У 2016 годзе ў Мінскай вобласці будуць уведзены ў строй тры новыя ўстановы адукацыі — сярэдняя школа і два дзіцячыя садкі.
— 1 верасня павінна адкрыцца сярэдняя школа на 510 месцаў у пасёлку Нарач Мядзельскага раёна, — паведаміла начальнік упраўлення адукацыі Мінаблвыканкама Галіна КАЗАК. — Зараз вядзецца будаўніцтва дзіцячага садка ў вёсцы Ляскоўка, якая адносіцца да Бараўлянскага сельсавета Мінскага раёна. Увод у эксплуатацыю гэтага аб'екта таксама запланаваны на бягучы год. А ў найбліжэйшы час адбудзецца адкрыццё дзіцячага садка на 230 месцаў у Барысаве — па ім ужо падпісаны акт уводу ў эксплуатацыю.
Усяго ў Мінскай вобласці з 2015 да 2020 года было запланавана пабудаваць 12 дзіцячых садкоў. У трох з іх адукацыйны працэс распачаўся яшчэ летась.
«Што датычыцца будаўніцтва ў найбліжэйшай перспектыве сярэдніх школ, то ўпраўленне адукацыі Мінаблвыканкама сфарміравала свае прапановы. Трэба, каб яны прайшлі ўзгадненне і былі зацверджаны аб'ёмы фінансавання. Напрыклад, у гэтым годзе павінны быць выкананы праектныя работы па школе на 720 месцаў у Мінскім раёне, будаўніцтва якой плануецца распачаць у 2017 годзе», — паведаміла Галіна Казак.
Па словах начальніка абласнога ўпраўлення адукацыі, за 2011—2015 гады ў Мінскай вобласці было пабудавана 11 дзіцячых садкоў на 2043 месцы, праведзена рэканструкцыя і перапрафіляванне дзевяці аб'ектаў на 518 месцаў. Таксама ў Мінскім раёне ў 2015 годзе былі адкрыты два прыватныя дзіцячыя садкі. «Усяго на будаўніцтва і развіццё матэрыяльна-тэхнічнай базы ўстаноў адукацыі за 2011—2015 гады накіравана больш як 2 трлн рублёў, — канстатавала Галіна Казак. — За той жа перыяд адкрыта 10 дзіцячых дамоў сямейнага тыпу, а колькасць дзяцей, уладкаваных на сямейныя формы выхавання, вырасла з 80,6% да 85,85%».
Таксама да канца года плануецца завяршыць працу па абсталяванні сістэмамі відэаназірання абсалютна ўсіх устаноў адукацыі ў вобласці. Галіна Казак упэўнена, што з сістэмамі відэаназірання навучальныя ўстановы сталі больш абароненымі. Яна адзначыла, што ў буйных школах сталічнага рэгіёна з колькасцю 700 і больш вучняў з 2013 года, акрамя відэаназірання, усталяваныя яшчэ і электронныя прапускныя сістэмы. У менш буйных школах практыкуюцца толькі сістэмы відэаназірання, што дазваляе кантраляваць сітуацыю як звонку будынка, так і ўсярэдзіне. «Тэхнічныя сродкі дысцыплінуюць не толькі навучэнцаў, але і наведвальнікаў школ», — падкрэсліла начальнік упраўлення.
Да пачатку новага навучальнага года плануецца завяршыць рэалізацыю яшчэ аднаго важнага праекта — па стварэнні безбар'ернага асяроддзя ва ўстановах адукацыі. Для гэтага неабходна абсталяваць яшчэ 25 пандусаў. Летась у школах сталічнага рэгіёна такая праца праводзілася вельмі актыўна — усяго было абсталявана 398 пандусаў. А ў Дзяржынску быў адкрыты дзіцячы сад з безбар'ерным асяроддзем.
Таксама ў 2016 годзе ў Мінскай вобласці плануецца падключыць да праекта «Электронная школа» 112 устаноў адукацыі. Гэты праект будзе рэалізаваны пры падтрымцы Міністэрства адукацыі сумесна з РУП «Белтэлекам». А ў 2017 годзе да праекта далучацца яшчэ 19 устаноў агульнай сярэдняй адукацыі Мінскай вобласці.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
