Падчас выязнога пасяджэння прэзідыума Віцебскага абласнога Савета дэпутатаў у Талачынскім раёне абмеркавалі прымяненне Дэкрэта №6 аб стымуляванні прадпрымальніцкай дзейнасці ў глыбінцы. Таксама разгледзелі, як выконваецца даручэнне Прэзідэнта па павышэнні эфектыўнасці выкарыстання нерухомасці...
А многія і не ведаюць...
За час дзеяння дэкрэта (уступіў у сілу 1 ліпеня 2012 года) бізнесу ў глыбінцы стала на 8% больш. Гэта параўнальна не многа, але і не мала. На думку старшыні Віцебскага абласнога Савета дэпутатаў Уладзіміра Цярэнцьева, трэба актыўней расказваць пра дэкрэт.
— Мы павінны ісці да людзей, каб яны ведалі пра нюансы. Дэкрэтам прадугледжаны льготы па падаткаабкладанні, іншыя прэферэнцыі. Ёсць магчымасць атрымаць крэдыт пад бізнес на вельмі прывабных умовах. А многія ўсяго гэтага не ведаюць. І, вядома, неабходна садзейнічаць стварэнню бізнес-прадпрыемстваў у малых і сярэдніх гарадах, прыходу інвестараў...
Што да продажу нерухомасці, нярэдка гэты працэс займае шмат часу. І інвестар сыходзіць, губляючы цікавасць. Магчыма, трэба ўносіць змяненні ў адпаведнае заканадаўства. Калі спатрэбіцца, будзем з прапановамі звяртацца ў Нацыянальны сход, — падкрэсліў Уладзімір Цярэнцьеў.
Паводле слоў дырэктара Віцебскага абласнога тэрытарыяльнага фонду дзяржаўнай маёмасці Міхаіла Паўлючкова, сёлета ўцягнута ў гаспадарчы абарот 78 аб'ектаў нерухомасці (па стане на 30 мая). За 5 месяцаў на 27 аўкцыёнах прадалі 27 аб'ектаў — за 262,8 тысячы рублёў. У тым ліку 18 будынкаў — з устанаўленнем пачатковай цаны ў памеры базавай велічыні.
Але, як адзначае старшыня камітэта эканомікі Віцебскага аблвыканкама Анжаліка Нікіціна, працэс падрыхтоўкі да рэалізацыі нерухомасці за «базавую» няпросты. Бо ёсць шмат арганізацыйных юрыдычных нюансаў. І нярэдка дзелавыя людзі не хочуць чакаць адпаведнай магчымасці па 6 месяцаў і больш.
— Наогул пачаткоўцам у бізнесе складана. У прыватнасці, дзе ўзяць грошы для стартавага капіталу? І ніяк не атрымаць крэдыт у банку, калі няма што прадставіць у якасці закладу, — агучыла яна тыповыя праблемы прадпрымальнікаў. Як выйсце, неабходна прадумаць сістэму гарантый. Магчыма, трэба стварыць адпаведны фонд або страхавую кампанію. І было б добра, каб мясцовыя ўлады таксама маглі выступіць у якасці гарантаў.
Прафесійныя грыбнікі
Паводле слоў старшыні Талачынскага райвыканкама Сяргея Ягорава, падатковыя паступленні ад прадпрымальніцтва складаюць 37%. І калі ў суседнім Крупскім раёне Мінскай вобласці развіваецца індывідуальнае прадпрымальніцтва, у Талачынскім — вытворчасць. І ў выніку выручка тут у 2 разы большая. І хоць са «сталічным» рэгіёнам складана канкурыраваць у пытанні прыцягнення інвестыцый, у талачынцаў атрымліваецца.
