Вы тут

«Дзе нашы грошы?»


Фірма перадаплату ўзяла, а дамы не пабудавала

«Паважаная рэдакцыя! Па дапамогу да вас звяртаюцца людзі, якія жадаюць, каб больш ніхто не апынуўся ў гэткім становішчы, як і мы. Каб чарга пакрыўджаных не расла, каб шматдзетная маці не пакутавала зімой без даху ў хаце», — напісалі нам жыхары Полацка і Наваполацка. А сітуацыя, у якой яны апынуліся, на жаль, тыповая і нярэдкая. Сем'і звярнуліся ў фірму, каб зрабіць рамонт, заплацілі немаленькія грошы, а ў выніку засталіся і без першага, і без другога.


Без даху над галавой

Гісторыя пачалася яшчэ летась. Пяць сем'яў вырашылі палепшыць свае жыллёвыя ўмовы: камусьці трэба было пабудаваць новы дом, камусьці — адрамантаваць той, што ёсць. Па рэкамендацыі нанялі адну з полацкіх фірмаў. Кантора перадаплату ўзяла, а потым стала падманваць з цэнамі і месцам закупак будаўнічых матэрыялаў, датамі пастаўкі, зацягвала тэрміны работ і выконвала іх няякасна.

Заказчыкі цярпелі і спрабавалі дамовіцца мірна. Калі не атрымалася, пайшлі ў суд. Справу выйгралі. Але грошы вярнуць не могуць: рахункі фірмы пустыя, з маёмасці — толькі камп'ютарны стол і стэлаж. Іх выстаўляюць на таргі, але пакупнікоў няма. Дый калі з'явяцца, выручыць за гэтую мэблю можна ўсяго 230 рублёў.

«Акрамя перастановак у кіраўніцтве і складзе заснавальнікаў, фальсіфікацыі дакументаў, абвінавачванняў былых кліентаў у паклёпе, фірма нават не спрабуе расплаціцца па даўгах! На пытанне «Дзе нашы грошы?» адказу няма», — у роспачы пішуць чытачы.

Шматдзетная сям'я К. жыве літаральна без даху над галавой: устаноўлены толькі кроквы і часткова параізаляцыйная плёнка. Як ідуць дажджы — вада цячэ па сценах. Як зімаваць у такім доме?..

Трэба сказаць, што пацярпелі не толькі заказчыкі. Будаўнікі, якія працавалі на гэту арганізацыю, засталіся без заробкаў. Не атрымалі грошай і індывідуальныя прадпрымальнікі, якія давалі ў пракат фірме інструменты, прадпрыемствы, што здавалі ў арэнду будаўнічую тэхніку і легкавыя аўтамабілі. У аддзеле судовых выканаўцаў сума ўсіх спаганяльнікаў складае амаль 50 тысяч беларускіх рублёў. А па крымінальнай справе сума перавышае 100 тысяч рублёў!

«Мы вымушаны траціць час на паходы ў суды, міліцыю, пракуратуру і іншыя інстанцыі, замест таго каб удзяляць яго нашым дзецям і сем'ям», — абураюцца ў лісце людзі.

Хвалюе іх і той факт, што фірма, якая іх падманула, працуе і сёння. Праз інтэрнэт яна набірае кадры па ўсёй краіне для работы ў Літве. Заключае з імі кантракты з парушэннямі патрабаванняў заканадаўства, не плаціць абяцаных грошай. На сёння вядома пра больш як 30 пацярпелых.

А на рахунку былога дырэктара нядобрасумленнай фірмы — ужо некалькі збанкрутаваных арганізацый, па якіх у яго субсідзіярная адказнасць, і судзімасць за ўхіленне ад аплаты падаткаў...

Доўг могуць і не вярнуць

Як дзейнічаць у падобных сітуацыях? Калі фірма не выконвае паслугі ў тэрмін, спачатку трэба звярнуцца з пісьмовай прэтэнзіяй на адрас яе кіраўніка. Калі гэта вынікаў не дало — падаваць заяву ў суд. Па словах члена Мінскай гарадской калегіі адвакатаў, адваката бюро «Дубавец і партнёры» Кацярыны ПЯТРОВІЧ, тое, як будуць спаганяць грошы з арганізацыі з пустымі рахункамі і — самае галоўнае — ці атрымаюць што-небудзь пацярпелыя, залежыць ад некалькіх умоў.

Першы варыянт — калі фірма збанкрутавала, бо не разлічыла свае сілы (чытай — ненаўмысна): у бізнесе заўсёды прысутнічае фінансавая рызыка. І такіх выпадкаў шмат, адзначае адвакат. Тады прызначаецца часовы (антыкрызісны) кіраўнік, дзейнасць прадпрыемства спыняецца. Калі грошай на рахунку арганізацыі няма, распрадаецца яе маёмасць і з выручаных сродкаў раздаюць даўгі. Ёсць пэўная чарговасць пагашэння запазычанасцяў. Першымі задавальняюцца патрабаванні грамадзян, якім фірма прычыніла шкоду жыццю і здароўю. Потым у спісе — работнікі, што чакаюць сваіх заробкаў і выхадных дапамог. Пасля выплачваюцца ўзносы ў бюджэты і фонды. І толькі потым — усё астатняе (тая ж матэрыяльная шкода). А што, калі грошай на апошніх проста не хопіць? Нічога, на жаль. Іскі, незадаволеныя з-за недастатковасці маёмасці юрыдычнай асобы, пасля ліквідацыі прадпрыемства аўтаматычна лічацца пагашанымі.

Другі варыянт — калі прадпрыемства першапачаткова неплацежаздольнае (ужо мае запазычанасці па заробках, падатках), але працягвае заключаць дагаворы з заказчыкамі. Тады яе кіраўнік свядома ідзе на падман. А гэта падстава для ўзбуджэння крымінальнай справы за махлярства. У крымінальным працэсе людзі, якія лічаць сябе пацярпелымі, могуць заяўляць грамадзянскія іскі, і грошы ўжо будуць спаганяцца з фізічнай асобы (гэта значыць з кіраўніка фірмы).

— Чытачы максімальна зрабілі ўсё, што магчыма. Цяпер прымаць меры павінны судовыя выканаўцы, — лічыць Кацярына Пятровіч.

Не менш важнае пытанне: ці можна вылічыць ненадзейную фірму, яшчэ да таго як застанешся па яе віне без грошай? Адвакат дае некалькі парад. Так, добрай крыніцай інфармацыі можа стаць інтэрнэт. Звычайна, калі ў арганізацыі пачынаюцца праблемы з выкананнем абавязкаў, людзі пішуць аб гэтым на форумах. На сайце эканамічнага суда ёсць даныя аб прадпрыемствах, якія знаходзяцца на стадыі банкруцтва.

Паглядзіце інфармацыю ад рэгістрацыі фірмы: ці доўга яна існуе? І не палянуйцеся задаць пару пытанняў яе суседзям па офісе. Магчыма, яны чулі аб праблемах і запазычанасцях арганізацыі ці, наадварот, не сумняваюцца ў яе рэпутацыі.

Наталля ЛУБНЕЎСКАЯ

lubneuskaya@zvіazda.by

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.