Вы тут

«Я выконваў сваю працу»


Да гэтага мая жыхар Мінска Уладзіслаў Базоўскі спакойна нёс службу ў Цэнтральным аддзеле Дэпартамента аховы сталіцы і нават не думаў, што яго імя неўзабаве з'явіцца ў цэнтральных газетах і на інфармацыйных парталах краіны.


У адзін з будных дзён, амаль апоўначы, Уладзіслаў падчас сутачнага дзяжурства паехаў на праверку да вартавога паста «Заслаўскае вадасховішча». Усё мусіла прайсці гладка, але адбылося нечаканае. Калі Базоўскі выйшаў з машыны, да яго падбег расхваляваны мужчына і сказаў, што ў ваду з парапета скокнуў чалавек. Пра тое, што было далей, расказвае сам Уладзіслаў:

— Я прабег метраў сто па мосце і ўбачыў у вадзе, прыблізна ў трох метрах ад берага, чалавека. Доўга не думаў і адразу кінуўся яго ратаваць. Гэта была жанчына.

Калі выцягнуў яе з вады і прывёў у прытомнасць, паспрабаваў выклікаць «хуткую дапамогу». Аднак тэлефон у кішэні прамок і ўжо не працаваў. Тады спытаў, ці зможа яна сама рухацца. Жанчына адказала станоўча, і мы пакрысе пайшлі да вартавога паста. Ужо там пачалі яе адаграваць і выклікалі медыкаў.

— Калі не памыляюся, жанчына на той момант знаходзілася ў вышуку.

— Так. Толькі пра тое, што яна збегла з бальніцы, мы даведаліся ўжо пазней, калі аб гэтым нам паведаміў участковы інспектар. Ведаю, што пасля яна некалькі дзён ляжала ў рэанімацыі, а цяпер знаходзіцца на рэабілітацыі. На днях яе павінны выпісаць.

— Такіх неардынарных выпадкаў у вашай міліцэйскай біяграфіі раней не было?

— Усякага хапала, але падобнае са мной за шэсць гадоў службы ў Дэпартаменце аховы здарылася ўпершыню. Усё ж такі, акрамя патрулявання, мы шмат увагі надаём ахове аб'ектаў усіх формаў уласнасці грамадзян, устаноў і арганізацый. Калі спрацоўвае «трывожная кнопка», мы адразу адпраўляемся на выклік. Едзем таксама і на іншыя паведамленні грамадзян. Мае галоўныя задачы — агляд асабістага складу, забеспячэнне баявой гатоўнасці ўзвода. У той дзень на Мінскім моры прыйшлося займацца зусім іншым.

— На наступны дзень пасля выратавання пра вас шмат пісалі ў інтэрнэце. Ці адчулі тады, што здейснілі значны ўчынак?

— Для мяне гэта была праца, абавязак, які мусіў бы выканаць любы чалавек. Паўтаруся, я доўга не думаў і адразу скокнуў у ваду. Праўда, праз пэўны час я пачаў аналізаваць сітуацыю, прыйшоў да таго, што ўсё магло завяршыцца іначай. Было цёмна, ішоў дождж. З таго бетоннага парапета можна было няўдала скокнуць... Але добра, што скончылася так, як скончылася.

— Чуў, што нядаўна вы атрымалі падзяку — за тое, што знайшлі хлопчыка, які згубіўся.

— Гэта адбылося літаральна на гэтых выхадных. Я якраз дзяжурыў, і да мяне звярнулася жанчына, сказала, што 30-40 хвілін таму згубіла хлопчыка. Маўляў, выйшла з крамы, на некалькі хвілін адцягнула ўвагу на старэйшага сына, азірнулася, а малога ўжо няма. Мы адразу ўдакладнілі даныя, паведамілі іх у раённы аддзел унутраных спраў. Для дапамогі ў пошуках у парк Перамогі адправілі тры экіпажы. Я ўдакладніў у жанчыны, дзе яна жыве. Аказалася, што недалёка ад парку, часта з сынам любяць гуляць у садку. Мы паехалі туды і каля гэтага садка знайшлі дзіця. У хлопчыка прыроджаная хвароба. Ён бы нікому пра сябе сам не расказаў.

— Дарэчы, Уладзіслаў, як вы трапілі ў міліцыю?

— У дэпартаменце служу з сакавіка 2009 года. Прайшоў праз вучэбны цэнтр, служыў звычайным міліцыянерам. А пасля таго, як адвучыўся ў Магілёўскім вышэйшым каледжы МУС, атрымаў афіцэрскае званне, узначаліў узвод. Чаму захацеў стаць міліцыянерам? У мяне бацька быў супрацоўнікам праваахоўных органаў. Гледзячы на яго, заўжды хацеў насіць пагоны. Цяпер тата на пенсіі, а да яе працаваў старшым навуковым супрацоўнікам у Акадэміі МУС.

— Чым захапляецеся ў вольны ад працы час?

— Люблю вудзіць рыбу. Але тыя мясціны, дзе прыйшлося ратаваць жанчыну, я не ведаў. Рыбачыць люблю ездзіць падалей ад Мінска.

taras@zviazda.by

Выбар рэдакцыі

Грамадства

Як абараніцца ад махляроў у сферы сучасных тэхналогій

Як абараніцца ад махляроў у сферы сучасных тэхналогій

Фішынг, вішынг — два кіты кіберзлачыннасці

Грамадства

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

Арктычнае ўварванне на змену цёпламу паветру. Калі чакаць першы снег? Прагноз ад Дзмітрыя Рабава

З чым звязана такая восеньская зменлівасць надвор’я і калі чакаць першы снег.