Вы тут

Раім схадзіць


Восеньскі лекторый, свята азербайджанскай культуры, дзень дзіцячага інтэрактыўнага тэатра і выстава водараў – афіша «Звязды» з 26 верасня па 2 кастрычніка. 


Прагляд і абмеркаванне дакументальных фільмаў пра Палессе

Фота: 2do2go.ru

Дзе: кнігарня «Логвінаў» (пр-т Незалежнасці, 37А)

Калі: 26 верасня, 19:00

Колькі каштуе: бясплатна

Ужо сёння ў кнігарні «Логвінаў» пакажуць два дакументальныя фільмы: «Песня Палесся» і «Граюць вяселле гармоні».

Здымкі першай стужкі вяліся ў Лельчыцкім раёне. У сучасным разуменні яе нельга назваць строга дакументальнай, бо ў фільме ёсць пастановачныя сцэны. Але сёння «Песня Палесся» – дакумент мінулай эпохі. Фільм будзе цікавы аматарам беларускіх народных спеваў і танцаў.

Стужка «Граюць вяселле гармоні» пакажа тагачаснае беларускае вяселле, знятае ў Лельчыцкім раёне.


Восеньскі лекторый. Анталогія незямнога

Фота: kudago.com

Дзе: Нацыянальны мастацкі музей Рэспублікі Беларусь (вул. Леніна, 20)

Калі: з 28 верасня, 19:00

Колькі каштуе: 5 р. – дарослыя, 2.50 р. – школьнікі, студэнты 

28 верасня ў Нацыянальным мастацкім музеі Рэспублікі Беларусь стартуе новы лекцыйны курс. На гэты раз у цэнтры ўвагі апынуцца два буйныя выставачныя праекты, закліканыя паказаць сакральнае мастацтва розных народаў: «Свет нябеснага на зямлі» і «Мастацтва будызму».

Курс складаецца з васьмі аўтарскіх лекцый аб культурных аспектах хрысціянства і будызму, падчас якіх навуковыя супрацоўнікі музея раскажуць, як хрысціянства і будызм змянялі карту свету і фармавалі грамадскі светапогляд, і як гэты працэс адбіўся на гісторыі мастацтва.

Азнаёміцца з праграмай лекцый можна тут.


Свята азербайджанскай культуры

Фота: fnkaa.ru

Дзе: Верхні горад (пл. Свабоды, 23А)

Калі: 1 кастрычніка, 12:00

Колькі каштуе: бясплатна 

Гасцей мерапрыемства чакае насычаная канцэртная праграма: нацыянальная азербайджанская музыка і танцы. Акрамя гэтага, пройдуць майстар-класы па гатаванні нацыянальных азербайджанскіх страў, майстар-клас па выцісканні гранатавага соку, спартыўнае спаборніцтва.  

У рамках мерапрыемства пройдзе выстава-продаж унікальных дароў Азербайджана.


Дзень дзіцячага інтэрактыўнага тэатра

Фота: ncsm.by

Дзе: Нацыянальны цэнтр сучасных мастацтваў Рэспублікі Беларусь (вул. Някрасава, 3)

Калі: 1 кастрычніка, з 11:00

Колькі каштуе: ад 4 р. – дарослыя, ад 8 р. – дзеці 

У гэты дзень юныя гледачы ператворацца ў герояў спектакляў. Маленькія аматары тэатра змогуць не толькі прыняць удзел у тэатральным дзеянні, але і паўплываць на сюжэт і нават стварыць сваю непаўторную гісторыю.

Падрабязней з праграмай спектакляў можна азнаёміцца тут.


Выстава «PaVetra Беларусі. Водар роднага краю»

Фота: histmuseum.by
 

Дзе: Нацыянальны гістарычны музей Рэспублікі Беларусь (К. Маркса, 12)

Калі: па 23 кастрычніка з 11:00 да 19:00

Колькі каштуе: удакладняць у касе

З 23 верасня па 23 кастрычніка ў Нацыянальным гістарычным музеі праходзіць выстава «PaVetra Беларусі. Водар роднага краю». На першым плане экспазіцыі — водар PaVetra — сімвал Беларусі, створаны ўраджэнкай Беларусі, адной з самых тытулаваных парфумераў свету Сафіяй Гройсман і яе вучнем — Уладзіславам Рэкуновым.

