Вы тут

Інтэрнаты — без «каменданцкай гадзіны»


Ці могуць студэнты змяніць універсітэцкія парадкі, якія іх не задавальняюць? Амаль год таму група студэнтаў з розных ВНУ краіны распачала кампанію супраць забароны доступу ў студэнцкія інтэрнаты ў начны час. Ініцыятыва атрымала даволі вялікі рэзананс...


Вынікі акцыі студэнтаў задаволілі

— Мае шматлікія сябры, якія позна вярталіся пасля працы, канцэртаў ці іншых мерапрыемстваў, не маглі трапіць у інтэрнат, — распавядае каардынатар кампаніі «Інтэрнаты 24 гадзіны», студэнт БДУ Яўген МІХАСЮК. — І нават калі іх усё ж такі пускалі, то прымянялі потым рознага кшталту пакаранні. Мы сыходзіліся ў думцы, што гэта няправільна.

Менавіта тады і было вырашана распачаць кампанію па адмене «каменданцкай гадзіны». Актывісты пачалі дзейнічаць праз СМІ і сацыяльныя сеткі. Першае ж апытанне, праведзенае ў адной з сетак, паказала, што пераважная большасць студэнтаў незадаволена адсутнасцю кругласутачнага доступу ў інтэрнаты. Для іх аб'яднання была створана адмысловая публічная старонка, і ўжо праз некалькі дзён колькасць яе падпісчыкаў перавысіла тысячу чалавек.

— Для нас гэта быў поспех, — кажа каардынатар кампаніі Марыя СКАРАХОД. — Мы даведаліся, што пытанне абмяркоўвалася на пасяджэнні Грамадскага рэспубліканскага студэнцкага савета пры міністры адукацыі. Тады ж апублікавалі ў суполцы адкрыты зварот да міністра Міхаіла Жураўкова з прапановай арганізаваць канструктыўны дыялог і адмяніць дзеючыя абмежаванні на доступ у студэнцкія інтэрнаты ноччу.

Актывісты звярнуліся і да выказвання намесніка прарэктара па вучэбна-выхаваўчай рабоце і сацыяльных пытаннях БДУ Міхаіла Чарапеннікава, у якім прадстаўнік адміністрацыі заяўляў, што «каменданцкай гадзіны» ў Белдзяржуніверсітэце няма. У выпадку ўзнікнення любых праблем з допускам у інтэрнат намеснік прарэктара раіў звяртацца непасрэдна да яго.

— Як ні дзіўна, але гэта спрацавала, — кажа Яўген Міхасюк. — Мы прапаноўвалі студэнтам БДУ пры ўзнікненні канфліктных сітуацый звязвацца з намі або пісаць Міхаілу Барысавічу. Усё залежала толькі ад таго, наколькі самі студэнты былі гатовы адстойваць свае правы. Было нямала выпадкаў, калі ў тых, на каго яшчэ ноччу сварыліся за позні візіт, наступнай раніцай прасілі прабачэння.

Пасля надышла чарга іншых ВНУ. Рашэннем рэктара «каменданцкая гадзіна» была адмененая ў Беларускім дзяржаўным эканамічным універсітэце. Актывісты і журналісты пераканаліся на практыцы — праблем з доступам у інтэрнаты не было. Пасля афіцыйных запытаў, якія ўдзельнікі кампаніі даслалі ва ўсе вышэйшыя навучальныя ўстановы Беларусі, з 11-ці з іх прыйшлі адказы. У некаторых паведамлялася, што кругласутачны доступ ужо дзейнічае, у некаторых — што «ў правілы ўнутранага распарадку ўнесены адпаведныя змены». Студэнты Беларускага дзяржаўнага ўніверсітэта інфарматыкі і радыёэлектронікі ініцыявалі сустрэчу з рэктарам, падчас якой было прынята рашэнне аб стварэнні працоўнай групы па ўдасканаленні правілаў унутранага распарадку.

— Поспех БДУ і БДЭУ, на маю думку, звязаны ў першую чаргу з тым, што сярод нашых актывістаў было найбольш студэнтаў менавіта з гэтых універсітэтаў, — удакладняе Яўген Міхасюк. — Яны не ленаваліся нешта рабіць на месцах, і гэта давала плён. Галоўная ж праблема — адсутнасць ініцыятывы з боку саміх студэнтаў. Толькі аб'яднаўшыся, можна штосьці змяніць...

Кампанію «Інтэрнат 24 гадзіны» можна лічыць практычна завершанай. Далей справа ўжо за «лакальнымі» актывістамі ў ВНУ.

— Галоўным дасягненнем кампаніі я лічу найперш тую акалічнасць, што ўпершыню за колькі гадоў студэнцкая супольнасць здолела ўзняць праблему, якая яе хвалявала, і пачала шукаць шляхі вырашэння, — працягвае Яўген. — Мы даказалі, што гэта рэальна і што кіраўніцтва ВНУ гатова да дыялогу, калі самі студэнты гэтага хочуць.

Яраслаў ЛЫСКАВЕЦ

lyskavets@zvіazda.by

Фота Сяргея НІКАНОВІЧА

Выбар рэдакцыі

Тэатр

Барыс Цяцёркін: Я аднолькава ўлюбёны і ў тэатр, і ў кіно

Барыс Цяцёркін: Я аднолькава ўлюбёны і ў тэатр, і ў кіно

Артыст Купалаўскага тэатра —  пра дзяцінства, шлях да сцэны і вывучэнне беларускай мовы.

Грамадства

Праўда і міфы аб паўфабрыкатах

Праўда і міфы аб паўфабрыкатах

У Год якасці мы задалі навукоўцам нязручныя пытанні аб тым, што «ўнутры» магазіннай пельмешкі або катлеткі.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Для Блізнятаў надыходзіць тыдзень сур’ёзных змен у асабістым жыцці.

Адукацыя

Беларуская мадэль дашкольнай адукацыі: якасць, даступнасць, адказнасць

Беларуская мадэль дашкольнай адукацыі: якасць, даступнасць, адказнасць

У нашай краіне амаль 90 працэнтаў дзяцей ад года да шасці атрымліваюць дашкольную адукацыю.