Цішыню калідораў у радзільным доме Дзяржынскай цэнтральнай раённай бальніцы час ад часу перарываюць звонкія галасы нованароджаных. Іх маці знаходзяцца ў пастаянным кантакце з малымі і пад кантролем медперсаналу. Днямі ў радзільню завіталі асаблівыя госці — прадстаўнікі Мінскага абласнога камітэта Беларускага рэспубліканскага саюза моладзі. Іх сустракаў загадчык акушэрскага аддзялення Валерый Лебядзеўскі.
Распашонка з беларускім арнаментам стала першым падарункам для нованароджанай Паліны і яе маці Таццяны. Такім арыгінальным і незвычайным спосабам актывісты павіншавалі маці і немаўлят адразу з некалькімі ўрачыстымі падзеямі.
— Акцыя «Падары нованароджанаму вышыванку» была прымеркавана да свята «Дзень вышыванкі», якое прайшло 2 ліпеня. А 3 ліпеня Дзяржынск адзначыў не толькі Дзень Незалежнасці, але і свой 870-гадовы юбілей, — канстатаваў першы сакратар Мінскага абласнога Камітэта грамадскай арганізацыі «БРСМ» Дзмітрый Варанюк.
Падарункі з нацыянальным арнаментам атрымалі двое немаўлят. Іх матулям былі ўручаны кветкі.
Спакон веку вышываная сарочка лічылася не толькі адзеннем, але і абярэгам — сімвалам шчасця, здароўя, прыгажосці і родавай памяці. І сёння ў Мінскай вобласці і ва ўсіх рэгіёнах краіны традыцыі вырабу вышыванак не страчаны. Болей за тое, яны беражліва захоўваюцца.
— Няхай гэтыя невялікія падарункі саграваюць вас цеплынёй, — сказаў Дзмітрый Варанюк. — Я рады, што мы можам падзяліцца з маладымі мамамі і іх малымі часцінкай свайго сэрца.
Дадам, дабрачынная акцыя «Падары нованароджанаму вышыванку» з поспехам прайшла ў многіх гарадах Міншчыны.
— Гэта вельмі міла і патрыятычна. Мой сынок нарадзіўся 26 чэрвеня, у Дзень моладзі, што таксама сімвалічна. Распашонку мы абавязкова будзем надзяваць на ўсе значныя святы, — падзялілася ўражаннямі Вольга. — Дзякуй за такі цудоўны падарунак.
У 2015 годзе ў Дзяржынскім радзільным доме на свет з'явіліся 825 дзяцей. Як сцвярджаюць спецыялісты, сёлета іх будзе больш.
Ларыса КОРШУН
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.