Вы тут

Ветэраны «Звязды» згадвалі, як яны рабілі газету


Ветэраны нашай газеты, якія сабраліся ўчора ў рэдакцыі, падзяліліся з маладымі супрацоўнікамі сваім вопытам, прыгадалі шмат гісторый і жартаў


Яны сышліся быццам бы на вечары сустрэчы выпускнікоў. «Ты амаль не змянілася!», «Добра выглядаеш!», «Якія навіны?» — толькі і чуваць было ў рэдакцыйным калідоры. Каб павіншаваць газету, якой прысвяцілі не адзін дзясятак гадоў, ветэраны «Звязды» не пашкадавалі ні часу, ні сіл.

Прычым у прамым сэнсе слова! Вольга Лягчылава, якой у верасні споўніцца 96 (!) гадоў, у гэты дзень таксама была ў рэдакцыі газеты, што дала ёй пуцёўку ў жыццё. Вядома, да вайны (а Вольга Паўлаўна прыйшла на работу ў «Звязду» ў 1938 годзе) рэдакцыя знаходзілася ў іншым месцы, няма ўжо і яе калег, з якімі штодзённа сустракалася ў рэдакцыйных калідорах. Затое ёсць газета, людзі, якіх яна ведае калі не ў твар, дык па прозвішчах, публікацыях, якія штодзень чытае.

— Мяне ў «Звязду» прывёў брат, Аляксандр Русановіч, які працаваў тут літаратурным супрацоўнікам, — расказвае Вольга Паўлаўна. — Калі я прыйшла ў рэдакцыю, я ўпершыню ўбачыла дываны на лесвічных клетках. Па тым часе гэта была раскоша! Працавала ў аддзеле пісьмаў, рэдактарам якога была Ядвіга Савіцкая — у гады вайны яна разам з іншымі стварала падпольную газету. Шмат лістоў у той час у «Звязду» прыходзіла. Найбольш крытычныя разбіраліся на ўсіх узроўнях. Газету паважалі...

Надзея Нікалаенка працавала ў «Звяздзе» перакладчыцай. Кажа, што гэта цяпер усе пішуць па-беларуску. Некалькі дзесяцігоддзяў таму беларускамоўныя журналісты былі на вагу золата. Часам, як успамінае Надзея Гаўрылаўна, у дзень даводзілася перакладаць па 50 старонак тэксту.

Нягледзячы на адзін запіс у працоўнай кніжцы, Ларыса Ракітніцкая ў «Звяздзе» змяніла тры прафесіі. Была і падчытчыцай (чытала ўслых, а стыль-рэдактар правяраў памылкі), і карэктарам, і нават бібліятэкарам. Аказваецца, у «звяздоўскай» бібліятэцы захоўвалася нямала рэдкіх кніг. Журналісты былі частымі яе наведвальнікамі. Прычым іх цікавіла не толькі прафесійная літаратура, карысталіся попытам і мастацкія творы.

Прысутнічала на сустрэчы ветэранаў і былы карэктар Валянціна Шпілеўская. Дарэчы, менавіта яна ў свой час прыдумала рубрыку «Крынічка». Леанід Лахманенка шмат гадоў асвятляў на старонках «Звязды» міжнароднае жыццё. Цяпер свой бясцэнны вопыт ён перадае маладому пакаленню ў Інстытуце журналістыкі. А Яўген Жукоўскі, хоць радкоў не пісаў, пра газету ведаў нямала — на працягу доўгіх гадоў ён з'яўляўся рэдакцыйным вадзіцелем.

— Самы складаны перыяд быў, калі пераходзілі на камп'ютары, — успамінае Валянціна Дайнэка, якая не адно дзесяцігоддзе вярстала нашу газету. — Палова газеты — на метале, палова — на камп'ютары. Да апошніх баяліся дакрануцца! Потым навучыліся.

Сваё жыццё «Звяздзе» аддала і Валянціна Мазжарава, якая толькі нядаўна выйшла з рэдакцыйных сцен на заслужаны адпачынак. Карэктар са стажам у 48 (!) гадоў, яна памятае не адну байку, звязаную з памылкамі. «Як казаў наш супрацоўнік, партызан Янка Казлоў, памылка — тая ж партызанка: як трэба, знойдзе выхад».

Яны ўзгадвалі, як у розныя часы стваралі газету, часам жартавалі, размаўлялі пра тое, чым жыве сучаснае выданне. Здавалася, што час не ўладны над імі. Яны па-ранейшаму ў страі. І няважна, што не ствараюць газету непасрэдна ў рэдакцыйным цэху. Яны жывуць яе праблемамі і ўжо як нашы самыя адданыя чытачы ўдзельнічаюць у яе лёсе.

Вераніка КАНЮТА

kanyuta@zvіazda.by

Фота Кастуся ДРОБАВА

Загаловак у газеце: «Звязда» на ўсё жыццё

Выбар рэдакцыі

Гараскоп

Усходні гараскоп на наступны тыдзень

Усходні гараскоп на наступны тыдзень

У пачатку тыдня да Ракаў могуць падступна падкрасціся трывогі і сумневы.

Здароўе

Як працуюць санаторныя школы-інтэрнаты для дзяцей, хворых на скаліёз?

Як працуюць санаторныя школы-інтэрнаты для дзяцей, хворых на скаліёз?

Па статыстыцы на пяць хворых дзяўчынак прыходзіцца толькі адзін хлопчык.

Рэгіёны

У якіх ўмовах працавалі медыкі ў гады вайны?

У якіх ўмовах працавалі медыкі ў гады вайны?

Подзвіг ваенурачоў адлюстроўвае выстава Брэсцкага абласнога краязнаўчага музея.

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі.