Вы тут

Брэнд Беларусі распрацоўваецца пры садзейнічанні Еўрапейскага саюза


Аб гэтым заявіла начальнік аддзела маркетынгу і якасці турысцкіх паслуг Дэпартамента па турызме Міністэрства спорту і турызму Ганна МУХА на прэс-канферэнцыі, прымеркаванай да міжнароднага форуму па брэндынгу дэстынацый «Інавацыйныя ідэі для прыцягнення турыстаў». Яна таксама дадала, што на гэты момант бюджэтныя грошы на дадзеную распрацоўку пакуль не задзейнічаны.


— Распрацоўкай займаецца Еўрапраект пры фінансавай падтрымцы Еўрасаюза, таму мы пакуль за гэта не плацім, — адзначыла спецыяліст. — Больш за тое, я ўжо бачыла тры варыянты брэнда, якія могуць быць прадстаўлены на абмеркаванне. Але мне здаецца, што да канца года можна будзе прадставіць 5—6 варыянтаў для выбару і наступнага рашэння.

Па словах Ганны Мухі, цяперашнія варыянты здаюцца ёй вельмі крэатыўнымі і адлюстроўваюць нацыянальны стыль і каларыт краіны.

Сёння ў Беларусі няма краінавага брэнда, лічыць Ганна Муха. «Ёсць розныя маркі, ёсць напрамкі, аднак канкрэтнага знака «брэнд Беларусі» пакуль не існуе», — дадала яна.

Па словах эксперта, на гэты момант у Еўропе не так многа ведаюць пра Беларусь, таму брэндынг нам неабходны. Асноўны паток турыстаў у нашу краіну да гэтага часу прыходзіць з Расіі, а краінавы брэнд дазволіць прыцягнуць еўрапейскія дзяржавы.

Што можа стаць брэндам Беларусі? Па словах кіраўніка праекта Еўрапейскага саюза «Падтрымка ўстойлівага развіцця турызму ў Беларусі» Янеза Сіршэ, пры абмеркаванні гэтага пытання першым варыянтам стала міфічная папараць-кветка. «Нашы дызайнеры і эксперты шукалі і знайшлі кветку, якая стане прывабным, але разам з гэтым — традыцыйным і кансерватыўным рашэннем», — адзначыў эксперт. Паводле яго слоў, таксама разглядаўся такі варыянт брэнда Беларусі, як слуцкія паясы, аднак паступова дызайнеры праекта звярнуліся ў бок абстрактнага рашэння з прывязкай да папулярнага беларускага сімвала — вышыванкі.

Еўрапраект пачаў сваю работу не з распрацоўкі брэнда Беларусі. Стартавай пляцоўкай былі выбраныя пяць так званых дэстынацый — тэрыторый, якія турыст выбірае для наведвання. Еўрапейскія партнёры распрацавалі стратэгіі развіцця турызму і лагатыпы для Полацка, Белавежскай пушчы, Мсціслава, Аўгустоўскага канала, Мядзельскага раёна і возера Нарач. «Нават калі ў такіх маленькіх гарадах, як Мсціслаў, ёсць магчымасць стварыць брэнд, то я лічу, што працэс працы прывядзе да стварэння годнага брэнда краіны», — дадала Ганна Муха.

Вышэйназваныя лагатыпы пяці беларускіх дэстынацый будуць прадстаўлены на Міжнароднай канферэнцыі па брэндынгу дэстынацый «Інавацыйныя ідэі для прыцягнення турыстаў», якая адбудзецца 6 і 7 ліпеня ў Мінску пры падтрымцы Міністэрства спорту і турызму, Сусветнай турысцкай арганізацыі і праекта «Падтрымка ўстойлівага развіцця турызму ў Беларусі». Плануецца, што ў мерапрыемстве прыме ўдзел генеральны сакратар Сусветнай турысцкай арганізацыі Талеб Рыфай.

Уладзіслаў ЛУКАШЭВІЧ

lukashevich@zvіazda.by

Выбар рэдакцыі

Эканоміка

У Брэсцкай вобласцi першымi ўкаранiлi практыку выязных прыёмаў дзяржрэгiстратараў

У Брэсцкай вобласцi першымi ўкаранiлi практыку выязных прыёмаў дзяржрэгiстратараў

Хто валодае нерухомай маёмасцю альбо ўчасткам зямлi, ведае, як важна мець адпаведныя дакументы на сваю ўласнасць.

Эканоміка

Як генафонд раслін адаптуецца да змен клімату

Як генафонд раслін адаптуецца да змен клімату

Работа па вывучэннi генетычных рэсурсаў раслiн у Беларусi была пачата яшчэ ў 20-я гады мiнулага стагоддзя.

Грамадства

Паэт Iван Юркiн: З жонкай упершыню пацалаваўся ў дзень вяселля 47 год таму

Паэт Iван Юркiн: З жонкай упершыню пацалаваўся ў дзень вяселля 47 год таму

Песнi на вершы Iвана Юркiна карыстаюцца вялiкай папулярнасцю. Хто не ведае гiмна гасцiннасцi нашай краiны — «Прыязджайце да нас у Беларусь»? Вось таму было цiкава пазнаёмiцца з музай паэта — яго жонкай Надзеяй Iванаўнай.