Яслі-сад №50 на 230 месцаў адкрыўся ў адным з новых мікрараёнаў Барысава. Плануецца, што групы будуць цалкам укамплектаваны да пачатку будучага навучальнага года. Цяпер установу наведваюць 90 дзяцей.
— За паўтара года на Міншчыне з'явілася 6 новых дзіцячых садоў, хутка будзем адкрываць яшчэ адзін у вёсцы Бараўляны. А гэта сведчыць пра тое, што краіна жыве стваральнай працай, і бацькі, кожны на сваім рабочым месцы, уносяць лепту ў агульную справу, каб іх дзеці раслі ў годных умовах, — адзначыў падчас цырымоніі адкрыцця старшыня Мінаблвыканкама Сямён ШАПІРА.
Сімвалічны ключ ад новага дзіцячага сада ўручыў маленькім навасёлам генеральны дырэктар ордэна Кастрычніцкай рэвалюцыі будтрэста №3 горада Салігорска Сяргей Ярмалінскі. Менавіта гэтае прадпрыемства ў сціслыя тэрміны пабудавала аб'ект: конкурс на яго ўзвядзенне быў выйграны ў чэрвені мінулага года.
Новая ўстанова атрымала неафіцыйную назву «Кветачка сяміколерная». Яе эмблемай стала кветка з сямю пялёсткамі. Кожны з іх увасабляе асобны кірунак выхавання гарманічна развітой асобы. Сапраўды, дзіця — гэта пяшчотны парастак кветкі, якая яшчэ не распусцілася. А ў надзейных руках педагога яна квітнее і прыносіць адпаведныя плады.
У яслях-садзе працуюць 12 груп, у тым ліку 4 ясельныя, якія будуць наведваць малыя ад 2 да 3 гадоў. Сярод выхаванцаў і Валерыя, якой хутка споўніцца два з паловай гады.
— Мы жывём разам з бацькамі ў гэтым раёне. І, вядома, задумваліся, куды ўладкаваць дачку, — кажа яе маці Кацярына Савіч. — А тут усе праблемы адпалі. Вельмі зручна як для бацькоў, так і для малых: не трэба рана будзіць, некуды везці дзіця. Радуе і тое, што гэты садок звышсучасны, створаны ўсе ўмовы як для фізічнага, так і духоўнага развіцця дзяцей.
Тут прадугледжаны асобныя гульнявыя пляцоўкі для кожнай групы, а таксама асобнае памяшканне. У садку ёсць басейн, спартыўная, трэнажорная, музычная залы, сенсорны пакой. Бацькі лічаць, што гэта асабліва важна: сучасныя дзеці шмат часу бавяць за камп'ютарам, ім неабходна часцей расслабляцца. А дапамогуць ім у гэтым прафесіянальныя псіхолагі, псіхатэрапеўты.
— Адкрыццё дзіцячага сада ў новым раёне, дзе жыве нямала маладых, шматдзетных сем'яў, дазваляе вырашыць праблему крокавай даступнасці ўстаноў дашкольнай адукацыі, — канстатаваў старшыня Барысаўскага райвыканкама Уладзімір Мірановіч. — Акрамя таго, тут прапаноўваецца 65 новых рабочых месцаў, у тым ліку 29 непасрэдна для педагогаў горада.
У тэму
Галіна КАЗАК, начальнік упраўлення адукацыі Мінаблвыканкама:
— За апошнія пяць гадоў на Міншчыне адкрылася 12 дзіцячых дашкольных устаноў на 2730 месцаў. Акрамя таго, пачынаючы з 2011-га 9 дашкольных устаноў створаны за кошт рэканструкцыі і вяртання памяшканняў, якія выкарыстоўваліся разнастайнымі службамі, арганізацыямі, ведамствамі. Вельмі актыўна пачалі развівацца формы прыватных дзіцячых садоў. Летась у Мінскім раёне створаны два такія: у аграгарадку Сеніца на 40 месцаў і ў Бараўлянах на 24 месцы. Сёлета будзе пабудаваны дзіцячы сад у вёсцы Ляскоўка Мінскага раёна.
Што тычыцца дашкольных дзіцячых устаноў крокавай даступнасці, то тут яшчэ існуе праблема ў мікрараёнах-новабудоўлях некаторых райцэнтраў. У прыватнасці, такія цяжкасці адчуваюцца ў Стоўбцах, Маладзечне, Жодзіне. Там запраектавана будаўніцтва новых устаноў, але гэта перспектыва наступнага года.
Дадам, што дзіцячыя сады настолькі запатрабаваны ў Мінскай вобласці, што кожны год мы прырастаем па колькасці дзяцей у іх на 500-700 чалавек. На цяперашні момант 660 дашкольных устаноў наведваюць 58 118 дзяцей.
Фота Яўгена ПЯСЕЦКАГА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
