Вы тут

Хто ў доме гаспадар?


Дазвольце мужчынам быць мужчынамі...


Вы заўважылі?.. Ініцыятыўных (у сэнсе ўзаемаадносін) мужчын у нас становіцца ўсё менш, ініцыятыўных жанчын — усё больш. Што тут прычына, а што вынік, ужо немагчыма вызначыць. Аднак рэальнасць такая, што неўзабаве жанчыны канчаткова перахопяць ініцыятыву ў свае рукі і пачнуць дыктаваць мужчынам правілы гульні. Прадстаўніцы слабага полу і так наступаюць па ўсіх «франтах». Самаўпэўненыя, энергічныя, сексуальныя... Яны спадзяюцца сустрэць дастойны адпор, адэкватнае супраціўленне, урэшце, пачуць даўно забытую фразу, на якой некалі трымаўся ўвесь інстытут шлюбу: «Хто ў доме гаспадар?!» Але... не адчуваюць адпору, не бачаць жадання супраціўляцца... Мужчыны сталі пакорнымі і падатлівымі і без пярэчанняў прымаюць форму кожнай чарговай «пасудзіны», з якой зводзіць іх лёс.

Адной маёй знаёмай моцна пашанцавала. Яшчэ на трэцім курсе медуніверсітэта яна выскачыла замуж за хлопчыка з паралельнага патоку, які яшчэ займаўся бегам і плаваннем, кідаў ці то кап'ё, ці то ядро, а ў дадатак і добра вучыцца паспяваў... Ажаніўшыся, ён стаў узорным сем'янінам, ну проста з вялікай літары «С». Атрымаў другую вышэйшую адукацыю, за лічаныя гады адолеў некалькі кар'ерных прыступак, пабудаваў кватэру... Марына нарадзіла яму дваіх дзяцей, з якімі ён няньчыўся нароўні з ёю, а можа і больш.

Яго ўвага засяродзілася на двух «момантах» — доме і працы, прычым першаму ён надаваў ніколькі не менш увагі, нават праз дваццаць гадоў сумеснага жыцця. За гэты час не было ніводнага выпадку, каб бацька сям'і затрымаўся дзе-небудзь не па справе. Піва з сябрамі? Крый Божа!.. Выезд на карпаратыў без жонкі? Нават не прапаноўвайце! За ўсе гады жыцця — ніводнай нагоды для рэўнасці, ніякіх пабочных імёнаў у запісных кніжках, ніякіх «левых» званкоў на мабільным...

Словам, не мужчына, а казка. І я не стала б так падрабязна засяроджваць на ім увагу, калі б не выпадак... Сустрэла неяк сваю суседку па пад'ездзе Свету, якая таксама ведае Марыну. Слова за слова — і раптам яна пытаецца:

— Ну як там наша Марынка? Яшчэ не кінула свайго «выдатніка»? Я ўжо на другі дзень пасля вяселля застрэлілася б, калі б за такога выйшла! Зануда. Не тое што мой Славік — ніколі не ведаеш, чаго ад яго чакаць! Расказаць, як ён аднойчы хадзіў дыванок выбіваць? Раніцай у суботу з кватэры выйшаў, а вечарам у нядзелю вярнуўся. Я якраз катлеты смажыла, патэльню ў руцэ трымала. І гэтай патэльняй яму па лысіне — трах! — расказвае яна, а ў голасе — такое замілаванне, такая радасць непрыхаваная!.. Света і цяпер чакае мужа. Бо аднойчы ён выйшаў са сваім дыванком — у трэніках і пакаёвых тапачках — і дадому больш не вярнуўся. Не, нічога дрэннага з ім не здарылася — калі, безумоўна, не лічыць бядой «прызямленне» ў іншай кватэры іншага дома, дзе пражывала іншая жанчына з дваімі дзецьмі. Трэцяе нарадзілася ў яе праз год — ужо ад Славіка. Але гэта акалічнасць Свету чамусьці не бянтэжыць. Яна верыць і спадзяецца, і спачувае Марыне, бо ў той не было ў сямейным жыцці ні экстрыму, ні драйву — нічога добрага, карацей.

