Вы тут

Жыхары шматпавярховіка даглядаюць месцы агульнага карыстання


У Жодзіне ёсць дом па вуліцы Дзеравянкі пад нумарам 6. Ён выглядае лепш за дамы, якія былі пабудаваныя разам з ім 55 гадоў таму. Розніцу відаць і пры ўваходзе ў пад'езд. Тут, напрыклад, на дзвярах няма размытага дажджом, пажоўклага ад часу шмацця папер ад рэкламных аб'яў. Для аб'яў усталявана спецыяльная дошчачка. Побач змешчана шыльда з прозвішчамі і кантактнымі тэлефонамі старасты дома, участковага інспектара міліцыі, адказнай асобы з жыллёва-камунальнай арганізацыі, дэпутата гарадскога Савета.


— У 2013 годзе ў горадзе праводзіўся конкурс на найлепшы пад'езд. Мы занялі першае месца і атрымалі прэмію. Уладальнікі кватэр прынялі рашэнне патраціць яе на новыя вокны са шклопакетамі. І цяпер у нас не толькі прыгожа, але і цёпла. Нядаўна за свае грошы купілі дываны, каб людзі не насілі нагамі пясок. Усё, што вы тут бачыце, набытае за асабістыя сродкі. А вазонамі, карцінамі жыльцы самі ўпрыгожваюць лесвічныя пляцоўкі, — расказала старшая па пад'ездзе Наталля Правілава.

Госці, якія прыходзяць у гэты дом, здзіўляюцца чысціні і ўтульнасці ў месцах агульнага карыстання. Жыхары тут адмовіліся ад паслуг прыбіральшчыцы і самі па чарзе займаюцца прыборкай. Уладальнікі, якія адчулі сябе сапраўднымі гаспадарамі, лічаць, што лепш, як яны, ніхто не навядзе парадак. Разам з тым і нейкую капейчыну можна сэканоміць, каб у наступным пусціць яе на куплю фарбы, будаўнічых матэрыялаў, касметычны рамонт.

Такую ініцыятыву падтрымліваюць і мясцовыя камунальнікі. На абслугоўванні ў арганізацыі 277 жылых дамоў. Набраць прыбіральшчыц для кожнага праблематычна. «Мы зацікаўлены, каб жыхары самі сачылі за чысцінёй або прыцягвалі для прыборкі клінінгавыя кампаніі. У межах Закона аб сумесным домаўладанні яны маюць на гэта права», — кажуць спецыялісты «Жодзінажылцепласэрвісу».

У доме тры паверхі, 12 кватэр. Усе яны прыватызаваныя. Жывуць тут людзі з сярэднім дастаткам. Тыя, хто спачатку не згаджаўся аддаваць на агульную справу грошы, убачыўшы вынік, сваё стаўленне памянялі. Жыхары суседніх дамоў зайздросцяць.

— Людзям здаецца, што нехта старонні ў нас навёў парадак, добраўпарадкаваў дваровую тэрыторыю. Але мы самі ўсё зрабілі сваімі рукамі, — кажа Наталля Правілава. — Восенню, напрыклад, склаліся на фарбу для бардзюраў. З цягам часу нешта зношваецца, прыходзіць у заняпад. Таму над абнаўленнем інтэр'еру, выгляду месцаў агульнага карыстання даводзіцца працаваць пастаянна. Усім нам, хто тут жыве, хочацца, каб у пад'ездзе было прыгожа і ўтульна, але для гэтага трэба прыкласці рукі.


У тэму

Наталля Сушко, старшыня Жодзінскага гарадскога Савета дэпутатаў:

— Выканаўчай уладай, арганізацыямі жыллёва-камунальнай гаспадаркі шмат робіцца па добраўпарадкаванні, навядзенні парадку на вуліцах, дваровых тэрыторыях. Але для нас вельмі важна падключыць да агульнай работы гараджан. Сёння мы вельмі актыўна працуем з насельніцтвам праз органы тэрытарыяльнага грамадскага самакіравання. І гэтыя намаганні прыносяць плён. У кожным доме ёсць стараста, старшыя па пад'ездах. Гэта людзі, якія адказваюць за стан пад'ездаў, уваходных вузлоў, лавак, дзіцячых гульнявых пляцовак. Яны нашы першыя памочнікі, падказваюць, дапамагаюць рэалізуюць разам з намі праекты. Гэтыя людзі не скардзяцца, а менавіта падымаюць тыя пытанні, якія мы сумеснымі сіламі можам вырашыць. Да работы падключаны і дэпутаты гарадскога Савета.

Таццяна ЛАЗОЎСКАЯ

lazovskaya@zviazda.by

Загаловак у газеце: Лепш за прыбіральшчыцу

Выбар рэдакцыі

Грамадства

Сёння распачынае работу УНС у новым статусе

Сёння распачынае работу УНС у новым статусе

Амаль тысяча дзвесце чалавек збяруцца, каб вырашаць найважнейшыя пытанні развіцця краіны. 

Навука

Наколькі эфектыўна працуе сістэма інтэлектуальнай уласнасці?

Наколькі эфектыўна працуе сістэма інтэлектуальнай уласнасці?

Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.

Здароўе

У Нацыянальны каляндар плануюць уключыць новыя прышчэпкі

У Нацыянальны каляндар плануюць уключыць новыя прышчэпкі

Як вакцыны выратоўваюць жыцці і чаго можа каштаваць іх ігнараванне?

Грамадства

Курс маладога байца для дэпутата

Курс маладога байца для дэпутата

Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.