Вы тут

Учора родныя і сябры праводзілі ў армію першых прызыўнікоў гэтай вясны


Па традыцыі першымі ў войска адправілася ваенная эліта — будучыя прадстаўнікі сіл спецыяльных аперацый і Мінскай ваеннай камендатуры, а таксама сухапутных войскаў. Ці настроены юнакі на вайсковую службу, карэспандэнты «Звязды» даведаліся падчас урачыстай цырымоніі адпраўкі, якая прайшла ў Мінскім гарадскім ваенным камісарыяце.


— Самае галоўнае, што наш сын хоча служыць, — не хаваюць радасці бацькі прызыўніка Дзмітрый і Наталля Сітнікі. — Больш за тое, ён марыць стаць афіцэрам.

Усвядомленым выбарам служба ў войску з'яўляецца і для Андрэя Тушынскага. Маці юнака, Ганна Гарыеўна, якая выпраўляе сына, прызнаецца, што настрой у іх баявы. А па-іншаму і быць не можа: Андрэй будзе служыць у сілах спецыяльных аперацый. Юнак упэўнены, што зробіць усё дзеля таго, каб быць годным нашчадкам сваіх гераічных продкаў. Адзін прадзед мінчаніна, да Вялікай Айчыннай начальнік міліцыі ў Лідзе, у вайну быў сувязным партызанскага атрада на Гомельшчыне. Вядома, што яго расстралялі немцы, дзе пахаваны партызан, ніхто не ведае. Другому прадзеду Андрэя, у адрозненне ад многіх курсантаў, якія з лёгкай рукі лётчыка пасля паскораных курсаў накіроўваліся на фронт, пашчасціла дачакацца Перамогі.

Каля 10 тысяч прызыўнікоў папоўняць армейскія шэрагі гэтай вясной. Служба ў рэзерве чакае амаль тысячу грамадзян.

— Сёння ў армію ідуць самыя лепшыя прызыўнікі, юнакі, якія па сваіх маральна-псіхалагічных якасцях годна выканаюць свой воінскі абавязак, — адзначае намеснік начальніка Галоўнага арганізацыйна-мабілізацыйнага ўпраўлення Генеральнага штаба Узброеных Сіл палкоўнік Юрый КУЗЬМІН. — Самае галоўнае, што ў іх ёсць жаданне служыць. Большасць з іх матываваныя для праходжання вайсковай службы на шматлікіх воінскіх пасадах. Многія ўжо цяпер выказваюць жаданне ў далейшым працягнуць службу па кантракце.

Не выключае такі варыянт і сённяшні навабранец Антон Аляшкевіч, якога прыйшлі праводзіць у армію тры прыгажуні — бабуля, мама і дзяўчына (на фота). Хлопец жартуе, што калі Ангеліна дачакаецца яго з войска, то абавязкова павядзе яе ў загс. Бабуля Антона лічыць, што кожны хлопец павінен адслужыць у арміі. «Толькі прайшоўшы шлях маладога байца, можна стаць сапраўдным мужчынам. Я ўвогуле люблю людзей у форме, і каб была мая воля, то і дзяўчат бы забіралі ў войска: ім гэта таксама не нашкодзіць», — пераканана Марыя Мікалаеўна, якая сама не адзін год прысвяціла арміі.

Ірына Андрэеўна, маці прызыўніка Фадзі, не можа стрымаць слёз: перажывае, што працяглы час не ўбачыць свайго сыночка. Бацька хлопца, Сулейман, супакойвае яе тым, што служба ў войску пойдзе на карысць прафесійнай дзейнасці сына. Аказваецца, Фадзі па адукацыі — фельчар, таму служба ў падраздзяленні медыцынскага забеспячэння не дазволіць яму страціць навыкі.

— Маладыя людзі, якія прыходзяць з войска, мяняюцца ў лепшы бок, — перакананы бацька прызыўніка Вячаслаў Часновіч. — Армія загартоўвае характар, волю, мужнасць.

Адпраўка ажыццяўляецца ва Узброеныя Сілы, іншыя войскі і вайсковыя фарміраванні. Гэтай вясной выкліку на прызыўныя камісіі падлягае каля 50 тысяч грамадзян нашай краіны. У ваенных камісарыятах завяршаецца медыцынскі агляд прызыўнікоў. Прызыўнымі камісіямі ў адносінах да грамадзян Беларусі ўжо вынесена больш як 30 тысяч рашэнняў.

Сёлета прадастаўлена звыш 20 тысяч адтэрміновак. Асноўную частку — больш як 80% — складаюць адтэрміноўкі для працягу адукацыі. Іншыя юнакі гэтай вясной не пойдуць у войска па сямейных абставінах, у сувязі са станам здароўя і набыццём ваенна-тэхнічных спецыяльнасцяў, з ажыццяўленнем дэпутацкіх паўнамоцтваў і на падставе ўказаў Прэзідэнта Беларусі.

...Бацькі, сваякі і сябры развітваюцца са сваімі прызыўнікамі. Наступны раз, падчас цырымоніі прыняцця ваеннай прысягі, якая адбудзецца 10 чэрвеня, яны ўбачаць ужо вайскоўцаў, спадзяёмся, сапраўдных абаронцаў сваёй Айчыны.

Вераніка КАНЮТА

kanyuta@zvіazda.by

Фота Сяргея НІКАНОВІЧА

Загаловак у газеце: Служыце — і вяртайцеся!

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».