Каб скура не абвісла, прымайце ванны з марской соллю

Працяглая дыета і надта хуткая страта вагі могуць прывесці да абвісання скуры. Самыя праблемныя месцы — на жываце, твары, шыі, руках, унутраным баку сцягна. Што рабіць, каб пазбегнуць такіх непрыемнасцяў? Парады дае ўрач-дэрматавенеролаг Мінскага гарадскога клінічнага скурна-венералагічнага дыспансера Ксенія КАПРАЛАВА.

• Худзейце павольна, нельга скідваць больш за 0,5-1 кг за тыдзень.
• Не выдаляйце з рацыёну бялкі, імкніцеся штодня ўжываць рыбу, або мяса, або птушку. Ужывайце і тлушчы, але іх колькасць не павінна перавышаць 30 г у дзень.
• Займайцеся спортам для падтрымання мышцаў у тонусе. Актыўныя трэніроўкі стымулююць абмен рэчываў, узмацняюць цыркуляцыю крыві і ў выніку паляпшаюць стан скуры.
• Падтрымлівайце водны баланс. Для эластычнасці скуры важна выпіваць да 2 л вады штодня.
• Добра ўмацоўвае скуру кантрасны душ. Чаргуйце гарачую і халодную ваду. Масіруйце праблемныя месцы мачалкай.
• 1-2 разы на тыдні прымайце ванны з марской соллю.
• Не забывайце пра пілінгі і скрабы, якія стымулююць рост новага эпідэрмісу. Карыстайцеся і падцягвальнымі ласьёнамі для цела.
• Прымайце полівітамінныя комплексы.
• Па магчымасці прайдзіце курс масажу.

Святлана БАРЫСЕНКА

protas@zviazda.by