Пераважная большасць студэнтаў і навучэнцаў яшчэ толькі рыхтуюцца да здачы экзаменаў, але для некаторых з іх ужо пачынаецца новы семестр — працоўны. Урачыстая цырымонія яго афіцыйнага адкрыцця адбылася ўчора на плошчы Дзяржаўнага сцяга. Удзел у ёй узялі каля 800 байцоў, камандзіраў і камісараў штабоў зводных абласных і Мінскага гарадскога студэнцкіх атрадаў. Цэнтральным момантам цырымоніі стала ўручэнне студатрадам пуцёвак для працы на сацыяльна значных аб'ектах.
— Сёлета мы традыцыйна плануем адправіць нашых «байцоў» і ў Расійскую Федэрацыю, — расказаў журналістам другі сакратар ЦК Беларускага рэспубліканскага саюза моладзі Сяргей КЛІШЭВІЧ. — Гэта, у першую чаргу, будуць педагогі і будаўнікі. Адпаведна, у Беларусь прыедуць расійскія студэнты, каб працаваць на нашых аб'ектах, у тым ліку і на Усебеларускай маладзёжнай будоўлі ў Астраўцы.
Галоўнай адметнасцю гэтага года стане з'яўленне археалагічнага атрада — ён будзе працаваць на раскопках старажытнага беларускага паселішча ў вёсцы Горваль Рэчыцкага раёна. Акрамя гэтага, саюз моладзі плануе сумесна з МНС і Мінсельгасхарчам стварыць студатрад, які будзе займацца аховай гаспадарак ад пажараў.
— Для нас стала добрай традыцыяй урачыста адкрываць летні працоўны семестр, — сказаў падчас цырымоніі першы сакратар ЦК БРСМ Андрэй БЕЛЯКОЎ. — Глыбока сімвалічна, што сённяшняе мерапрыемства адбываецца напярэдадні святога для кожнага беларуса Дня Перамогі. Летась менавіта БРСМ праявіў ініцыятыву і даў старт праекту «Кветкі Вялікай Перамогі», які сёлета стаў агульнанацыянальным. Вельмі прыемна, што беларускія студатрадаўцы робяць свой унёсак у будаўніцтва нашай краіны.
Для пераважнай большасці студатрадаўцаў гэты працоўны семестр будзе ўжо не першым. «Летась я працаваў у студэнцкім атрадзе «Ліцэіст», — дзеліцца Павел РАМАНОВІЧ, навучэнец Валожынскага сельскагаспадарчага прафесійнага ліцэя. — Мы займаліся ўборкай збожжа ў адной з гаспадарак раёна. Дарэчы, нядрэнна зарабілі — без малага пяць мільёнаў. Але галоўнае — весела правялі час з новымі сябрамі. Абяцаюць, што сёлета з'явяцца новыя віды атрадаў, таму абавязкова знайду для сябе што-небудзь цікавае».
Вядома, ёсць і тыя, хто сёлета дэбютуе як «баец». Сярод іх, напрыклад, навучэнка Гомельскага педагагічнага каледжа імя Л.С. Выгоцкага Юлія БУДЗЬКО. «Далучыцца да студатрадаўскага руху мяне падштурхнула цяга да новых знаёмстваў — я вельмі камунікабельны чалавек, а ў атрадзе можна знайсці новых сяброў, — кажа дзяўчына. — Акрамя таго, я шчыра люблю сваю прафесію, таму працаваць у педатрадзе будзе для мяне за шчасце».
Фота Сяргея НІКАНОВІЧА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
