Вы тут

Будзем дзяліцца Любоўю


11-31

Фота Анатоля КЛЕШЧУКА

Пасхальнае пасланне мітрапаліта Мінскага і Заслаўскага Паўла, Патрыяршага Экзарха ўсяе Беларусі,  архіпастырам, пастырам, дыяканам, манахам і ўсім верным дзецям Беларускай Праваслаўнай Царквы

Плоццю заснуўшы, як мёртвы,

Ты, Цару і Госпадзі,

на трэці дзень уваскрэс,

узняўшы з тлення Адама

і знішчыўшы смерць.

Пасха нятлення, свету спасенне.

Эксапасціларый Пасхальнага канона.

Узлюбленыя ва Уваскрэслым Госпадзе праасвяшчэнныя браты архіпастыры, пачэсныя прасвітары і дыяканы, набожныя інакі і інакіні, богалюбівая паства Беларускай Праваслаўнай Царквы, дарагія браты і сёстры!

З вялікай радасцю, сапраўдным лікаваннем і бязмернай удзячнасцю Госпаду нашаму Іісусу Хрысту сардэчна віншую ўсіх вас і вашых блізкіх са свяшчэнным і выратавальным святам — Пасхай Гасподняй:

ХРЫСТОС УВАСКРЭС!

11-24

Сёння ўся наша Царква Праваслаўная напоўнена пасхальнай радасцю. Свята Пасхі, паводле слова свяціцеля Епіфанія, епіскапа Кіпрскага, — «галава і вяршыня ўсіх свят», яно для ўсяго свету — «урачыстасць абнаўлення і выратавання».

У светлазарны дзень Пасхі Хрыстовай Царква ў сваіх свяшчэнных песнапеннях называе яе вялікай, той, якая дзверы райскія нам адчыняе, нядзеляй святой, Светлым Хрыстовым Уваскрэсеннем; заклікае зямлю і неба, свет бачны і нябачны святкаваць: «Бо паўстаў Хрыстос — радасць вечная» (трапар 1-й песні Пасхальнага канона).

Пасха — краевугольны камень хрысціянскага светапогляду. Пасха — знаменне ацалення чалавецтва і ачышчэння яго ад граху, гэта вяртанне да крыніцы любові і жыцця — Тварца і Госпада нашага. Уваскрэсеннем Хрыстовым змятаюцца ўсе перашкоды са шляху нашага выратавання, да нас вяртаецца магчымасць стаць узлюбленымі дзецьмі Айца нашага Нябеснага. Уваскрэсеннем Хрыстовым грэх перастае панаваць над чалавекам, а смерць пазбаўляецца свайго смертаноснага джала (1 Кар. 15: 55).

Уваскрэслы Хрыстос Спасіцель стварыў Царкву Сваю і даў ёй асаблівую дабрадатную сілу Святога Духа, сілу, жыватворную для кожнага чалавека, які веруе ў Хрыста. Святая Царква садзейнічае праз Уваскрэсенне Хрыстова стварэнню ў сэрцы кожнага чалавека Царства Божага, каб мы разам з апосталам Паўлам маглі ўсклікнуць: «Ужо не я жыву, а жыве ўва мне Хрыстос» (Гал. 2: 20).

Усе мы, дзеці Царквы Хрыстовай, атрымалі найвялікшы дар Божы — несці бліжнім і дальнім Добрую Вестку пра Уваскрэсенне Хрыстова і пра здзейсненае збаўленне свету ад граху і смерці.

Пасха — гэта свята яднання. «Праца Царквы, — кажа Найсвяцейшы Патрыярх Кірыл, — будзе паспяховай роўна ў той меры, у якой яна зможа знайсці агульную мову са сваім народам. Таму што праблемы, якія перад намі стаяць, паасобку не змогуць вырашыць ні духавенства, ні свецкая ўлада, ні тая ці іншая палітычная партыя, ні той ці іншы паспяховы бізнесмен. Іх мы адолеем толькі разам».

На жаль, не ўсе мы сёння маем такую ісцінную і цвёрдую веру, здольную перамяніць наша асабістае жыццё і жыццё нашых бліжніх. Перамена жыцця ў Хрысце — гэта перамена ўзаемаадносін з самім сабой і з навакольным светам, перамена, здольная прывесці нас да паўнаты быцця. І свята Пасхі дапамагае нам адчуць тую Божую задуму пра нас, якая выяўляецца і ў гісторыі, і ў жыцці кожнага чалавека.

Праасвяшчэнныя архіпастыры, узлюбленыя айцы, браты і сёстры, віншуючы ўсіх вас са святам свят — Светлым Хрыстовым Уваскрэсеннем, малітоўна зычу дабрадатнай дапамогі Божай у вашай адказнай грамадзянскай і царкоўнай працы на славу Святой Праваслаўнай Царквы і нашай зямной Бацькаўшчыны.

Няхай пасхальная ўрачыстасць заўсёды жыве ў душы кожнага з нас і жывіць яе, усяляючы ўпэўненасць і радасць аб Уваскрэслым Госпадзе нашым Іісусе Хрысце. Няхай гэтай бясконцай радасцю будзе насычана ўсё наша жыццё. Прымаючы стваральную любоў Спасіцеля, будзем дзяліцца ёю з тымі, хто пакутуе і церпіць нягоды, хто мае патрэбу ў спагадзе і простай чалавечай увазе, будзем дарыць усім людзям лікаванне ў Хрысце Уваскрэслым і радасць яднання з Ім:

ХРЫСТОС УВАСКРЭС!

САПРАЎДЫ ЎВАСКРЭС ХРЫСТОС!

Павел, Мітрапаліт Мінскі і Заслаўскі, Патрыяршы Экзарх усяе Беларусі

Пасха Хрыстова 2015 года, г. Мінск.

Выбар рэдакцыі

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.

Грамадства

Рэспубліканскі суботнік праходзіць сёння ў Беларусі

Рэспубліканскі суботнік праходзіць сёння ў Беларусі

Мерапрыемства праводзіцца на добраахвотнай аснове.