Жанчын у Беларусі — 53,4% ад агульнай колькасці насельніцтва краіны, усяго на 1 студзеня 2017 года налічвалася 5,1 млн прадстаўніц прыгожага полу. Прычым іх сацыяльны і эканамічны статус у нашай краіне, на думку намесніка міністра працы і сацыяльнай абароны Аляксандра Румака, з году ў год узрастае.
Беларусь на сённяшні дзень, згодна са звесткамі Даклада аб чалавечым развіцці 2015 года, уваходзіць у лік 15 краін, дзе індэкс чалавечага развіцця жанчын роўны або перавышае аналагічны паказчык сярод мужчын. Аляксандр Румак лічыць, што гэта стала магчымым дзякуючы збалансаванай палітыцы дзяржавы ў сферы забеспячэння роўных правоў і магчымасцяў. Дарэчы, цяпер у нашай краіне прыняты пяты Нацыянальны план па забеспячэнні гендарнай роўнасці на 2017—2020 гады.
Ні адна са сфер дзейнасці не абыходзіцца без жаночага ўдзелу. Пры гэтым цяпер для Беларусі, як і для многіх еўрапейскіх дзяржаў, характэрна тэндэнцыя павелічэння сярэдняга ўзросту жанчын пры ўступленні ў першы шлюб, як і тэндэнцыя павелічэння сярэдняга ўзросту маці пры нараджэнні першага дзіцяці.
Разам з тым летась 117,8 тысячы беларусак сталі мамамі, прычым больш за 50% народжаных дзяцей аказаліся другім, трэцім і наступным дзіцем у сям'і.
Аляксандр Румак адзначае, што дзяржаўныя дапамогі атрымліваюць 558 тысяч дзяцей (гэта 30,6% ад агульнай колькасці непаўналетніх), а забяспечанасць дзяржаўнымі дапамогамі дзяцей ва ўзросце да трох гадоў дасягае амаль 100%.
Пры гэтым спецыялісты падкрэсліваюць, што сістэма дапамог сем'ям з дзецьмі пастаянна ўдасканальваецца. Напрыклад, у канцы мінулага года Палатай прадстаўнікоў у першым чытанні быў прыняты законапраект, што ўносіць навацыі ў Закон «Аб дзяржаўных дапамогах сем'ям, якія выхоўваюць дзяцей» і дзякуючы якому будзе ўзмоцнена сацыяльная абарона сем'яў, якія выхоўваюць дзяцей-інвалідаў, а таксама сем'яў, у якіх самі бацькі з'яўляюцца інвалідамі.
Таксама ў нашай краіне цяпер рэалізуецца праграма сямейнага капіталу. Пачынаючы з 2015 года адкрыта 32 тысячы дэпазітных рахункаў на агульную суму звыш 320 млн долараў. Актыўна развіваецца і сістэма сацыяльных паслуг сем'ям з дзецьмі. Асабліва запатрабаваны сем'ямі паслугі сацыяльнай нянькі і сацыяльнага патранату.
Святлана Бусько
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.