Вы тут

Банкі cарыентуюць на «лічбу»


Эксперты Нацбанка ўпэўнены, што новая сістэма ідэнтыфікацыі кліентаў павялічыць канкурэнцыю ў фінансавай сферы і знізіць кошт банкаўскіх паслуг і прадуктаў.

Налета ў кастрычніку ў нашай краіне пачне сваё функцыянаванне міжбанкаўская сістэма ідэнтыфікацыі (МСІ), стварэнне якой прадугледжана Указам кіраўніка дзяржавы ад 1 снежня 2015 года № 478 «Аб развіцці лічбавых банкаўскіх тэхналогій». З пачаткам працы МСІ ў краіне будуць створаны ўмовы для развіцця лічбавай трансфармацыі банкаўскага сектара, пра што паведамляе прэс-служба Нацыянальнага банка Беларусі.

Адзіны «фэйс-кантроль» для кліентаў

Зразумела, што ўкараненне найноўшых лічбавых тэхналогій у банкаўскай сферы — агульнасусветны трэнд, які падтрымліваецца і айчыннымі банкамі. Таму сёння ў свеце ўсё больш банкаўскіх паслуг аказваюцца пры дапамозе дыстанцыйных каналаў і далейшая лічбавая трансфармацыя магчыма толькі з рашэннем пытання па міжбанкаўскай ідэнтыфікацыі кліентаў. Спецыялісты рэгулятара адзначаюць, што менавіта яе адсутнасць з'яўляецца асноўным бар'ерам на шляху доступу фізічных і юрыдычных асоб (кліентаў) да банкаўскіх паслуг і прадуктаў з дапамогай дыстанцыйных (лічбавых) каналаў узаемадзеяння.

Эксперты фінансавай сферы ўпэўнены, што фарміраванне МСІ дазволіць кліентам банкаў, аднойчы прайшоўшы працэдуру ідэнтыфікацыі асабіста ў адным з банкаў, атрымліваць банкаўскае абслугоўванне з дапамогай дыстанцыйных каналаў у любым беларускім банку ў зручны час. Такім чынам, цяпер жыхарам нашай краіны стануць даступны паслугі, якія аказваюцца беларускімі банкамі, незалежна ад наяўнасці ў іх населеных пунктах аддзяленняў банкаў.

Банкаўскія паслугі — не выходзячы з дому

«У якасці тэхналагічнай базы для фарміравання МСІ выступае адзіная разліковая і інфармацыйная прастора Рэспублікі Беларусь (АРІП)», — гаворыцца ў паведамленні Нацбанка. Спецыялістамі рэгулятара ўдакладняецца, што адначасова з прыняццем указа №478 будзе ўдасканалены механізм аказання банкамі паслуг і ажыццяўлення банкаўскіх аперацый.

Таму нараўне з выкарыстаннем электроннага лічбавага подпісу кліент зможа атрымаць банкаўскую паслугу пры дапамозе праграмна-тэхнічных сродкаў і тэхналогій на базе інфармацыі аб першаснай ідэнтыфікацыі без неабходнасці наведвання банкаў. Такое абслугоўванне кліентаў будзе ажыццяўляцца з улікам рызыка-арыентаванага падыходу пры выкананні кожнай канкрэтнай банкаўскай аперацыі.

Разлікі «фізікаў» — праз АРІП

Акрамя таго, гэтым дакументам прадугледжваецца, што «з 1 студзеня 2017 года ўсе юрыдычныя асобы і індывідуальныя прадпрымальнікі, якія ажыццяўляюць работы, рэалізуюць тавары (паслугі) і карыстаюцца паслугамі банкаў і іншых юрыдычных асоб для арганізацыі прыёму плацяжоў на іх карысць, а таксама інтэрнэт-крамы павінны даць магчымасць фізічным асобам праводзіць названыя плацяжы з дапамогай АРІП». Такім чынам, насельніцтву будзе забяспечана магчымасць аплаты работ, тавараў і паслуг у больш чым 13 тысячах пунктах прыёму плацяжоў, у тым ліку і з дапамогай сістэм дыстанцыйнага банкаўскага абслугоўвання, банкаматах і інфакіёсках.

Цяпер менавіта Нацбанк адказвае за фарміраванне і развіццё АРІП, забяспечвае функцыянаванне яго аўтаматызаванай сістэмы АІС «Разлік», а таксама ажыццяўляе нарматыўнае прававое рэгуляванне і метадалагічнае забеспячэнне працэсу прыёму плацяжоў за паслугі і ў бюджэт ад насельніцтва. Аднак такая дзейнасць не адносіцца да кампетэнцыі цэнтральнага банка краіны як дзяржаўнага органа і не адпавядае міжнароднай практыцы.

Таму адным з эфектыўных механізмаў вызвалення цэнтральнага банка ад выканання неўласцівай функцыі выступае стварэнне самастойнага суб'екта гаспадарання з яго удзелам. У сувязі з гэтым указам № 478 прадугледжана стварэнне адкрытага акцыянернага таварыства «Нябанкаўская крэдытна-фінансавая арганізацыя «Адзіная разліковая і інфармацыйная прастора», якое павінна пачаць сваю самастойную дзейнасць налета з 1 красавіка.

Ва ўпраўленні інфармацыі і грамадскіх сувязяў Набанка ўпэўнены, што выкананне нормаў гэтага ўказа паслужыць дадатковым стымулам для павелічэння колькасці карыстальнікаў банкаўскімі паслугамі, а таксама паспрыяе зніжэнню цэн банкаўскіх паслуг і прадуктаў за кошт росту канкурэнцыі і скарачэння выдаткаў банкаў на іх аказанне.

Сяргей КУРКАЧ

kurkасh@zvіаzdа.bу

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Шалям засталося прыкласці зусім няшмат намаганняў, каб жаданая мэта была дасягнута.

Грамадства

Камандзір вядзе за сабой

Камандзір вядзе за сабой

Пяцікурснік Полацкага дзяржаўнага ўніверсітэта імя Е. Полацкай быў удастоены ганаровага звання «Чалавек года Віцебшчыны — 2023».

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні.