Вы тут

Каб не нажыць праблем...


З пачатку вясны ў краіне ўжо зарэгістравана каля 200 выпадкаў укусаў кляшчоў, а такія ўкусы пагражаюць клешчавымі інфекцыямі (барэліёзам і вірусным энцэфалітам). У краіне штогод выяўляецца звыш тысячы выпадкаў хваробы Лайма (клешчавы барэліёз) і звыш ста выпадкаў клешчавога энцэфаліту.

Звычайна клешч чапляецца да адзення або цела чалавека і пачынае шукаць месца для ўкусу. Кляшча можна «прыхапіць» на палявых ці лясных кветках, галінках або іх прынясе на сабе любімы сабака. Заразіцца клешчавым энцэфалітам можна не толькі праз укус, але і праз ужыванне сырога казінага малака, нагадвае энтамолаг Рэспубліканскага цэнтра гігіены, эпідэміялогіі і грамадскага здароўя Святлана ЯШКАВА.

8-21

Як абараніцца?

1. Правільна апранацца, калі ідзеш у лес.

Куртка павінна быць з капюшонам, каўнер кашулі — бліжэй да цела, кашуля — запраўленая ў штаны і з доўгімі рукавамі. Штаны запраўляюць у боты, галаву і шыю закрываюць хусткай або кепкай. Адзенне павінна быць светлым, аднатонным.

2. Праз кожныя 1-2 гадзіны трэба аглядаць усё адзенне. Па вяртанні з лесу абавязкова трэба яшчэ раз агледзець адзенне і цела.

3. Не варта пасвіць коз у лясной зоне, абавязкова трэба аглядаць жывёлу ў пошуку кляшчоў. Малако ўжываць толькі гатаванае (2-3 хвіліны гатавання забіваюць вірус у малацэ).

4. Стаянкі ў лесе неабходна ладзіць на ўчастках без травы, на сухіх, добра прагрэтых сонцам палянах.

5. Варта карыстацца рэпелентамі — апрацоўваць гэтымі сродкамі адкрытыя ўчасткі цела, адзенне.

6. Для прафілактыкі клешчавага энцэфаліту існуе вакцына. Прышчапіцца могуць усе, хто працуе ў месцы прыродных ачагоў інфекцыі (напрыклад, у Нацыянальным парку «Белавежская пушча»), а таксама тыя, хто выязджае ў эндэмічныя па клешчавым энцэфаліце раёны Расіі (Прыўралле, Сібір, Далёкі Усход) і іншых краін. Супраць хваробы Лайма вакцына не распрацавана.

Што рабіць, калі ўкусіў клешч?

Па-першае, як мага хутчэй выдаліць яго. Чым даўжэй клешч знаходзіцца ў вашым целе, тым вышэйшая верагоднасць заражэння. Можна звярнуцца па дапамогу ў траўматалагічны або хірургічны кабінет паліклінікі. Калі такой магчымасці няма, значыць, трэба дзейнічаць самастойна.

Можна ўзяць баваўняную нітку і завязваць у вузел як мага бліжэй да хабатка. Закручваючы канцы ніткі з дапамогай кругавога руху, вымаюць кляшча, пакрысе падцягваючы яго ўгору. Рэзкія рухі недапушчальныя.

Можна ўзяць пінцэт, прыхапіць ім кляшча бліжэй да хабатка і акуратна пачаць вымаць, варочаючы вакол восі ў зручны бок. Звычайна праз 1-3 абароты клешч выцягваецца цалкам. Нельга рабіць гэта рэзка.

Пасля выдалення скуру трэба апрацаваць настойкай ёду або 70-працэнтным спіртам і абавязкова звярнуцца да тэрапеўта, педыятра або інфекцыяніста па месцы жыхарства для атрымання прафілактычнага лячэння і ажыццяўлення медыцынскага назірання.

Святлана БАРЫСЕНКА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.