Вы тут

Здароўе з паветра


...Па суботах фізкультура ва ўніверсітэце звычайна праходзіла ў басейне. 25-метровыя дарожкі ў гэты ранішні час былі амаль цалкам у распараджэнні студэнтаў (акрамя нас, паплаваць прыходзілі яшчэ некалькі выкладчыкаў). Для тых, хто няўпэўнена адчуваў сябе на вадзе, былі пенапластавыя дошкі, для тых, хто хацеў засвоіць нешта большае, чым стыль «па-сабачаму», — трэнеры, якія не стамляліся прыдумваць новыя заданні. Ідэальна.


Але ажыятажу не назіралася. Толькі калі займаліся першакурсніцы — для іх наведванне басейна было абавязковай умовай для заліку. Старэйшых студэнтак прыходзіла вельмі мала (хоць пару на вадзе залічвалі за дзве). Прытым што частка з іх пастаянна шукала спосабы пахудзець, самы відавочны і даступны з іх чамусьці ігнаравалі.

«Няма часу, грошай, сіл», — якія «адмазкі» вы яшчэ чулі? (Не кажу пра тых, хто спортам займацца не хоча ўвогуле.) Так апраўдваюцца дзяўчаты, якія на словах толькі і чакаюць магчымасці пабегчы ў залу. І не заўважаюць, колькі тых магчымасцяў насамрэч ёсць.

Цяпер у сталічных парках распачаліся бясплатныя заняткі ёгай. Кожную нядзелю (вядома, калі надвор'е не перашкодзіць) аматараў усходняй гімнастыкі — і прафесіяналаў, і навічкоў — запрашаюць на зялёныя пляцоўкі Мінска: у паркі Перамогі, Цівалі, 40-годдзя Кастрычніка і іншыя. З сабой просяць захапіць дыванок для ёгі. Так, прымусіць сябе рана прачнуцца ў выхадныя, каб ужо ў 9 гадзін быць на трэніроўцы, — тая яшчэ задачка. Але, калі спаць да абеду, вылучыць час на спорт будзе яшчэ складаней.

Бясплатныя трэніроўкі праходзяць і ў парку «Dreamland». Па суботах у 11 гадзін прапануюць выпрабаваць на сабе розныя фітнес-напрамкі. Напрыклад, у наступную суботу будзе FІZІKA. Не, школьныя задачкі рашаць не трэба. Гэта напрамак, які аб'ядноўвае ў сабе некалькі фітнес-методык і дапамагае развіваць вынослівасць і гнуткасць. Карацей, лепш адзін раз паспрабаваць, чым сто — пачуць.

Любіце бегаць, але няма кампаніі? Калі ласка! Суполка MіnskRun (больш за 70 чалавек) і пяцікіламетровая дыстанцыя (у ляску!) чакаюць вас кожную суботу а 10-й гадзіне раніцы. Зноў жа бясплатна. Больш за тое, каманда валанцёраў, якая арганізуе гэтыя спартыўныя сустрэчы, прапануе яшчэ і кожны раз пасля прабежкі фіксаваць свой вынік на сайце і сачыць за прагрэсам. Дробязь, а прыемна.

Не кажу ўжо пра шматлікія акцыі ў фітнес-клубах. Толькі паспявай запісвацца.

Дзіўная рэч: усе так імкнуцца пахудзець да лета, што не заўважаюць, што лета само па сабе — цудоўная магчымасць прывесці сябе ў форму. Абставіны — спякотнае надвор'е — вымушаюць есці менш, а рухацца больш. Сяброўка нядаўна пахвалілася: нарэшце скінула злашчасныя пяць кілаграмаў. «Каб не лета, напэўна, не пратрымалася б на той дыеце. А так нават па мучным і салодкім не надта сумую: гародніны і садавіны хапае».

Не думайце, што магчымасці прапануе толькі сталіца. Як па мне, у вёсцы ці ў невялікім горадзе ёсць усе ўмовы, каб займацца спортам. Навошта ісці ў трэнажорку, калі ёсць сапраўдны веласіпед і кіламетры сцежак уздоўж лесу ці рэчкі? А замест басейна — возера? У бабуліным двары, памятаю, нават валейбольную пляцоўку рабілі. Нацягвалі вяроўку паміж платамі двух агародаў — і давай. Галоўнае, не трапіць мячом па агурках.

Які сэнс скардзіцца сяброўкам і чарговы раз расказваць, чаму вы не можаце ўзяцца за сябе? Пахудзець гэта яшчэ нікому не дапамагала. Чым апраўдвацца (у першую чаргу перад сабой), лепш перасіліць сваю ляноту і нарэшце зрабіць штосьці з даўно складзенага плана дзеянняў. Неабавязкова адразу выпраўляцца на пяцікіламетровую дыстанцыю, каб потым тыдзень адыходзіць ад той прабежкі і з жахам думаць пра наступную. Здаровы лад жыцця пачынаецца з дробязяў, час для якіх можна знайсці кожны дзень.

Наталля Лубнеўская

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».