Вы тут

Як на Віцебшчыне дапамагаюць людзям з абмежаванымі магчымасцямі


У прыватнасці, дапамагаюць аднавіць страчаныя ў выніку цяжкай хваробы прафесійныя навыкі, атрымаць новую спецыяльнасць. У той жа час паслугі, якія аказваюць людзі з інваліднасцю, прыемна ўражваюць спажыўцоў прывабным коштам. Ну дзе яшчэ адрамантуюць штаны за 1 рубель? Ці зробяць візіткі добрай якасці па цане ў тры разы танней, чым у звычайных капіравальных цэнтрах?


У майстэрнях цэнтра сацыяльнага абслугоўвання насельніцтва Першамайскага раёна Віцебска.

Наш карэспандэнт пабываў у Тэрытарыяльным цэнтры сацыяльнага абслугоўвання насельніцтва Першамайскага раёна горада Віцебска. Паводле слоў дырэктара Вольгі Гурчанкі, установа абслугоўвае самы густанаселены раён горада. Сёлета ў рамках спецыяльнай праграмы тут уладкавалі на працу больш за 10 чалавек, якія аказваюць насельніцтву розныя віды паслуг.

Загадчыца аддзялення дзённага знаходжання інвалідаў згаданага цэнтра Яна Шляхто здзівіла расцэнкамі.

— У нашай установе можна рабіць заказы, напрыклад, на рамонт адзення, прычым, дробны рамонт каштуе 1 рубель. Пры гэтым якасць выкананага будзе не горшая, чым у звычайных майстэрнях, бо кантралюе працэс вопытны настаўнік. Нядорага каштуюць візітоўкі — пры гэтым вам распрацуюць і іх знешні выгляд. Заказчыкі здзіўляліся, што ў канкурэнтаў аналагічныя паслугі як мінімум у два разы даражэй, — расказвае Яна.

Танныя паслугі — вынік дапамогі дзяржавы ў рэалізацыі праграм падтрымкі, стварэнні працоўных месцаў для тых, хто атрымаў інваліднасць.

У цэнтры на працягу шасці месяцаў — года падапечныя праходзяць рэабілітацыю. Нярэдка яны сталі інвалідамі раптоўна — у выніку ДТЗ, інсультаў, і раней не скардзіліся на здароўе. Быў выпадак, калі з аднаго хлопца была знятая інваліднасць. За час працы ў цэнтры стан яго здароўя палепшыўся.

Падчас трэнінгу людзей вучаць правільна шукаць месца работы і прапаноўваць свае магчымасці. Найбольш цяжка зрабіць гэта, як ні дзіўна, людзям з вышэйшай адукацыяй. Напрыклад, адна з падапечных цэнтра раней выкладала ў школе. Перадпенсійны ўзрост і другая група інваліднасці — не найлепшыя якасці патэнцыйнага кандыдата. Але жанчыне стараюцца дапамагчы.

Людзі з абмежаванымі магчымасцямі ў цэнтры вядуць заняткі ў гуртках па вывучэнні замежных моў, навыкаў выкарыстання камп'ютарных тэхналогій, аматараў кіно і іншых.

Мы ўжо не раз пісалі пра тое, што на Віцебшчыне ўвогуле наладжаны высокі ўзровень сацыяльнага абслугоўвання, а многія кірункі дзейнасці потым становяцца прыкладам для пераймання.

Нядаўна ў СМІ анансавалі комплексную паслугу па доглядзе за пажылымі. Як растлумачыла начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне аблвыканкама Вера Астапенка, догляд, у прыватнасці, аказваецца людзям з вялікімі праблемамі са здароўем. У прыватнасці, пасля інсульту. Такім людзям дапамогуць як па месцы пражывання, так і ў аддзяленні дзённага знаходжання.

Часта праводзяцца інтэграцыйныя форумы, тэматычныя культурныя акцыі. У прыватнасці, нядаўна шосты раз адбыўся фестываль-конкурс «Сонечнае святло для ўсіх».

Асабліва ўважліва вывучаюцца скаргі людзей з інваліднасцю на прамых лініях — кожны такі сігнал бярэцца на заметку.

Аляксандр ПУКШАНСКІ

рukshаnskі@zvіаzdа.bу

Загаловак у газеце: І за рубель... рамонт адзення

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».