Вы тут

Профільныя класы — справа добраахвотная


Залічэнне навучэнцаў у профільныя 10-я класы будзе ажыццяўляцца з гэтага года на аснове конкурснага адбору.

— Ніякіх дадатковых экзаменаў мы пакуль для школьнікаў не ўводзім. Адбор будзе праводзіцца па сярэднім бале дакумента аб базавай адукацыі, — паведаміла намеснік міністра адукацыі Раіса СІДАРЭНКА. — У ахвотных вучыцца ў профільных класах сярэдні бал пасведчання павінен быць не ніжэйшы за 6 балаў, а па профільных прадметах адзнакі не могуць быць ніжэйшыя за 7 балаў.

11-26

11-26

 

Паводле слоў Раісы Сідарэнкі, профільныя класы з вывучэннем асобных прадметаў на павышаным узроўні могуць адкрывацца ў любых школах, але гэта не азначае, што бацькі вучняў будуць дыктаваць кіраўніцтву школы свае пажаданні. Рашэнне пра адкрыццё профільных класаў у канкрэтнай установе адукацыі прымае яго кіраўнік.

— Перад сістэмай адукацыі не стаіць задача вярнуць профільныя класы ў тыя ўстановы адукацыі, дзе яны функцыянавалі раней, і няма задачы адкрыць профільныя класы ў кожнай школе ці гімназіі, — падкрэсліла намеснік міністра адукацыі. — Для адкрыцця профільных класаў павінны выконвацца асноўныя ўмовы: гэта наяўнасць неабходнай для вывучэння на павышаным узроўні тых ці іншых прадметаў матэрыяльна-тэхнічнай базы, кадравага саставу (педагогаў, гатовых працаваць у профільных класах) і матываваных навучэнцаў.

Раіса Сідарэнка расказала, што калі ў 2013/2014 навучальным годзе прадметы на павышаным узроўні вывучалі 65% дзесяцікласнікаў, то ў наступным навучальным годзе ў гэтых жа ўстановах адукацыі колькасць вучняў у профільных класах зменшылася да 55%. Магчыма, камусьці аказалася не пад сілу вывучаць прадметы на павышаным узроўні, а хтосьці астаўся незадаволены ўзроўнем выкладання. Тэндэнцыя да змяншэння колькасці навучэнцаў, якія вывучаюць прадметы на павышаным узроўні, найбольш яскрава прасочваецца ў сельскіх установах адукацыі: у 2013/2014 навучальным годзе такіх было 50%, а ў 2014/2015 — толькі 28% (для параўнання: у гарадскіх установах адукацыі іх колькасць зменшылася з 70% да 62%).

Моцная альтэрнатыва

Раіса Сідарэнка падкрэсліла, што галоўны прынцып, які будзе рэалізоўвацца, — гэта паступовае і плаўнае ўкараненне профільнага навучання на старшай ступені школы. Пры ўвядзенні профільнага навучання ў адукацыйным стандарце агульнай сярэдняй адукацыі закладзены два ўзроўні — базавы і павышаны. Гэта значыць, што разам з профільнымі класамі ў школах застануцца на старшай ступені і класы базавага ўзроўню.

Раіса Сідарэнка ўдакладніла, што колькасць гадзін на вывучэнне асобных прадметаў на павышаным узроўні будзе павялічана за кошт частковага пераводу факультатыўных заняткаў у разрад вучэбных. Падрыхтавана таксама прапанова па ўнясенні змяненняў у Кодэкс аб адукацыі: вызнача́ць, ці з'яўляецца субота вучэбным днём для 10-х і 11-х профільных класаў, будзе сама ўстанова адукацыі.

Для вучняў, безумоўна, найбольш зручнай мадэллю было б мультыпрофільнае навучанне. Яна — моцная альтэрнатыва профільнаму. Індывідуальны план дае навучэнцам права выбару любых прадметаў для вывучэння на павышаным узроўні. Акрамя таго, можна засвойваць любімы прадмет у невялікай групе. З аднымі аднагодкамі, напрыклад, вывучаць на павышаным узроўні матэматыку, хімію і беларускую мову, з другімі — на базавым узроўні фізіку і гісторыю і г.д. Праўда, скласці індывідуальны план для кожнага навучэнца — няпростая задача. Асноўная нагрузка кладзецца на намесніка дырэктара па вучэбнай рабоце. Затое мультыпрофільнае навучанне можна ўкараняць як у буйных установах адукацыі, так і ў невялікіх, дзе няма ў паралелі некалькіх класаў.

