Вы тут

Усе бягуць! А ты?


18-10

Сучасны свет апантаны трэндамі. Мы хочам модна апранацца, слухаць модную музыку, мець моднае хобі. А як вам у такой якасці бег? Сёння бягуць усе — ад «зорак» сцэны і палітыкаў да офісных работнікаў. Таму не дзіўна, што з надыходам цяпла самым папулярным месцам у Студэнцкай вёсцы стаў стадыён. Вечарамі дзясяткі хлопцаў і дзяўчат з розных ВНУ аб'яднаны адной ідэяй — бегчы.

Калі інтэрнэт-трафік на маім ноўтбуку скончыўся чарговы раз, я таксама выйшла на стадыён. Не толькі каб пазаймацца спортам, але і для размовы з іншымі студэнтамі.

Не сакрэт, што атрыманне заліку па фізкультуры з'яўляецца праблемай для многіх. Студэнты чамусьці любяць прагульваць менавіта гэтыя заняткі. Сяброўкі Ганна Пілюцкая і Валерыя Паўшчок (БДМУ, ІІ курс) прызнаюцца, што таксама ходзяць не на ўсе абавязковыя пары па фізкультуры. Затое бегаюць два-тры разы на тыдзень. На іх думку, справа ў псіхалагічным моманце: «Фізкультура — прымусовыя заняткі спортам, а зараз мы бяжым для сябе, няма ніякіх абмежаванняў у дыстанцыі і па часе», — расказвае Ганна. Пазіцыя дзяўчат не зусім зразумелая (як быццам на занятках па фізкультуры яны бягуць не для сябе, а для «таго хлопца»), тым не менш, думаецца, такі падыход усё адно лепшы, чым ніякі.

Яўген Кеўра (БДУІР, ІV курс) бегае адзін і тлумачыць гэта тым, што сябры і суседзі па інтэрнаце аддаюць перавагу баўленню часу за камп'ютарамі. Студэнт рэалістычна глядзіць на жыццё і шчыра прызнаецца: «Хачу скінуць лішнія кілаграмы, якія набраў за зіму. Канікулы ж хутка!»

Алену Пракапенку (юрыдычны каледж БДУ, ІV курс) можна было сустрэць на стадыёне глыбокай восенню і тады, калі снег толькі-толькі пачаў сыходзіць. Акрамя гэтага, дзяўчына рэгулярна наведвае трэнажорную залу. Алена з тых, хто падыходзіць да заняткаў спортам з адказнасцю: не проста бегае, а яшчэ і выконвае комплекс практыкаванняў. У гэтым ёсць і клопат пра здароўе, і жаданне мець стройнае цела. Для заняткаў студэнтка выбірае вечар: «Цемра — сябра моладзі, — жартуе яна. — А калі сур'ёзна, то пасля прабежак увечары я добра сплю».

Іна Салаўёва і Аксана Пішчала (МДЛУ, ІІІ курс) любяць актыўны адпачынак і лічаць, што бег — гэта спосаб добра і карысна правесці час. Для дзяўчат той факт, што на стадыёне шмат людзей, з'яўляецца добрай матывацыяй: «Калі бачыш, як нехта бяжыць, пачынаеш задумвацца: «А чым я горшы? Я таксама магу!»

Бег — адзін з самых папулярных відаў спорту ў свеце. Гэта эфектыўны і ўніверсальны спосаб барацьбы з лішнімі кілаграмамі і дрэнным настроем. Таму, калі ты яшчэ не бегаеш, цяпер самы падыходзячы час, каб пачаць. Бяжы! Будзь у трэндзе!

Ганна Курак, студэнтка ІІІ курса Інстытута
журналістыкі БДУ

Выбар рэдакцыі

Грамадства

Больш за 100 прадпрыемстваў прапанавалі вакансіі ў сталіцы

Больш за 100 прадпрыемстваў прапанавалі вакансіі ў сталіцы

А разам з імі навучанне, сацпакет і нават жыллё.

Эканоміка

Торф, сапрапель і мінеральная вада: якія перспектывы выкарыстання прыродных багаццяў нашай краіны?

Торф, сапрапель і мінеральная вада: якія перспектывы выкарыстання прыродных багаццяў нашай краіны?

Беларусь — адзін з сусветных лідараў у галіне здабычы і глыбокай перапрацоўкі торфу.

Грамадства

Адкрылася турыстычная выстава-кірмаш «Адпачынак-2024»

Адкрылася турыстычная выстава-кірмаш «Адпачынак-2024»

«Мы зацікаўлены, каб да нас прыязджалі».