Пра тое, што ў музеі «Форт №5», які з'яўляецца філіялам мемарыяльнага комплексу «Брэсцкая крэпасць-герой», плануецца стварыць новую экспазіцыю, расказаў на адкрыцці выстаўкі дырэктар мемарыяльнага комплексу Рыгор БЫСЮК.
У памяшканні пятага форта наладжана выстаўка «Брэст-Літоўская крэпасць у сістэме крэпасцяў Расіі ХІХ стагоддзя». Равесніцы Брэсцкай фартэцыі былі ўзведзеныя на тэрыторыі цяперашніх Латвіі, Літвы, Польшчы, Расіі. А сёлета спаўняецца 175 гадоў з часу ўводу ў строй Брэсцкай крэпасці. І музейныя ўстановы згаданых краін падзяліліся з брастаўчанамі матэрыяламі, таму і стала магчымая названая выстаўка. На яе стэндах расказваецца пра гісторыю васьмі крэпасцяў Расійскай імперыі.
А пяты форт, які ўжо больш за дзесяцігоддзі дзейнічае як асобны музей, быў выбраны месцам для міжнароднай выстаўкі для таго, каб яшчэ раз прыцягнуць да яго ўвагу. Цяпер распрацоўваецца канцэпцыя новага музея фартыфікацыі і ўзбраенняў. Ідэю яго стварэння падказаў інтарэс наведвальнікаў да гісторыі фартыфікацыі, які год ад году расце. Але каб адкрыць новы музей, трэба правесці работы па рэстаўрацыі, цеплазабеспячэнні, электрыфікацыі амаль 200-гадовага будынка. Праект разглядаецца як частка вялікай праграмы па падрыхтоўцы горада да 1000-гадовага юбілею. «Цяперашняя выстаўка стала пралогам да будучай экспазіцыі», — сказала навуковы супрацоўнік мемарыяльнага комплексу Алена МІЦЮКОВА. Штогод пяты форт наведвае прыкладна 15 тысяч чалавек, а пасля стварэння новай экспазіцыі супрацоўнікі прагназуюць павелічэнне патоку турыстаў у разы.
Святлана ЯСКЕВІЧ
Фота Валерыя КАРАЛЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
