Вы тут

100-годдзе «Звязды» ў Дзяржынску адзначылі дыктоўкай


Шэраг юбілейных падзей стаў нагодай для незвычайнага мерапрыемства, якое адбылося ўчора ў Дзяржынску. Цэнтральная раённая бібліятэка і райкам БРСМ правялі дыктоўку, прымеркаваную да 100-годдзя «Звязды», 500-годдзя беларускага кнігадрукавання, 135-годдзя з дня нараджэння Янкі Купалы і Якуба Коласа, а таксама Года навукі. Нашы карэспандэнты завіталі на імпрэзу і праверылі сваё веданне роднай мовы разам з жыхарамі Дзяржыншчыны.


— Мы штогод праводзім падобныя дыктоўкі на Дзень роднай мовы, — расказвае першы сакратар Дзяржынскага раённага камітэта БРСМ Кірыл ШЫК. — Але сёлета Беларусь адзначае адразу некалькі круглых дат, таму вырашылі правесці яшчэ адно дадатковае мерапрыемства летам. Пераможцаў вырашылі ніяк не адзначаць — гэта, хутчэй, яшчэ адна магчымасць успомніць пра родную мову, а не праверыць уласнае веданне беларускай арфаграфіі ці пунктуацыі. Сутнасць мерапрыемства — далучыцца да агульнай стваральнай справы і адсвяткаваць знакавыя падзеі ў гісторыі нашай культуры, убачыць, што ты не адзін у сваёй любові да беларускага.

Для дыктоўкі быў выбраны ўрывак з апавядання Якуба Коласа «Крыніца» з цыкла твораў «Казкі жыцця» — як лічаць арганізатары, узор беларускага красамоўства. Нягледзячы на летні час, у чытальнай зале бібліятэкі вольных месцаў не было. Сярод удзельнікаў хапала і моладзі.

— Я даведалася пра дыктоўку на сайце горада, — расказвае навучэнка 10 класа дзяржынскай гімназіі №3 Ганна КРЫВІЦКАЯ. — Старэйшая сястра прапанавала прыйсці і праверыць сваё веданне роднай мовы, я згадзілася. Маю добрыя адзнакі па беларускай мове ў гімназіі, але, шчыра кажучы, маўленчай практыкі мне нестае, бо ў сям'і і маім акружэнні ўсе размаўляюць па-руску. Таму такая дыктоўка не будзе залішняй.

— Безумоўна, я вельмі ўдзячны тым, хто прыдумаў гэта мерапрыемства, — кажа гісторык, паэт, член літаратурнага аб'яднання «Выток» Антон АНІСОВІЧ. — Напэўна, не буду арыгінальным, калі скажу, што яно вельмі важнае для папулярызацыі нашай мовы, яе прапаганды ў добрым сэнсе гэтага слова. Тым больш мне прыемна бачыць сярод удзельнікаў моладзь — гэта значыць, што моўная сітуацыя ў Беларусі рухаецца да лепшага. У нашай бібліятэцы праводзіцца цэлы шэраг падобных мерапрыемстваў, і хочацца спадзявацца, што з гэтага будзе плён. Са свайго боку заўважу, што ў наша аб'яднанне за апошні час прыйшло шмат маладых аўтараў — гэта вельмі ўсцешвае.

Прызнаемся, што дыктоўка была далёка не простай — кожнаму ўдзельніку прыйшлося прыгадаць школьныя гады (ці часова вярнуцца з канікулаў). Напрыканцы супрацоўнікі бібліятэкі прачыталі ўрывак з усімі дэталямі і растлумачылі ўдзельнікам памылкі. Па заканчэнні дыктоўкі ўсе атрымалі на памяць свежыя нумары «Звязды».

Яраслаў ЛЫСКАВЕЦ

lyskavets@zvіazda.by

Фота Сяргея НІКАНОВІЧА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.