Лясгасы краіны прыступяць да пасадкі лесу на пашкоджаных участках

З другой паловы верасня лясгасы краіны прыступяць да пасадкі лесу на ўчастках, якія былі пашкоджаны вятрамі і іншымі стыхійнымі бедствамі.

— Зараз спецыялісты лясной гаспадаркі занятыя аглядам лесасек, іншымі словамі, ідзе праверка правільнасці высечак і расчысткі, — паведамілі ў прэс-службе Міністэрства лясной гаспадаркі. — Распрацаваны графікі правядзення апрацоўкі глебы пад пасадку лясных культур і лесааднаўлення. Восенню плануецца пасадзіць новы лес на тэрыторыях, пашкоджаных у выніку вятроў і снегаломамі, на плошчы звыш пяці тысяч гектараў.