Агарод


Агарод. Парады гаспадарам. Каб заўсёды быць з ураджаем на сваім прысядзібным надзеле:

* Пажадана, каб падчас пасеву на вас не глядзелі чужыя людзі або суседзі (каб не сурочылі будучы ўраджай);

* Падчас пасадкі або пасеву не пазычайце нікому расаду або насенне і самі не бярыце;

* калі ж давялося аддаць «лішняе», то не аддавайце проста так, няхай вам дадуць крыху грошай — гэта значыць «купяць»;

* старыя людзі раілі: каб не перадаць свой «поспех» на градах (ураджай) суседцы, перш чым аддаць расаду ці насенне, трэба было памыць рукі да гэтага і пасля таго, як аддалі;

* каб быў ураджай на «вяршкі» (на надземную частку расліны), раілі саджаць такія расліны ад маладзіка да поўні; каб ураджай быў на «карэньчыкі» (на падземную частку расліны), саджайце іх ад поўні да маладзіка.

* Бульбу раілі сеяць у тыя дні месяца, лічба якіх была максімальнай, напрыклад 27, 28, 29 красавіка, а не 1, 2 мая.

* Перад тым, як пачаць сеяць бульбу, гаспадар клаў у сваю шапку 2-3 бульбіны і прыгаворваў, каб кожная бульбіна новага ўраджаю была «па галаве».

* Добрыя словы пры пасадцы караняплодаў: «Корань да карашка, а вяршок да вяршка. Няхай моцны будзе той корань. Амін».

* Яшчэ адна важная парада: не пачынайце саджаць або сеяць ад плота (агароджы, мяжы), лепш каб «першай» градкай была тая, што знаходзіцца бліжэй да хаты.

* Каб узыходы не баяліся веснавых замаразкаў, раілі насенне на працягу трох дзён пырскаць вадой з калодзежа.

* Насенне буракоў некаторы час трымалі разам з насеннем іншых, больш «далікатных», раслін, бо лічылі, што такім чынам на іх пяройдуць якасці буракоў, якія не баяцца ніякіх «хвароб», засухі і замаразкаў.

* Перад пасевам сяляне выходзілі рана ў двор і кідалі ў калодзеж медзякі для поспеху. Рабіць гэта трэба было ўпотай, каб засцерагчыся ад дурнога вока. А потым ціхенька шапталі: «Госпадзі, памагі. Будзь агарожай для майго агарода, майго сада, маёй зямлі. Ніхто тую агарожу не пяройдзе, зямліцы не папорціць. Няхай будзе так. Амін».

Аксана Катовіч, Янка Крук

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.