Вы тут

БАТЭ зноў з Кубкам!


У тыднёвым аглядзе «Звязда» распавядае пра нечаканы разгром салігорскага «Шахцёра», чарговы рэкорд Аліны Талай і трэцюю перамогу Васіля Кірыенкі на этапе «Джыра д`Італія».

1. Разгромам «Шахцёра» скончыўся фінал Кубка Беларусі па футболе. БАТЭ, перайграўшы «гарнякоў» з лікам 4:1, трэці раз стаў уладальнікам Кубка. У вароты Уладзіміра Бушмы забівалі Міхаіл Гардзяйчук, Віталь Радзівонаў, Аляксандр Карніцкі і Мікалай Сігневіч. Аўтар апошняга гола ў вароты «Шахцёра» Мікалай Сігневіч так пракаментаваў дасягненне сваёй каманды: «БАТЭ даўно не заваёўваў Кубка Беларусі, а я наогул ніколі, таму вельмі хацелі перамагчы. У гэтым сезоне мы ўжо гулялі з «Шахцёрам», і абодва разы матч заканчваўся безгалявой нічыёй. Шчыра прызнаюся, была думка, што і гэтая гульня можа атрымацца падобнай на папярэднія. У першым тайме было сапраўды цяжка. У другім згулялі больш востра — гэта і стала ключом да перамогі».

26-17

Некаторыя вынікі 7 тура чэмпіянату Беларусі па футболе:

«Віцебск» — «Дынама-Мінск» 0:0, «Мінск» — «Нёман» 2:0, «Нафтан» — «Славія» 1:1, «Дынама-Брэст» — «Слуцк» 1:1, «Граніт» — «Гомель» 1:0.

Адзначым, што ў турнірнай табліцы дэбютант вышэйшай лігі мікашэвіцкі «Граніт» — на другім месцы.

2. Аліна Талай працягвае паляпшаць уласныя дасягненні. На турніры Сусветнага выкліку, які праходзіў у галандскім Хенгела, Талай перамагла на дыстанцыі 100 метраў з бар'ерамі, паказаўшы час — 12,7 с.

3. Беларускі велагоншчык Васіль Кірыенка, які выступае за каманду «Скай», выйграў 14-ты этап «Джыра д`Італія». Дыстанцыю амаль што ў 60 км наш спартсмен пераадолеў за 1 гадзіну 17 хвілін 52 секунды. Нагадаю, што раней Кірыенка станавіўся пераможцам на італьянскай велашматдзёнцы — у 2008 і 2011 гг.

4. Жаночая зборная Беларусі па валейболе выйшла ў фінальную частку чэмпіяната Еўропы. У другім матчы супраць каманды Украіны наша зборная ўзяла вырашальную другую партыю і па суме дзвюх гульняў (2-3, 3-0) заваявала пуцёўку на кантынентальнае першыство, якое адбудзецца з 26 верасня па 4 кастрычніка ў Бельгіі і Галандыі.

5. Беларускія гімнасткі ўдала выступілі на чацвёртым у сезоне этапе Кубка свету па мастацкай гімнастыцы, які праходзіў у Ташкенце. Трохразовы прызёр сёлетняга чэмпіянату Еўропы Кацярына Галкіна заваявала тры медалі — «серабро» ў практыкаванні з булавамі і дзве «бронзы» ў практыкаваннях з мячом і са стужкай. Дзве ўзнагароды на рахунку нашых «групавічак»: у абодвух фіналах асобных відаў дзяўчаты паказалі трэці вынік. Акрамя гэтага, на подыум юніёрскага турніру пяць разоў узнімаліся нашы маленькія «грацыі» Юлія Ісачанка і Юлія Еўчык!

Дарына ЗАПОЛЬСКАЯ

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.