Перспектыўны партнёр у Азіі

Намеснік прэм'ер-міністра Рэспублікі Беларусь Уладзімір Сямашка сустрэўся з міністрам будаўніцтва і гарадскога развіцця Манголіі Зангад Баянсэлэнгэ. 

Бакі абмеркавалі шырокае кола пытанняў двухбаковага супрацоўніцтва, паведамілі ў прэс-службе беларускага ўрада. Як адзначыў падчас сустрэчы Уладзімір Сямашка, Беларусь разглядае Манголію ў якасці перспектыўнага партнёра ў Азіяцкім рэгіёне. “ Аб'ём узаемнага гандлю паміж нашымі краінамі пакуль невялікі (у 2015 годзе тавараабарот склаў 23,2 млн. долараў ЗША (экспарт – $23,1 млн.  ці 106,9 працэнта да ўзроўня 2014 г., імпарт – $0,1 млн. ці 6,5 працэнта да ўзроўня 2014 г.). Гэта значна ніжэй патэнцыялу нашых краін” – адзначыў віцэ-прэм'ер. 

Па яго словах, актывізацыя кантактаў паміж дзяржавамі на ўсіх роўнях фармуе трывалую базу для ўзаемавыгаднай супрацы. Уладзімір Сямашка падкрэсліў, што асабліва актыўна супрацоўніцтва стала развівацца ў апошнія гады. “У 2013 годзе створана сумесная Беларуска-Мангольская камісія па гандлёва-эканамічнаму  супрацоўніцтву. Ужо больш за паўтары гады ў Манголіі дзейнічае дыпламатычнае прадстаўніцтва Беларусі. Адноўлены кантакты на найвышэйшым, высокім і міжведамасным узроўнях, істотна пашырана двухбаковая дамоўна-прававая база, актывізавалася гандлёва-эканамічнае ўзаемадзеянне. Мы зацікаўлены максімальна задзейнічаць пакуль яшчэ не да канца раскрыты патэнцыял двухбаковага супрацоўніцтва. Прыярытэтам для нас з'яўляецца развіццё адносін у гандлёва-эканамічнай сферы” – падкрэсліў Уладзімір Сямашка.

Пры гэтым, па словах намесніка прэм'ер-міністра,  Беларусь гатова не проста прадаваць свае тавары ў Манголію, але і выводзіць адносіны на якасна новы ўзровень, праз удзел у праграмах мадэрнізацыі парка тэхнікі, стварэнне  сумесных прадпрыемстваў у аўтамабілебудаванні, у горнаруднай сферы, комплексным забеспячэнні адпаведных галін эканомікі Манголіі ўсім патрэбным спектрам тэхнікі.