Вырасце сад, падрастуць і дзеці

Гэтай вясной дэкаратыўныя фруктовыя дрэвы і кустоўе рэдкіх парод плануюць высадзіць разам свяшчэннаслужыцелі, урачы, шматдзетныя матулі і жанчыны, якія пагадзіліся ў крызіснай сітуацыі захаваць цяжарнасць. Упрыгожыць плануецца некалькі ўстаноў аховы здароўя і храмаў у кожнай вобласці. У Міністэрстве аховы здароўя спадзяюцца, што першы падобны вопыт стане штогадовым і будзе сімвалізаваць вяртанне да традыцыйных сямейных каштоўнасцяў.

— Тэматыка прыроднага ўладкавання з'яўляецца для нашага прыхода прыярытэтнай, — кажа старшыня Сінадальнай камісіі Беларускай Праваслаўнай Царквы па пытаннях сям'і, абароны мацярынства і дзяцінства, настаяцель прыхода храма Свяціцеля Мікалая Японскага ў Мінску протаіерэй Павел СЯРДЗЮК. — Рэспубліканская акцыя нездарма атрымала назву «Сакуры цвет на зямлі беларускай». Святы раўнаапостальны Мікалай Японскі быў закліканы некалі ў Японію па просьбе першага консула Расійскай імперыі ў Японіі Іосіфа Антонавіча Гашкевіча — выпускніка Мінскай духоўнай семінарыі, ураджэнца Беларусі, які завяршыў свой зямны шлях недалёка ад Астраўца. Дакладнае месца пахавання, на жаль, дагэтуль невядомае. Праз судакрананне з Японіяй мы, можа быць, адкрыем і невядомыя старонкі жыцця сына Беларусі. А пакуль ужо ў лютым будзем нарыхтоўваць пасадачны матэрыял.

Дрэвы і кустоўе прадаставіць Цэнтральны батанічны сад НАН Беларусі, у якім захоўваецца генафонд больш як 12 тысяч найменняў раслін. Дарэчы, сакура, якая адносіцца да групы вішні, таксама там ёсць. Але ў межах акцыі плануецца высадзіць іншыя дрэвы і кустоўе. Гэта можа быць, напрыклад, алыча, вішня лямцавая, айва японская, бружмель сіні, чарнаплодная рабіна, кізіл... «Гэта вельмі важнае ўменне — сузіраць прыгажосць, нікуды не спяшацца, а проста атрымліваць асалоду ад таго, што бачыш, і гэта было б карысна пераняць з Усходу», — заўважае загадчык лабараторыі інтрадукцыі драўнінных раслін Цэнтральнага батанічнага сада, кандыдат біялагічных навук Ігар ГАРАНОВІЧ.

Святлана БАРЫСЕНКА

protas@zviazda.by