Вы тут

«Складаныя школы» не для маладых настаўнікаў


Тэмай аднаго з нумароў аналітычнага выдання Teachіng іn Focus, які выпускаецца пад эгідай Арганізацыі эканамічнага супрацоўніцтва і развіцця (АЭСР), стала падтрымка маладых настаўнікаў, якія пачынаюць сваю прафесійную кар'еру.


Як паказалі вынікі міжнароднага даследавання сістэм выкладання і навучання (Teachіng and Learnіng Іnternatіonal Survey, TALІS), маладыя настаўнікі сутыкаюцца з мноствам праблем, у тым ліку і з неабходнасцю падтрымліваць дысцыпліну ў класе. Лічыцца, што сістэма адукацыі імкнецца «выціснуць максімум» з чалавечых рэсурсаў і ставіць перад вопытнымі педагогамі больш складаныя задачы. Аднак, як сведчаць вынікі TALІS, справядлівае і адваротнае сцвярджэнне. У 19 краінах з 27, якія прымалі ўдзел у даследаванні, настаўнікі, якія маюць менш за пяць гадоў стажу работы па спецыяльнасці, значна часцей, чым іх больш дасведчаныя калегі, працуюць у школах, у якіх навучаецца вялікая колькасць навучэнцаў з сацыяльна небяспечных сем'яў, навучэнцаў з асаблівасцямі псіхафізічнага развіцця і школьнікаў, для якіх мова навучання не з'яўляецца роднай.

Высветлілася таксама, што маладыя спецыялісты часцей працуюць у сельскай мясцовасці, дзе школы, як правіла, абмежаваныя ў сваім фінансаванні. Даследаванне паказала, што ацэнка выкладчыкамі эфектыўнасці сваёй працы павышаецца з набыццём вопыту. Сімбіёз няўпэўненасці ў сабе і складаных задач, пастаўленых перад маладым настаўнікам, павялічвае верагоднасць таго, што педагог захоча пакінуць прафесію, нават нягледзячы на падтрымку больш вопытных калег.

Для таго каб пазбегнуць падобных страт у чалавечым капітале, нацыянальныя сістэмы адукацыі павінны імкнуцца да больш збалансаванага размеркавання педагогаў па ўстановах адукацыі ў залежнасці ад іх спецыфікі, а таксама забяспечваць іх дадатковую падтрымку. У многіх краінах прымяняюцца праграмы падтрымкі маладых спецыялістаў — такія, як увядзенне ў пасаду або замацаванне за маладым настаўнікам больш дасведчанага калегі, які дапамагае асвоіцца на новым працоўным месцы. 75% апытаных педагогаў адказалі, што ў пачатку іх кар'еры за імі былі замацаваны куратары, да якіх яны маглі звярнуцца пры ўзнікненні розных праблем.

У большасці краін, якія ўдзельнічаюць у апытанні TALІS, назіраюцца разыходжанні ў адказах настаўнікаў і адміністрацыі школы датычна праграм падтрымкі выкладчыкаў. Так, напрыклад, кіраўнікі сцвярджаюць, што 70% педагогаў з вопытам работы менш за 3 гады ахоплены праграмамі падтрымкі, у той час як толькі 50% з іх пацвердзілі свой удзел у такіх праграмах. Нягледзячы на наяўнасць у многіх краінах праграм падтрымкі, іх мэтавая група адрозніваецца. Напрыклад, падобныя праграмы могуць быць адрасаваныя як усім настаўнікам, так і настаўнікам, якія маюць вопыт працы, але з'яўляюцца навічкамі ў канкрэтнай школе, і настаўнікам, якія толькі пачынаюць сваю кар'еру ў сферы адукацыі.

Даследчыкі ўпэўнены, што ў сістэмах адукацыі ўсіх краін неабходна перагледзець крытэрыі для накіравання маладых настаўнікаў у «складаныя» школы, а таксама ўзмацніць іх прафесійную падтрымку.

Надзея НІКАЛАЕВА

nikalaeva@zviazda.by

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.