Акрамя гэтага, будуць прадстаўлены тэматычныя зоны, кожная з якіх уяўляе водар таго ці іншага віду мастацтва: водар і музыка, водар і жывапіс, водар тэатра і кіно.


Лекцыі TEART

Фота: teart.by

Дзе: Рэспубліканскі тэатр беларускай драматургіі (вул. Крапоткіна, 44) і Галерэя TUT.BY (пр-т Дзяржынскага, 57)

Калі: з 16 верасня па 6 кастрычніка

Колькі каштуе: бясплатна

Пяць лектараў, сярод якіх – вядомыя тэатразнаўцы, крытыкі і даследчыкі – раскажуць пра тое, як глядзець і разумець сучасны тэатр. 

Адукацыйная праграма складаецца з двух блокаў: лекцый для пачаткоўцаў і прафесіяналаў.  Заняткі пачнуцца 16 верасня. На пляцоўцы Рэспубліканскага тэатра беларускай драматургіі тэатральны крытык Алена Мальчэўская выступіць з лекцыяй «Дакумент у тэатральным мастацтве канца XX-пачатку XXI стагоддзя».

Завершыць цыкл лекцый блок для прафесіяналаў. Перад слухачамі выступіць тэатразнавец, шэф-рэдактар раздзелу «Тэатр» COLTA.RU, аўтар ВД «Камерсант» Дзмітрый Рэнанскі.

Уваход на лекцыі свабодны, аднак неабходная папярэдняя рэгістрацыя.

Падрабязная праграма лекцый тут.


Міжнародны праект Non-Fashion

Фота: facebook.com

Дзе: Нацыянальны цэнтр сучасных мастацтваў Рэспублікі Беларусь (вул. Някрасава, 3)

Калі: па 8 кастрычніка

Колькі каштуе: удакладняць у касе

Выстава Non-fashion падтрымлівае ідэю таго, што мода – гэта адна з праяў чалавечай прыроды з усімі яе супярэчлівымі рысамі: цікаўнасцю, цягай да самавыяўлення, запалам да ўсяго новага і пратэсту супраць існуючага і галоўнае – імкненнем да развіцця і ўнутранай свабоды.  

Праекты, з якіх складаецца выстава Non-fashion, не з'яўляюцца маніфестам супраціўлення модзе як культурнаму феномену. Хутчэй яны супрацьстаяць абывацельскаму пагляду на моду, як на фабрыку ілюзій, якая дыктуе, вырабляе і шматразова тыражуе штучныя выявы паспяховага, «прыгожага» жыцця. Яны прапануюць перайсці ад вузкага разумення функцыі моды як візуалізацыі сацыяльнага статусу да шырэйшага пагляду на яе.


Месяц фатаграфіі ў Мінску

Фота: facebook.com

Дзе: ЦЭХ (вул. Кастрычніцкая, 16)

Калі: па 8 лістапада з 12:00 да 22:00

Колькі каштуе: бясплатна

Месяц фатаграфіі ў Мінску – падзея, якая ўжо трэці год звяртае ўвагу на фатаграфію як тэму, інструмент і нагоду для дыялогаў, абмену досведам з тэарэтыкамі ў галіне візуальных доследаў і фатографамі-практыкамі.

За два гады працы ў мерапрыемстве прынялі ўдзел фатографы, арт-крытыкі і куратары з 9 дзяржаваў. У якасці тэмы гэтага года была заяўленая апазіцыя «цэнтр/перыферыя». 

Выбар рэдакцыі

Культура

«Як зрабіўся паэтам, я не ведаю сам...». Лёсы беларускіх паэтычных зборнікаў

«Як зрабіўся паэтам, я не ведаю сам...». Лёсы беларускіх паэтычных зборнікаў

Лёс другога зборніка ў літаратарскай кар’еры — самы складаны. 

Культура

Уладзіслаў Арцёмаў: «У беларускай мове болей старажытнага духу...»

Уладзіслаў Арцёмаў: «У беларускай мове болей старажытнага духу...»

На пытанні «Звязды» адказвае галоўны рэдактар расійскага літаратурнага часопіса «Москва».

Калейдаскоп

Ці ведаеце вы родную мову? Самы час праверыць!

Ці ведаеце вы родную мову? Самы час праверыць!

Ужо традыцыя з нагоды Дня роднай мовы прапаноўваць чытачам праверыць свае веды.