Жыхарка Віцебска з прычыны няспраўнага банкаўскага тэрмінала заплаціла за тавар трайную цану. Непрыемная гісторыя адбылася яшчэ ў лютым. На момант падрыхтоўкі артыкула прайшло больш за тры тыдні. Але, сцвярджае жанчына, грошы, якія былі знятыя з карткі, так і не вярнулі.
— Мы з мужам у той дзень купілі дзве бляшанкі марылкі і лаку вытворчасці вядомай замежнай фірмы для рамонту кватэры. Набывалі ў тым салоне і раней рознае. І ніколі да гэтага ў мяне не было ніякіх прэтэнзій да працы супрацоўнікаў гандлёвага пункта. Спрабавала аплаціць пакупку з дапамогай карткі Белінвестбанка. Я ўвяла пін-код, у выніку ні пацверджання таго, што грошы пералічылі, ні чэка. Работнік крамы сказаў, што ў касавым апараце скончылася стужка. Ён спрабаваў яе замяніць. Паўторная спроба разлічыцца за тавар скончылася няўдала. У выніку заплаціла наяўнымі грашыма — 380 тысяч 100 рублёў. Ура?! Рамонт працягнецца, наперадзе выхадныя, ну што яшчэ трэба для шчасця?.. Калі мне тэрмінова трэба было зняць наяўныя з карткі, заўважыла, што на балансе не хапае 760 200 рублёў. Я адразу зразумела, што гэтая сума — кошт дзвюх няўдалых спроб разлічыцца карткай. Патэлефанавала ў кантакт-цэнтр Белінвестбанка, доўга чакала злучэння з аператарам і... У выніку даведалася, што мне трэба ў панядзелак ісці ў найбліжэйшае аддзяленне банка і пісаць заяву, — вельмі эмацыйна расказвае Вольга Клімовіч, аператар электроннага набору і вёрсткі.
Быццам бы, ну, здараецца. Але ж кліентка далей сутыкнулася з вялікімі праблемамі.
— Думаю, калі б тэрмінал у краме абслугоўваўся Белінвестбанкам, можа, праблема з вяртаннем грошай ужо даўно была вырашана. А так... 9 лютага напісала заяву ў Белінвестбанк. І ў аддзяленні, дзе яе прынялі, сказалі, што паперу разгледзяць на працягу 14 дзён. Гэтага не адбылося. 25 лютага патэлефанавала ў тое ж самае аддзяленне і запытала, куды паскардзіцца на дзеянні супрацоўнікаў банка, — працягвае Вольга.
Жанчыну імгненна пераключылі на супрацоўніка, які ветліва ўсё растлумачыў. Ён падкрэсліў, што ўжо двойчы быў адпраўлены запыт у Пріорбанк, але няма ніякай рэакцыі. Вольга трохі здзівілася, калі пасля таго, як расказала сваю гісторыю на старонцы Белінвестбанка ў сацыяльнай сетцы «Фэйсбук», патэлефанаваў работнік Белінвестбанка. Ён расказаў, што супрацоўнікі банка робяць усе магчымае, каб паскорыць працэс, а мой зварот патрабуе дадатковага разгляду, на што адводзіцца месяц. Мяне абяцалі трымаць у курсе спраў і даць пісьмовы адказ. На жаль, прозвішча супрацоўніка банка не запісала. Ніякага «руху ў працэсе».
Вольга плануе абараняць свае правы. Жанчына ўпэўнена, што заканадаўства аб зваротах парушана...
Па каментарый я звярнуўся ў пракуратуру Віцебскай вобласці
Паводле закона «Аб зваротах грамадзян і юрыдычных асоб», заява або скарга грамадзяніна павінна быць разгледжана не пазней за 15 дзён. А такая, што патрабуе дадатковага вывучэння і праверкі, — не пазней за 1 месяц з дня яе рэгістрацыі ў арганізацыі. Калі патрабуецца больш часу, чым месяц, заяўніку ў 5-дзённы тэрмін з дня падаўжэння тэрміну разгляду звароту паведамляецца аб прычынах... І ў такім выпадку неабходна ўказаць тэрмін, неабходны для працягу разгляду звароту. На неатрыманне адказу на сваю заяву з банка грамадзянка мае права паскардзіцца ў іх вышэйшыя структуры.
У адпаведнасці з Кодэксам аб адміністрацыйных парушэннях, за парушэнні згаданых вышэй тэрмінаў разгляду звароту, прадугледжана накладанне штрафу — ад 4 да 10 базавых велічынь,— паведаміла «Звяздзе» старшы памочнік пракурора Віцебскай вобласці па наглядзе за выкананнем заканадаўства аб зваротах грамадзян Ірына Таўтын.
P.S. Калі артыкул рыхтаваўся да друку, Вольга паведаміла ў карпункт, што грошы — 760 200 рублёў — ёй вярнулі на картку! Жанчына праверыла яе баланс у пятніцу 13 чысла і вельмі абрадавалася! І вер пасля гэтага ў прыкметы і «няўдалыя лічбы»! А вось пісьмовы адказ яна так і не атрымала...
Аляксандр ПУКШАНСКІ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».