Вы тут

Знак даверу


У Літве праходзяць Дні культуры Беларусі

Па Літве разам з вясной крочыць прыгожае свята — Дні культуры Беларусі.

Яны традыцыйна праходзяць кожны год, заўсёды маштабна і з вялікім поспехам. У гэтым годзе пачаліся ўнікальнай падзеяй — у Вільнюсе, у Палацы вялікіх князёў літоўскіх адбылося адкрыццё выставы «Сярэдневяковае ўпрыгажэнне. Таямнічы пояс эпохі Вітаўта Вялікага» са збору Нацыянальнага гістарычнага музея Рэспублікі Беларусь. Гэты артэфакт уключаны ў Дзяржаўны спіс гісторыка-культурных каштоўнасцяў Беларусі і ўпершыню дэманструецца за мяжой. Праект рэалізуецца пад патранатам міністра культуры Беларусі Барыса Святлова і міністра культуры Літвы Шарунаса Бірутыса.

[caption id="attachment_83844" align="alignnone" width="600"]Та­ям­ні­чы по­яс  эпо­хі Ві­таў­та Вя­лі­ка­га. Та­ям­ні­чы по­яс
эпо­хі Ві­таў­та Вя­лі­ка­га.[/caption]

«Гэты ўнікальны музейны экспанат з'яўляецца помнікам агульнай гісторыі дзяржаў, тэрыторыі якіх уваходзілі ў склад Вялікага Княства Літоўскага. І тое, што ён экспануецца ў Вільнюсе, — знак вялікага даверу з боку беларускіх калег. Гэта сведчыць пра наступнае: у галіне культуры і навукі мы дасягнулі ўзаемаразумення. Мы можам сумесна аналізаваць наша агульнае мінулае і прызнаць яго гарантам гарманічнага супрацоўніцтва ў будучыні», — сказаў на адкрыцці выставы міністр культуры Літвы Шарунас Бірутыс.

Дні культуры Беларусі ў Літве працягнуцца да верасня 2015 года.

«Кожны год іх праграму мы стараемся напоўніць асаблівымі, запамінальнымі мерапрыемствамі, якія знаёмілі б жыхароў і гасцей Літвы з культурнай спадчынай нашай краіны. Цяперашнія шмат у чым прысвечаны агульнаму гістарычнаму мінуламу — на працягу многіх стагоддзяў мы жылі ў адной дзяржаве», — падкрэсліў пасол Беларусі ў Літве Аляксандр Кароль.

У рамках Дзён культуры запланаваны шмат цікавых мерапрыемстваў. Беларускі акадэмічны музычны тэатр пакажа першы нацыянальны мюзікл «Соф'я Гальшанская». Пастаноўка пройдзе на сцэне Рускага драматычнага тэатра і Клайпедскага дзяржаўнага музычнага тэатра. Канцэртныя праграмы салістаў будуць прадстаўлены ў гарадах Вільнюс, Друскінінкай і Клайпеда, адбудзецца выступленне балетнай трупы тэатра ў Шаўляі.

У Клайпедзе пройдзе традыцыйнае свята беларускай песні, на якім выступяць музычныя калектывы беларускай дыяспары з розных рэгіёнаў Літвы.

Праграмай прадугледжана правядзенне серыі выстаў. Творы беларускага жывапісца-пейзажыста Вітольда Бялыніцкага-Бірулі будуць экспанавацца ў Нацыянальным мастацкім музеі Літвы. У Літаратурным музеі Аляксандра Пушкіна пройдзе выстава «Дзядзька ў Вільні» па матывах паэмы Якуба Коласа «Новая зямля». У вільнюскім Музеі тэатра, музыкі і кіно можна будзе пазнаёміцца з працамі сусветна вядомага мастака з Беларусі Марка Шагала.

Адбудзецца дэманстрацыя фільма беларускага рэжысёра Сяргея Лазніцы «У тумане» ў гарадах Клайпеда і Вільнюс. У бібліятэцы Акадэміі навук Літвы пройдзе прэзентацыя факсімільнага выдання Тураўскага Евангелля — помніка старажытнаславянскага пісьменства ХІ стагоддзя.

У праграму Дзён культуры ўключаны мерапрыемствы, прысвечаныя святкаванню 250-годдзя з дня нараджэння вядомага кампазітара, дыпламата, палітычнага дзеяча Міхала Клеафаса Агінскага, лёс якога быў цесна звязаны з Беларуссю. Запланавана выступленне Дзяржаўнага акадэмічнага сімфанічнага аркестра Рэспублікі Беларусь пад кіраўніцтвам Аляксандра Анісімава на Міжнародным фестывалі класічнай музыкі імя Міхала Агінскага ў Плунге. Акрамя таго, у Вільнюсе пройдзе выстава Дзяржаўнага музея гісторыі тэатральнай і музычнай культуры Беларусі, на якой будуць прадстаўлены архіўныя дакументы Міхала Агінскага.

Вітаўтас ЖЭЙМАНТАС,

уласны карэспандэнт
«Звязды» ў Літве.

Фота аўтара.

Вільнюс.

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.