Вы тут

Як упрыгожыць і абараніць двары


Платныя аўтастаянкі ў дварах жылых дамоў, шлагбаум як сродак абароны сям'і і паркоўкі для веласіпедаў каля пад'езда. Пра гэтыя і іншыя змены і пытанні ў жыллёва-камунальным жыцці краіны расказалі спецыялісты.


Хто плаціць за кветнікі і святло каля дома Намеснік генеральнага дырэктара ДА «Гарадская жыллёвая гаспадарка» Галіна ГІЛЕВІЧ заўважае, што ў апошнія гады актыўнасць удзелу жыхароў у добраўпарадкаванні і ўпрыгожванні двароў расце. Свядомая пазіцыя праяўляецца нават у арандатараў памяшканняў у жылых дамах. А сёлета ў многіх грамадзян з'яўляецца жаданне будаваць у дварах велапаркоўкі:

— Калі сілы, што прыкладваюць самі жыхары на стварэнне кветнікаў каля пад'ездаў і іх догляд, перавесці ў грашовыя сродкі — калі б кветкі пасадзілі мы і даглядалі іх, — то гэтая сума ў некалькі разоў перавышала б выдаткі, якія пералічваюцца на разліковыя рахункі для закупкі, скажам, дзіцячага абсталявання.

Пералік работ па добраўпарадкаванні і ўтрыманні прыдамавых тэрыторый, якія павінны забяспечваць мясцовыя выканкамы, вызначаны Міністэрствам жыллёва-камунальнай гаспадаркі (Мінжылкамгасам). Гэта ўтрыманне і рамонт вулічна-дарожнай сеткі, дзіцячых гульнявых, гаспадарчых і спартыўных пляцовак, пясочніц, пляцовак для збору цвёрдых камунальных адходаў, догляд аб'ектаў расліннага свету, вонкавае асвятленне.

Тлумачыць Алена НОВІКАВА, галоўны спецыяліст сектара па надзвычайных сітуацыях Міністэрства жыллёва-камунальнай гаспадаркі Беларусі:

— Комплекс гэтых работ падзяляецца на катэгорыі «вулічна-дарожная сетка», «асвятленне» і «іншае добраўпарадкаванне за выключэннем». Да апошняга «выключэння» і адносяцца работы па ўтрыманні прыдамавых тэрыторый. Летась Указам Прэзідэнта №535 «Аб прадастаўленні жыллёва-камунальных паслуг» работы па ўтрыманні прыдамавых тэрыторый былі выключаны з пераліку работ па тэхабслугоўванні жылога дома. Цяпер яны павінны рэалізоўвацца за кошт бюджэту. Таму міністэрства фінансаў дадаткова выдзеліла на гэта пэўную суму. Аднак гэтыя грошы «растварыліся» ў агульным добраўладкаванні.

Дадатковыя паслугі і недахоп зямлі

Указам №535 прадугледжана таксама, што падтрыманне і аднаўленне санітарнага і тэхнічнага стану прыдамавых тэрыторый шматкватэрных жылых дамоў здзяйсняецца за кошт сродкаў мясцовых бюджэтаў. Прыдамавыя тэрыторыі, якія былі перададзены ў арэнду або для абслугоўвання таварыствам уласнікаў ці арганізацыям-забудоўшчыкам, абслугоўваюцца за кошт уласных сродкаў гэтых суб'ектаў.

— Разам з тым грамадзяне па ўласным жаданні і дамоўленасці з ЖКГ могуць абсталяваць за свае сродкі ў двары, напрыклад, дзіцячую пляцоўку. Існуе таксама дадатковая жыллёва-камунальная паслуга — стварэнне элементаў добраўпарадкавання на тэрыторыі і іх далейшае ўтрыманне, што робіцца са згоды ўсіх жыхароў, — абазначыла прадстаўніца Мінжылкамгаса.

Гаворачы пра добраўпарадкаванне дваровых тэрыторый, трэба звяртаць увагу на планаванне гэтай тэрыторыі згодна з ТКП «Горадабудаўніцтва ў населеных пунктах. Нормы планіроўкі і забудовы».