Змяненні ў пераліку экзаменаў

— Дарэчы, у перспектыве — праз два гады — пералік выпускных экзаменаў для адзінаццацікласнікаў можа змяніцца, таму што сёння, напрыклад, фізіку не здаюць на выхадзе са школы вучні фізіка-матэматычных класаў, а матэматыку здаюць усе: і фізікі, і лірыкі. Змяненні распаўсюдзяцца і на ЦТ: не сакрэт, што з прычыны нізкіх балаў, атрыманых на тэсце па дзяржаўнай мове, здараецца, што за бортам прыёмнай кампаніі застаюцца ўладальнікі высокіх балаў па дакладных навуках. Зараз разглядаюцца розныя варыянты, — дадала Раіса Сідарэнка. — Больш увагі цяпер будзе надавацца і дапрофільнай падрыхтоўцы ў базавай школе. Распрацаваны намі комплекс мерапрыемстваў уключае не толькі інфармаванне навучэнцаў пра асаблівасці арганізацыі адукацыйнага працэсу, але і іх псіхолага-педагагічнае суправаджэнне, правядзенне спецыяльных факультатыўных заняткаў. Будуць выкарыстоўвацца некалькі відаў арганізацыі дапрофільнай падрыхтоўкі — у рамках установы адукацыі, у межах сеткі з некалькіх школ і ў межах сеткі ўстаноў розных тыпаў і відаў (у тым ліку ўключаючы прафесійна-тэхнічныя ўстановы і ўстановы дадатковай адукацыі дзяцей і моладзі).

У рамках факультатыўных заняткаў будуць арганізаваны прафарыентаваныя курсы, такія, як «Уводзіны ў прафесію», «Прафесія — педагог». Для іх правядзення і плануецца выкарыстоўваць базу ПТА і ўстаноў дадатковай адукацыі.

«Беларуская і сусветная культура»

А з наступнага навучальнага года ў школьным раскладзе з'явіцца «стары—новы» прадмет «Айчынная і сусветная мастацкая культура».

— У 2015/2016 навучальным годзе мы плануем увесці яго спачатку ў пятых класах. З наступнага навучальнага года — у пятых і шостых, і так за пяць гадоў увядзём гэты важны для выхавання ўсебакова развітой асобы курс ва ўсіх класах базавай школы. На жаль, сёння можна прывесці мноства прыкладаў зніжэння ўзроўню культуры моладзі, — канстатавала Раіса Сідарэнка. — Беларуская культура будзе вывучацца як частка агульнай сусветнай культуры.

Журналісты пацікавіліся, ці будзе выкладацца зноў на беларускай мове гісторыя Беларусі?

— Ёсць думка, што гэты прадмет павінен выкладацца толькі на беларускай мове. Але ёсць і іншая пазіцыя: установа адукацыі павінна сама вызначыцца, на якой мове выкладаць дзецям гісторыю. Калі мы гвалтам прымусім вывучаць нейкія прадметы на беларускай мове, гэта будзе няправільным падыходам, таму што ў Беларусі дзве дзяржаўныя мовы, — адказала Раіса Сідарэнка.

На думку намесніка міністра, калі гаворка ідзе аб пашырэнні сферы беларускай мовы, то справа не ў выкладанні на ёй таго ці іншага прадмета, а ў агульнай пазіцыі ўстановы адукацыі і педагагічнага калектыву.

— Настаўнікаў гісторыі Беларусі, якія добра валодаюць нацыянальнай мовай, недастаткова. Нядаўна ў Мінску праводзілі апытанне, каб высветліць, колькі рускамоўных школ хочуць вывучаць гісторыю Беларусі на беларускай мове. Іх працэнт досыць вялікі. Мы гатовы адгукнуцца на жаданне бацькоў і вучняў, але гэта трэба рабіць карэктна, з павагай да носьбітаў мовы. Сілавога ўмяшання быць не павінна, — падкрэсліла намеснік міністра адукацыі.

Надзея НІКАЛАЕВА.

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.