Вы тут

Нас аб'яднала «Савяня»



Вольга ПРАНКЕВІЧ, вучаніца 11 класа СШ №4 г. Навагрудка:

«Клуб «Савяня» ў нашай школе працуе з 2010 года, яго наведваюць вучні 5-11 класаў. Папулярнасць інтэлектуальнага руху сярод іх расце з года ў год.

Свая каманда ёсць амаль у кожнай паралелі: «99 рэвалюцый», «Трынітрагліцэрын» (юніёры), «Пазітыў», «Шчасліўчыкі» і іншыя. Члены клуба ўдзельнічаюць не толькі ў школьных турнірах, але і ў гульнях раённага і абласнога ўзроўняў. Каманды нашай школы неаднаразова змагаліся за кубак у сінхронным чэмпіянаце Рэспублікі Беларусь па гульні «Што? Дзе? Калі?» сярод каманд клуба «Наваградскія волаты» на пляцоўцы Навагрудка.

Як кажа кіраўнік клуба Людміла Андрэеўна Бузук, кожны, хто прыходзіць у яго, набывае новых сяброў, магчымасць цікава і з карысцю правесці свой вольны час. «І чым больш дзяцей уступае ў рады «знаўцаў», тым вышэйшы інтэлектуальны патэнцыял нацыі — адзінае багацце краіны, якое нельга набыць за грошы. І дзе б потым ні апынуліся інтэлектуалы, уменне думаць спатрэбіцца ім у любой сітуацыі».


Знайсці сваё прызванне

Святлана ЧЫЖЫК, студэнтка ІІ курса Інстытута журналістыкі БДУ:

«Надзея Аляксандраўна Андроцкая ўсё сваё свядомае жыццё прысвяціла дзіцячаму здароўю: ужо 35 гадоў працуе ў цэнтральнай раённай бальніцы Беразіно дзіцячым урачом і адначасова загадчыкам дзіцячага аддзялення паліклінікі.

Бацькі хлопчыкаў і дзяўчынак, якіх яна лечыць, сцвярджаюць, што менавіта яе трэба лічыць Урачом з вялікай літары. Сама ж жанчына кажа, што ўрач, асабліва педыятр, павінен быць добрым, умець знаходзіць кантакт з дзецьмі.

— Яны адчуваюць дабрыню і падмануць іх проста немагчыма. Нельга і перадаць, як прыемна чуць ад маленькага хворага: «Да пабачэння, я цябе люблю!» Калі маці бачыць добрае стаўленне да яе дзіцяці, то і ёй прыемна, — кажа Надзея Аляксандраўна. — Да нас аднойчы ў аддзяленне прыйшла дзяўчына, якая прызналася, што не любіць дзяцей. Але пры гэтым яна скончыла педыятрычны факультэт медуніверсітэта з «чырвоным дыпломам». Таму я думаю, што трэба адразу вызначыцца, чым вы хочаце займацца ў жыцці, у якой прафесіі вы сябе бачыце. Кожнаму трэба быць на сваім месцы. Галоўнае — паставіць мэту і ісці да яе».


Вандруйце па краіне!

Ганна КУРТАСАВА, вучаніца 11 класа ліцэя №2 г. Мінска:

«Мне вельмі падабаецца, што школьныя настаўнікі возяць нас на экскурсіі па розных кутках краіны.

Лічу гэта вельмі правільным, бо такім чынам кожны з нас становіцца бліжэй да сваёй Радзімы і яе культуры. Такія вандроўкі дапамагаюць нам больш зразумець быт і заняткі людзей, якія жылі да нас і стваралі гісторыю.

Я вельмі люблю ездзіць па Беларусі, даведвацца пра нешта новае, невядомае. Мне падабаюцца ўсе мясціны, дзе давялося пабываць, але самы цікавы куток — Белавежская пушча. Гэта месца — сімвал беларускай прыроды, маленькі куточак цішыні, спакою і прыгажосці з яго непаўторнымі жывёламі і старымі магутнымі дрэвамі. Менавіта Белавежская пушча найлепш характарызуе нашу краіну, як багатую на разнастайныя віды флоры і фаўны. Туды варта зазірнуць!

Наша Радзіма вельмі прыгожая і маляўнічая, таму неабходна захоўваць гэтае багацце для наступных пакаленняў, як тое зрабілі для нас прадзеды. Трэба пакінуць пасля сябе новую гісторыю і захаваць старую, каб і нашы дзеці маглі памятаць мінулае і ствараць будучыню».


Лісты чытаў Сяргей РАСОЛЬКА

Выбар рэдакцыі

Моладзь

Вераніка Цубікава: Натхняюся жаданнем дзяліцца

Вераніка Цубікава: Натхняюся жаданнем дзяліцца

Яе песні займаюць першыя радкі ў музычных чартах краіны, пастаянна гучаць на радыё і тэлебачанні. 

Грамадства

Народнае прадстаўніцтва

Народнае прадстаўніцтва

Вясна гэтага года праходзіць у Беларусі пад знакам Усебеларускага народнага сходу ў яго новым статусе і якасці. 

Грамадства

Хаменка выбраны намеснікам старшыні Савета Рэспублікі восьмага склікання

Хаменка выбраны намеснікам старшыні Савета Рэспублікі восьмага склікання

Ён выбраны таемным галасаваннем з выкарыстаннем бюлетэняў.