— Згодна з нарматывамі па фарміраванні дваровай прасторы, на выдзеленым участку зямлі павінны размяшчацца не толькі дом, а і паркоўка са стаянкай, дзіцячая пляцоўка, месца для выгулу сабак, кантэйнераў са смеццем і іншае, — заўважыла Таццяна ГАЎРЫЛЕНКА, начальнік аддзела горадабудаўніцтва галоўнага ўпраўлення горадабудаўніцтва, праектнай, навукова-тэхнічнай і інавацыйнай палітыкі Міністэрства архітэктуры і будаўніцтва Беларусі. — А як я на невялічкім пятачку змяшчу дом у 20 паверхаў і ўсё, што трэба да яго? У мяне зямельны ўчастак скончыўся ўжо на паркоўках са стаянкамі. Мы неаднойчы пісалі лісты ў Мінгарвыканкам, каб спецыялісты, выдзяляючы ўчастак пад адміністрацыйныя і офісныя будынкі, звярталі ўвагу, што стаянкі павінны змяшчацца на той зямлі, якая вылучана пад будаўніцтва, а не дзесьці, дзе ёсць месца.

Парковачны эксперымент

Праблема ўстаноўкі шлагбаўмаў вельмі хвалюе грамадзян і мясцовыя органы. Больш за ўсё зваротаў па гэтым пытанні паступае ад мінчан, нягледзячы на існуючае рашэнне Мінгарвыканкама ад 22 верасня 2016 г. №2786 «Аб некаторых пытаннях устаноўкі прылад, якія абмяжоўваюць рух транспартных сродкаў (шлагбаумаў) на прыдамавых і ўнутрыдваравых тэрыторыях у г. Мінску». З іншых рэгіёнаў краіны такіх зваротаў значна менш — па два-тры з вобласці.

— Каб зняць напружанасць па гэтым пытанні, Мінбудархітэктура падрыхтавала праект рэкамендацыйнага пісьма аб усталяванні шлагбаумаў, якое мы хочам зрабіць сумесна з Мінжылкамгасам. На мінулым тыдні мы накіравалі ім гэты праект і спадзяёмся, што на працягу месяца ён будзе падпісаны, — падзялілася Таццяна Гаўрыленка. — Існуючай нарматыўнай базы па ўстаноўцы шлагбаума дастаткова, аднак мясцовым органам неабходна кіраўніцтва да дзеяння. У пісьме па пунктах распісана, як, чаму і навошта, куды звяртацца заяўніку і што рабіць.

Тым часам на сайце Мінбудархітэктуры пачынае працаваць раздзел «горадабудаўніцтва», дзе змяшчаецца ўся інфармацыя па пытаннях, нават лісты і рэкамендацыі, якія накіроўваюцца таксама ў прававую базу «Кансультант».

Праўда, застаецца нявырашаным шэраг пытанняў адносна кошту ўстаноўкі такой прылады для жыхароў і чыста тэхнічныя моманты. Як будзе налічвацца электраэнергія за работу шлагбаума? У каго будзе чып ад яго? Як будзе арганізаваны пад'езд хуткай дапамогі і іншае. Па самых сціплых прыкідках устаноўка абыдзецца прыкладна ў 3000 рублёў.

Найбольш зацікаўлены ў тым, каб закрыць двор «на шлагбаум», жыхары цэнтра сталіцы.

— У людзей узнікае жаданне абараніць перш за ўсё нават не двор, а сваю сям'ю. Наўрад ці камусьці спадабаецца, каб на месцы аўто чалавека, які з'ехаў на працу, увесь дзень стаяла машына «чужака», які прыехаў на працу ў офіс, што непадалёк. Ён не жыве ў доме, каля якога паставіў машыну, і стаўленне ў яго да гэтага двара адпаведнае. Сама бачыла, як у адным з двароў машына стаяла ў дзіцячай пясочніцы, — адзначыла прадстаўніца Мінбудархітэктуры.

Галіна Гілевіч расказала пра незвычайны эксперымент, які датычыцца адной платнай паркоўкі, распачаты ў сталіцы:

— У адным з двароў у раёне чыгуначнага вакзала мы ўстанавілі відэакамеры, што будуць фіксаваць нумары ўсіх машын, якія ўязджаюць на тэрыторыю, і заносіць іх у базу. З тых, хто не жыве ў дамах і не арандуе там памяшканне, будуць браць плату за паркоўку. Папераджальныя знакі пра гэта там таксама змешчаны.

Пры гэтым сума за паркоўку будзе ў разы большай, чым на звычайных платных паркоўках, а з тых, хто адмовіцца плаціць, грошы будуць спаганяць праз суд.

Ірына СІДАРОК

sіdarok@zvіazda.by

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.