Напрыклад, сёлета ў пасёлку Коханава плануецца ўвесці ў эксплуатацыю цэх па вырошчванні шампіньёнаў. (Доўгі час будынак не эксплуатаваўся. Раней там займаліся перапрацоўкай драўніны.) Працу атрымаюць да 50 чалавек. У планах — дадатковае стварэнне працоўных месцаў. Грыбы будуць вырошчваць па польскай тэхналогіі.
Як адзначыў адзін з заснавальнікаў фірмы, на ёй не рыхтуюць тэхнолагаў грыбной спецыялізацыі. Таму іх спачатку запросяць з-за мяжы. Праектная магутнасць цэха — каля 3 тысяч тон грыбоў у год. Бізнесмен падкрэсліў, што мясцовая ўлада актыўна спрыяла рэалізацыі ідэі. Паказалі будынкі, расказалі пра плюсы, але і мінусы не ўтойвалі. У выніку падабралі ідэальны варыянт для арганізацыі вытворчасці.
У Польшчы, Прыбалтыцы, на Украіне шмат аналагічных прадпрыемстваў. У тым ліку і ў якасці сямейнага бізнесу. Гэтым выгадна займацца. У невялікіх гарадках і вёсцы «грыбныя фермы» — эфектыўны спосаб працаўладкаваць насельніцтва. Асабліва жанчын.
Зайшлі ў... трубу
У Коханаве з насельніцтвам больш за 4,2 тысячы чалавек некалькі паспяховых прадпрыемстваў. Знаходзіцца пасёлак прыкладна за 24 кіламетры ад райцэнтра.
Дэпутатам паказалі ўнікальныя вытворчасці. Адна з іх — ТАА «Коханаўскі трубны завод «Белтрубпласт». Ён заснаваны ў 1982 годзе. Але і ў наш час, як кажуць, на плыву. Тут вырабляюць поліэтыленавыя трубы для сістэм газа- і водазабеспячэння, каналізацыі і г. д. Завод — вядучы вытворца палімерных вырабаў з магутнасцю 20 тысяч тон у год. (Дыяметр некаторых уражвае. Калі чалавек зойдзе ўнутр і падыме руку, да верху дакладна не дацягнецца.) Прадпрыемства пастаянна ўкараняе новыя тэхналогіі, неаднаразова займала прызавыя месцы за якасць на рэспубліканскіх конкурсах «Найлепшы будаўнічы прадукт года».
А суседняе СП «Святавіт» праектуе і вырабляе тэлескапічныя экскаватары-планіроўшчыкі на платформах «МАЗ», «КАМАЗ», «УРАЛ» і гэтак далей, а таксама на гусенічным хаду. У асартыменце і вытворчыя комплексы на базе ўстановак гарызантальнага накіраванага свідравання. Для расіян тут вырабляецца каля 85% прадукцыі. Нават ва Уладзівастоку можна ўбачыць беларускія «агрэгаты». Заробак рабочых дасягае 1,1 тысячы ў месяц.
Дзе нарадзіўся, там і...
У канцы насычанай праграмы Уладзімір Цярэнцьеў падзяліўся ўражаннямі.
— На Віцебшчыне назіраецца цікавая тэндэнцыя. Усё больш прыкладаў таго, што выхадцы з раёнаў укладваюць у малую радзіму грошы. Той жа бізнесмен, які інвестуе ў вырошчванне шампіньёнаў, — яскравы прыклад эфектыўнага выкарыстання маёмасці і стварэння працоўных месцаў. У заходніх раёнах будуюць гатэлі, развіваюць турыстычны бізнес, — адзначыў ён.
А яшчэ старшыня абласнога Савета параіў браць прыклад з кіраўніка аднаго з раённых Саветаў. Яна, з кім бы ні знаёмілася, нават з кіраўнікамі буйнога бізнесу Расіі, ва ўсіх просіць візітоўкі. І гэта не проста «хобі». Потым выходзіць на сувязь, прапануе стварыць вытворчасць. І ўжо ёсць канкрэтныя вынікі...
Аляксандр ПУКШАНСКІ
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
