У Польшчы прайшлі пратэсты жанчын супраць забароны абортаў

У Польшчы адбыліся масавыя маніфестацыі жанчын, якія выступаюць супраць прыняцця закона аб поўнай забароне на аборты.

Акцыя атрымала назву «Чорны пратэст» — удзельніцы па прызыву арганізатараў апраналіся ва ўсё чорнае. Акрамя таго, скарыстаўшыся правам на дзень водпуску паводле свайго меркавання, жанчыны не выйшлі на працу. Пратэсты прайшлі ў найбуйнейшых гарадах краіны — Кракаве, Вроцлаве, Гданьску, Беластоку, Шчэціне, Познані і многіх іншых. Паводле інфармацыі ўлад Варшавы, у цэнтры горада, нягледзячы на дажджлівае надвор'е, сабраліся каля 30 тысяч чалавек. Як паведамляецца, у мітынгах прынялі ўдзел і мужчыны. Пратэсты ў Польшчы працягваюцца ўжо больш за тыдзень — з таго часу, як сейм Польшчы прагаласаваў у першым чытанні за законапраект аб поўнай забароне абортаў і ўвядзенні крымінальнай адказнасці за іх здзяйсненне.