Учора, 9 чэрвеня, у Паставах распачаўся ХХ Міжнародны фестываль народнай музыкі «Звіняць цымбалы і гармонік». На працягу трохдзённага фестывальнага марафону ў адным з самых прыгожых райцэнтраў краіны граюць, спяваюць, танцуюць, забаўляюць, гандлююць. Фэст даўно ўжо стаў візітнай карткай краю. Сёлета ў ім бяруць удзел прадстаўнікі каля дзясятка краін.
У першы дзень культурнага праекта прайшло літаратурна-музычнае свята «Душой народжанае слова». Адбыўся таксама канцэрт калектываў мастацкай самадзейнасці «Карагод народных талентаў», а на гарадскім стадыёне — спартыўныя спаборніцтвы.
У суботняй праграме — адкрыццё мемарыяльнай дошкі, прысвечанай акцёрам-землякам Станіславу Ясюковічу і Зыгмунту Кенстовічу. Запрацуе і выстаўка, прысвечаная знакамітым навукоўцам — ураджэнцам Пастаўшчыны. Гэтае мерапрыемства прысвечанае аб'яўленаму ў краіне Году навукі. Адбудзецца прэзентацыя кнігі «Беларускія народныя музычныя інструменты».
Заўсёды шмат удзельнікаў і гледачоў збірае конкурс калектываў і «сола»-выканаўцаў на народных інструментах «Хто каго?». Вялікі інтарэс у гасцей выклікае і конкурс сельскіх падворкаў «Пастаўшчына гасцінная». Каля палаца Тызенгаўзаў на вечар запланавана традыцыйнае ўнікальнае тэатралізаванае прадстаўленне «Музыка беларускіх палацаў і сядзіб». Пасля гэтага ўрачыста адкрыюць фестываль. А пасля феерверку найлепшыя дыджэі пакажуць клас.
У апошні дзень фестывалю адбудуцца канцэрт беларускай класічнай музыкі, канцэрт ваеннага духавога аркестра, тэатралізаванае шэсце і заключны гала-канцэрт з удзелам ансамбля салістаў Нацыянальнага акадэмічнага народнага аркестра Рэспублікі Беларусь імя І. Жыновіча.
Аляксандр ПУКШАНСКІ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
