Пра перамогу баскетбалістак над гаспадынямі турніру, нападзенне на журналістаў і выступленне Кацярыны Карстэн на сёмых у кар'еры Гульнях — у штодзённым дзённіку Алімпіяды.
* Наша жаночая баскетбольная зборная пасля двух паражэнняў запар усё ж атрымала перамогу ў Рыа-дэ-Жанэйра над бразільянкамі — 65:63. Пасля няўдала праведзеных дзвюх першых чвэрцяў падапечныя Анатоля Буяльскага сабраліся і паступова пачалі даганяць гаспадынь пляцоўкі.
— Мы ведалі, што Бразілія заўсёды рэзка пачынае, — расказала капітан каманды Наталля Трафімава. — У кожнай гульні вядзе, а потым пачынае «здувацца». У нашым матчы гэта адбылося ў канцы другой чвэрці. Але паколькі ў нас у актыве ўжо былі два цяжкія паядынкі, то не хапіла сіл, каб перавесці гульню ў патрэбны кірунак адразу. Добра, што дзяўчаты выконвалі ўсе трэнерскія ўстаноўкі і змаглі змяніць сітуацыю. Бразільская каманда няпростая, габарытная. Але ўсё атрымалася і гэта супер.
Становішча каманд пасля трох гульнявых дзён у нашай групе такое: Аўстралія — 6 ачкоў, Японія — 5, Францыя — 5, Беларусь — 4, Турцыя — 4, Бразілія — 3.
Сёння беларускія дзяўчаты згуляюць з турчанкамі, гэты матч стане вырашальным для нашай каманды. Нагадаем, у плэй-оф выходзяць першыя 4 каманды з групы. Матчы заключнага тура ў групе А адбудуцца 13 жніўня.
* У Рыа-дэ-Жанэйра напалі на аўтобус з беларускім журналістам. Інцыдэнт адбыўся пасля баскетбольнага матчу Беларусь — Бразілія 9 жніўня. Як паведамляюць айчынныя журналісты, якія знаходзяцца ў горадзе правядзення Гульняў, пасля матчу аўтобус з прадстаўнікамі СМІ вяртаўся з кластара «Дэадора» ў галоўны прэс-цэнтр. На сярэдзіне шляху прыкладна ў 20.15 па мясцовым часе пачуліся гучныя хлапкі, пасля чаго два вялікія акны пакрыліся дробнымі расколінамі. Нязначныя пашкоджанні пальцаў асколкамі шкла атрымаў адзін з карэспандэнтаў.
Дарога ад кластара «Дэадора» да алімпійскага прэс-цэнтра пралягае праз кварталы фавелаў і сярод скалістай мясцовасці. Па здагадках, у вокны маглі трапіць стрэлы або камяні.
* Адна з самых вопытных беларускіх спартсменак на Алімпіядзе-2016 Кацярына Карстэн працягвае сваё ўпэўненае выступленне. Яна прабілася ў паўфінальны этап спаборніцтваў з вынікам 7 хвілін 28,03 секунды.
Сярод мужчын наш прадстаўнік Станіслаў Шчарбачэня таксама заваяваў права выступіць у паўфінале, пераадолеўшы бар'ер чвэрцьфіналу. Сёння беларусы стартуюць у паўфіналах.
* Амерыканскі плывец Майкл Фэлпс зноў б'е рэкорды. Спартсмен папоўніў свае дасягненні яшчэ двума залатымі медалямі. Іх Фэлпс заваяваў у індывідуальным заплыве на дыстанцыі 200 м батэрфляем і ў складзе каманды ў эстафеце 4х200 м вольным стылем. Цяпер Майкл Фэлпс з'яўляецца 21-разовым чэмпіёнам Алімпіяд.
— 21 залаты медаль — гэта шмат. Проста вар'яцтва. Гэта нешта неверагоднае. З нецярпеннем чакаю наступных стартаў, бо я яшчэ не скончыў, — цытуюць Фэлпса СМІ.
* Чарговая сенсацыя ў тэнісе. Першая ракетка планеты амерыканка Серэна Уільямс завяршыла выступленне на Алімпіядзе. Спачатку разам са сваёй сястрой Вінус яна пацярпела паражэнне ў парным разраде, а потым нечакана выбыла з барацьбы сярод адзіночак. У матчы 1/8 фіналу Серэна саступіла ўкраінцы Эліне Світолінай у двух сэтах — 4:6, 3:6.
Адзначым таксама, што завяршыла выступленне ў адзіночным разрадзе і чацвёрты нумар сусветнага рэйтынгу іспанка Гарбін Мугуруза.
Дар'я ЛАБАЖЭВІЧ
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
