалі сертыфікаты паводзінных аналітыкаў-пачаткоўцаў».
Па словах Таццяны Якаўлевай, ужо рэалізуецца паказальны праект на базе мінскай 187-й школы, дзе адкрыты клас, у якім сярод вучняў ёсць дзеці з аўтызмам. Там працуюць запрошаныя замежныя спецыялісты, апроч таго, у розных раёнах сталіцы адкрылася яшчэ некалькі падобных класаў, дзе ўжо айчынныя спецыялісты будуць суправаджаць такіх вучняў.
Падтрымаць праект прыйшлі многія вядомыя і, канешне ж, незвычайныя людзі. Сама вядучая Алена Масла надзела на сябе пояс з магічнымі каменьчыкамі і прапанавала дзецям пачараваць. Першы маленькі чараўнік у касцюме рыцара пацёр каменьчык на поясе — і выклікаў... сапраўдных калядоўшчыкаў, якія прыйшлі з зоркай і Казой. Гэта супрацоўніцы музея зладзілі для гасцей сапраўднае свята. «Тое, што музей адчыніў дзверы для нашай акцыі, сведчыць, што тут захоўваюць традыцыі гасціннасці і дабрачыннасці, закладзеныя ў сваім доме Янкам Купалам і яго жонкай Уладзіславай Францаўнай», — адзначыла Алена Масла.
Усёй залай дзеці і дарослыя з захапленнем «уваскрашалі» Казу, якая ўсё ніяк не хацела падымацца, адорвалі механошу цукеркамі, абаранкамі і грашыма. Усе накалядаваныя сродкі, як і тое, што выручылі з кірмашу, пайшло на рэалізацыю праграмы «Давайце вучыцца інклюзіі разам».
Пасля калядавання і гульняў выступіў Алег Хаменка. Лідар гурта «Палац» — не толькі збіральнік. Менавіта яго голас запісаны на многіх дысках з беларускімі казкамі, некаторыя з якіх музыка распавёў гледачам, а таксама праспяваў для гасцей вечарыны песні. Вялікае ўражанне ад калядных казак-прыпевак пакінуў выступ дзіцячага фальклорнага гурта «Калыханка» пад кіраўніцтвам Ларысы Рыжковай. Апроч таго, перад маленькімі гасцямі і іх бацькамі выступілі паэты Людміла Хейдарава, Навум Гальпяровіч, Віктар Жыбуль, бард Алесь Камоцкі, мастачка Аксана Аракчэева... Выступоўцы атрымлівалі на памяць аб вечарыне своеасаблівыя дыпломы — аформленыя ў рамкі малюнкі, аўтары якіх — дзеці з аўтызмам.
І хоць у традыцыйных беларускіх казках не заўсёды быў шчаслівы фінал, бо яны павінны былі вучыць дзяцей і рыхтаваць іх да жыцця, святочная вечарына ў Купалавым доме не толькі прайшла і завяршылася добра, але і стала пачаткам адной вялікай і светлай казкі, у якой дабро і дапамога бліжняму абавязкова перамогуць.
Дзіяна СЕРАДЗЮК
Даведка
Арт-студыя «Казка» створана ў 2015 годзе. Сваёй дзейнасцю аб'ядноўвае пісьменнікаў, мастакоў, музыкаў, акцёраў, этнографаў і ўсіх-усіх чараўнікоў, якія ў штодзённым жыцці ўмеюць ствараць цуды. Заснавальніца арт-студыі — пісьменніца-казачніца Алена Масла, аўтарка папулярных праектаў «Мілашоўска-Мілашаўскія чытанні» і «Літаратурная масленіца».
МДГА «Дзеці. Аўтызм. Бацькі» створана тры гады таму сем'ямі, якія сутыкнуліся з аўтызмам, дзеля інклюзіі «асаблівых» дзяцей у масавую школу і грамадства. Па ініцыятыве і пры актыўным удзеле бацькоў у Мінску працуе шэсць інтэграваных класаў для дзяцей з аўтызмам, ствараецца першая ў краіне інклюзіўная школа для такіх вучняў.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».