...Натхнёная гэтай сустрэчай, я вырашыла правесці невялікае апытанне сярод знаёмых жанчын. Папрасіла назваць асноўныя якасці, якія, на іх думку, вылучаюць нашых мужчын з сусветнай, так бы мовіць, супольнасці... Ведаеце, што фігурыравала ў адказах часцей за ўсё? «Абыякавасць», «пафігізм», «празмерная памяркоўнасць». Так-так, аказваецца, тая самая памяркоўнасць, якая заўсёды ўзводзілася ў ступень ледзь ці не нацыянальнага здабытку, у «сцэнах сямейнага жыцця» адыгрывае далёка не станоўчую ролю...

Ёсць у мяне адзін нежанаты прыяцель — яму трыццаць з «хвастом», разумны, сімпатычны, адукаваны. Калі не працуе, то ляжыць пад сваёй машынай, даводзячы да дасканаласці нейкія нябачныя механізмы і паліруючы да бляску ўсё, што можа адпаліраваць. Калі не ляжыць пад машынай, то сядзіць за камп'ютарам, перапісваючыся з цэлым натоўпам жанчын, кожная з якіх прэтэндуе на сваю эксклюзіўнасць у яго жыцці. А ён толькі паспявае ленавата адмахвацца ад прапаноў накшталт: «Давай сустрэнемся, прыгажунчык!», «Прыязджай у госці, столік ужо накрыты!», «Ну, дзе ты там? Чаму не тэлефануеш? Кісуля суму-у-е!..» і г.д.

Ён даўно ўжо не абцяжарвае сябе нейкімі лішнімі рухамі — проста перыядычна робіць ласку сёй-той з «прэтэндэнтак», пагадзіўшыся на сустрэчу. Пры гэтым ніякай ініцыятывы не праяўляе. «А навошта? — паціскае плячыма. — Самі прыйдуць і ўсё дадуць».

Рана ці позна ён хутчэй за ўсё ажэніцца. Напэўна, з самай актыўнай са сваіх сябровак. І па-ранейшаму будзе ляжаць пад машынай ці «вісець» на якім-небудзь сайце знаёмстваў (таму што, каб змяніць звыклы лад жыцця, таксама патрэбна рашучасць). А яна... Спачатку яна будзе радавацца, што перамагла ў гэтай барацьбе за мужчыну, адваявала тое, што хацела. А потым пачне кусаць сябе за локці і скардзіцца сяброўкам, што сямейнае жыццё не ўдалося, бо ў ім не хапае чагосьці такога... такога... Ну, як у герояў амерыканскага фільма «Містар і місіс Сміт». Добрага драйву, карацей... І рэч нават не ў тым, што мужчына, які спіць у яе ложку, далёка не Брэд Піт. Ён паслухмяна і з зайздросным пастаянствам ходзіць выбіваць дыванок і гэтак жа рэгулярна вяртаецца дадому. Ён прадказальны, як прагноз надвор'я ў паўднёвых шыротах. І даўно не купляе сам сабе адзенне і абутак, бо жонка лепш ведае, які фасон і колер яму пасуюць.

...А ёй хочацца змены падзей і фарбаў. Лёгкага вар'яцтва... Маленькіх нечаканасцяў... Яна, зразумела, таксама не «місіс Сміт», але ад шэрасці стамляецца не менш. Тут ужо і да размахвання патэльняй недалёка. Сапраўды, чым не спосаб для падняцца жыццёвага тонусу, калі іншага не дадзена?

Ала Бывалава

Выбар рэдакцыі

Культура

Пошук вечнага жыцця

Пошук вечнага жыцця

Шмат разоў, збочыўшы з брэсцкай трасы, праязджаючы ад Міра да Карэліч, царкву на могілках каля вёскі Загор'е выхопліваеш літаральна за лічаныя секунды.

Спорт

Ірына Курачкіна заваявала серабро Алімпійскіх гульняў!

Ірына Курачкіна заваявала серабро Алімпійскіх гульняў!

 У фінале спаборніцтваў па жаночай барацьбе яна ўступіла японцы Рысака Каваі. 

Грамадства

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Ацэнка дзеянняў урада і давер да апазіцыі — Мусіенка пракаментаваў вынікі сацапытання

Па заказе ЗАТ «Другі нацыянальны тэлеканал» — АНТ з 5 па 21 ліпеня Аналітычны цэнтр ЕсооМ з прыцягненнем фонду «Украінская палітыка» правёў

Палітыка

Літоўцы раскручваюць крывавую хвалю гвалту

Літоўцы раскручваюць крывавую хвалю гвалту

З беларуска-літоўскай граніцы працягваюць паступаць весткі, ад якіх проста кроў стыне ў жылах.