Беларускія традыцыі не толькі каштоўныя, але і модныя: пра гэта сведчыць тое, што ў Мінску ўжо другі раз пройдзе фестываль-конкурс беларускай моды і мастацтва «Этна Стыль». «Мы хочам падтрымліваць нашы гістарычныя карані», — сказала на прысвечанай мерапрыемству прэс-канферэнцыі «Міс Беларусь-2008» Вольга ХІЖЫНКОВА.
У конкурсе, які будзе праходзіць 21—23 красавіка ў Нацыянальнай школе прыгажосці, могуць прымаць удзел як вядомыя дызайнеры, так і пачаткоўцы. Будзе некалькі намінацый: «Майстар» (дызайнерскія калекцыі, якія пакажуць уплыў народнай культуры на сучасны касцюм), «Творчы пачын» (конкурс для маладых дызайнераў), «Этна-эксперымент» (конкурс індывідуальнага этна-вобраза), а таксама намінацыя для фатографаў «Этна-фота-арт». Пераможцы атрымаюць магчымасць прадставіць свае касцюмы на міжнародных конкурсах, у тым ліку на «Міс Свету».
Арганізатары ўжо атрымалі больш за два дзясяткі заявак ад дызайнераў, сярод іх, апроч айчынных, прадстаўнікі з Расіі і Украіны, паведаміла дырэктар мадэльнага агенцтва belarusmodels.by Нацыянальнай школы прыгажосці Вольга Зямскова. Што прапануюць сёлета творцы?
«Мой асноўны прынцып — выкарыстанне ручной вышыўкі. Тканіны, вядома, беларускія, свае (лён, бавоўна). Пляценне, аксесуары ручной работы. Усё прыгожа, этнічна, па-беларуску!» — падзялілася дызайнер Дзіна ЛАВЕЙКІНА.
Яе калега Анастасія ФАЛЬКОВІЧ шые як жаночае, так і мужчынскае, і дзіцячае адзенне і адзначае, што ўсё больш кліентаў хочуць замовіць рэчы ў нацыянальнай стылістыцы. На конкурсе ж дызайнер прадставіць калекцыю «Шляхта», у якой пакажа раскошу беларускай культуры.
На фестывалі «Этна Стыль» сваю першую маладзёжную калекцыю прадставіць і дачка вядомага дызайнера Івана Айплатава Юлія АЙПЛАТАВА. «Мяне вельмі ўразіла, што на гэтай невялікай тэрыторыі існуе такая разнастайнасць адзення», — выказала яна сваё захапленне беларускімі традыцыйнымі строямі.
Калекцыі журы будзе ацэньваць за арыгінальнасць трактоўкі нацыянальных матываў, адпаведнасць вобраза заяўленай намінацыі, цэласнасць, тэхналогію і арыгінальныя прыёмы дэманстрацыі касцюма.
Стыліст фестывалю Андрэй Катлабай зазначыў, што ў Беларусі дастаткова вольны рынак для такога кшталту імпрэз. З ім пагадзілася і рамесніца Маргарыта Аніперава, якая лічыць, што пакуль у нас малавата такіх мерапрыемстваў і нашай таленавітай моладзі іх не хапае.
Падчас фестывалю 22 красавіка адбудзецца шоу-праграма, а завершыць фестываль этна-кірмаш, дзе можна будзе пазнаёміцца з дызайнерамі, набыць іх вырабы ці зрабіць заказ. Ёсць падставы думаць, што ахвотных будзе шмат: этнічныя матывы ў адзенні цяпер вельмі папулярныя, асабліва сярод моладзі. У масавага нашэння арнаментаў дзе трэба і дзе не трэба ёсць як праціўнікі, так і прыхільнікі. Для дызайнераў жа гэта спрэчнае пытанне, прызналася Анастасія Фальковіч.
«Арнамент нясе сэнсавую нагрузку. Але калі мне, як творцу, падабаецца арнамент, я яго буду выкарыстоўваць і не адмоўлюся ад сваёй ідэі, калі гэта прыгожа і людзям падабаецца. У беларускай сімволіцы амаль няма арнаментаў, якія нельга выкарыстоўваць».
Зрэшты, беларускі стыль вызначаюць не толькі арнаменты, але і сілуэты, лініі, колеры, тканіны, ды і ўвесь вобраз цалкам. І ўсё ж тыя, хто стварае для нас модныя трэнды, у адзін голас заяўляюць: «Мода мяняецца, а стыль застаецца». Заўсёды актуальнымі «аксесуарамі» для жанчыны будуць лёгкасць і натуральная прыгажосць. Але напрыканцы прафесіяналы ўсё ж падзяліліся, што ў сёлетнім вяснова-летнім сезоне модныя пастэльныя колеры і шырокія свабодныя сілуэты. Матайце на вус, прыгажуні!
Фота Яўгена ПЯСЕЦКАГА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
