На асабісты прыём грамадзян, які правёў у Клецку старшыня Мінаблвыканкама Анатоль Ісачанка, запісаліся пяць чалавек. Першы на чарзе — жыхар раёна Мікалай Пятровіч.
— Я трымаю трох дойных кароў, двух цялят, — гаворыць мужчына. — Прасіў дырэктара, каб адну з рагуль паставіць на зіму ў кароўнік, а вясной забраць назад, ды ён не пагадзіўся.
— І правільна зрабіў. Жывёліна не прайшла ветэрынарны кантроль. Ці мала якія захворванні можа мець. Па-другое, яна не прывучана да ўтрымання ў статку, аўтаматычнай дойкі, — адказаў старшыня Мінаблвыканкама.
Ураган пашкодзіў дах дома. Дасталася ад стыхіі і мясцовай ферме. Шабашнікі, што ліквідавалі яе наступствы, дазволілі грамадзяніну ўзяць тры лісты старога шыферу. Але давесці дадому ўдалося толькі адзін. «Наляцелі міліцыя, начальнік участка, сказалі: па астатняе нават не хадзі», — крыўдуе заяўнік.
У такім выпадку неабходна звяртацца да кіраўніка гаспадаркі, які павінен выдзеліць будаўнічыя матэрыялы, параіў старшыня Мінаблвыканкама.
У агракамбінаце «Клецкі» падчас стыхіі раскрыла восем дамоў. «Мы кінулі ўсе сілы, каб дапамагчы насельніцтву: падключылі сельгаспрадпрыемства, райспажыўсаюз, арганізацыі раёна. Усёй грамадой ліквідавалі непаладкі. У нас з гэтым ніколі не было праблем», — падкрэсліў Генадзь Салавей.
Анатоль Ісачанка даручыў выдаць грамадзяніну два лісты шыферу, якіх не стае.
Хрысціна Жукоўская і яе муж з 2014 года стаяць у чарзе на паляпшэнне жыллёвых умоў, з лістапада 2016-га — у статусе шматдзетнай сям'і. Яны хацелі ўзяць ільготны крэдыт для куплі дома. Але ім адмовілі. Прапанавалі два варыянты: гатовы дом у сельскай мясцовасці, а таксама будаўніцтва кватэры па дзяржзаказе.
— У нас трое непаўналетніх дзяцей, адно з іх вельмі хворае, неаднаразова ляжалі з ім у бальніцы. Пераехаць у вёску мы не можам, паколькі малому патрэбна медыцынская дапамога.
— Медыцынскае заключэнне ў вас ёсць? — пацікавіўся Анатоль Ісачанка.
— Так, дыягназ не зняты, але інваліднасці нам не далі, паколькі захворванне не прагрэсіруе, — адказала жанчына.
— Я не проста так пытаю. Калі ёсць інваліднасць, то вы маеце права на іншае жыллё, — заўважыў губернатар.
Заадно Анатоль Ісачанка пацікавіўся, ці падабралі сужэнцы дом.
Сям'ю пусціла часова пажыць сваячка з умовай, што будуць прыглядваць за домам. Гаспадыня збіраецца прадаць жыллё і прапанавала набыць яго кватарантам. «Калі мы не выкупім, то нас папросяць выселіцца, — кажа маладая маці. — Дом плошчай 110 квадратных метраў, ёсць цэнтралізаваная каналізацыя, ацяпленне. А пабудаваць свой мы не зможам — няма каму дапамагаць».
«Сапраўды, па заканадаўстве льготны крэдыт шматдзетным выдаецца не на куплю дома, а на будаўніцтва. Але з улікам гэтай сітуацыі я даручу спецыялістам дадаткова вывучыць пытанне і даць вам адказ. Думаю, на працягу двух тыдняў разбяромся», — паабяцаў кіраўнік цэнтральнага рэгіёна.
Губернатар уважліва выслухаў кожнага заяўніка. Праблемы адных вырашылі на месцы. Іншым будзе дадзены афіцыйны адказ пазней, паколькі сітуацыя патрабуе дадатковага вывучэння.
Таццяна ЛАЗОЎСКАЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».